Ауа райы
Астана 0 °С
Алматы 6 °С
валюта бағамы
USD 445.84
EUR 490.47
RUB 5.73
CNY 62.87

25 ақпан. ҚазАқпарат күнтізбесі

2020 жылдың 25 ақпан 2020 07:00

НҰР-СҰЛТАН. ҚазАқпарат - ҚазАқпарат оқырмандарына 2020 жылғы 25 ақпанға арналған күнтізбесін ұсынады.

ЕСТЕ ҚАЛАР ОҚИҒАЛАР

1971 жылы Жезқазған мыс қорыту зауытының алғашқы кезегі іске қосылды.

1991 жылы Қазақ КСР Министрлер Кеңесінің «Семей қаласында Радиациялық медицина және экология институтын құру туралы» қаулысы қабылданды. Институт ғылыми қызметінің негізгі бағыттары – радиациялық және басқа да факторлардың қоршаған ортаға, адамдарға, жануарларға әсерін зерттеу.

1993 жылы Қазақ КСРО ғарыштық зерттеулер агенттігі Қазақстан Республикасының Ұлттық аэроғарыш агенттігі (ҰАҒА) болып қайта құрылды. Қазақстан Республикасы ҰАҒА бас директоры болып тұңғыш қазақ ғарышкері Тоқтар Әубәкіров тағайындалды.

1994 жылы Қазақстан Республикасы мен Камбоджа корольдігі арасындағы дипломатиялық қарым-қатынас орнады.

1999 жылы Қазақстанда тәуелсіздік алғаннан кейінгі алғашқы халық санағы басталды. Санақ наурыздың 4-іне дейін жалғасты. Мемлекет аумағы 1 463 санақ бөлімдеріне бөлінді. Санақ қорытындысы бойынша Қазақстанда 15 673 400 адам тұрады.

2008 жылы С.Сейфуллин атындағы Қазақ агротехникалық университетінің (ҚазАТУ) «Ақ желкен» студенттік театры құрылды. Жыл сайын танымал қазақ және шетелдраматургтарының қойылымдарын қояды.

2012 жылы студенттік театр Сәкен Сейфуллиннің өмірі мен қызметіне және рухани мұрасына арналған «Ақын мен ажал» спектаклінің премьерасын қойды. Бұл туындыны «Ақ желкен» студенттік театры үшін ақын, Қазақстан Жазушылар Одағының мүшесі Г. Ештанаев арнайы жазды.

2009 жылы Польшада «Поляк Бенедикт: Еуропадан Азияға Қазақстан арқылы (1245-1247 жж.)» атты кітап жарық көрді.

Осыдан жеті ғасырдан астам, Марко Поло дүниенің азиялық бөлігіне келгенінен 30 жыл бұрын, францискандық тақуа Бенедикт Поляк Қасиетті Тақтың дипломатиялық миссиясы құрамында еуропалықтардың ішінде бірінші болып, қазіргі Қазақстан даласын басып өтіп, Азия құрлығының терең қойнауына саяхат жасады. Бұл саяхаттаудың нәтижесі замандастарының күткен жаңалықтарының бәрінен де асып түсті. Поляк саяхатшысының жасаған хабарламасы Еуразиядағы Алтын Орданың салтанат құру дәуіріндегі ең жарқын құжаттардың бірі. Ғалымдардың пікірі бойынша, поляк Бенедикт Ұлы Дала туралы ақпарат жинауда маңызды рөл атқарды, осының арқасында Еуропа бірінші рет дала тұрғындарының өмірі мен тұрмысы туралы жайларды білді. Варшавадағы Қазақстан Елшілігі бастамасымен басылып шыққан жарияланымда оқырмандарға Вена және Париж қалаларындағы Ұлттық кітапханаларда сақталған осы саяхаттың жылнамасы берілген. Сонымен қатар, саяхат барысын сипаттаған көне қолжазбалар ғылыми айналымға тұңғыш рет бірнеше тілде: латын, поляк, қазақ және орыс тілдерінде енгізілді.

2010 жылы Алматыда ҚР Орталық мемлекеттік музейінде «Уақыт ағымындағы хаттар» көрмесінің ашылуы өтті. Онда араб, латын және кирилл қарпі негізінде жазылған іскерлік және жеке хаттар қойылды. Олардың арасында Шоқан Уәлиханов, Абай, Әлкей Марғұлан, Мұхтар Әуезов, Ахмет Жұбановтың жазған хаттары бар.

2010 жылы Алматыдағы Қазақ-Британ университетінде республикадағы алғашқы мұнай мұражайы ашылды. Қазіргі таңда қолда бар барлық жәдігерлер «Мұнай-газ саласының тарихы», «Мұнай-газ ісінің геологиялық-геофизикалық негізі», «Мұнай кәсібінің құрал-жабдықтары» деген 3 секцияға топтастырылып отыр.

2012 жылы елордадағы Бейбітшілік және келісім сарайында «Астана - түркі әлемінің мәдени астанасы» жылының ашылу салтанаты өтті.

Мәдени шара барысында мәртебелі меймандар мен елорда жұртшылығының алдына шығып сөз сөйлеген ҚР Мәдениет және ақпарат министрі Дархан Мыңбай «Астана - түркі әлемінің мәдени астанасы» жылын өткізу барша түркітілдес мемлекеттердің рухани дамуына соны серпін беретінін атап өтті.

2014 жылы ҚБТУ Халықаралық экономика мектебінің (ХЭМ) 2 студенті Меруерт Еркебұлан мен Халида Ғалымова Лондон университеті емтихандарының қорытындысы бойынша үздік нәтиже көрсетті. ҚБТУ ХЭМ 4 курс студенті М.Еркебұлан 100 балдың 92 ұпайын жинап, «Elements of Econometrics» пәні бойынша үздік атанды. Ал Х.Ғалымова «Economics of Labour» пәнінен 90 ұпайға ие болған.

Лондон университетінің емтихандарын жыл сайын 180 елдің 54 мың студенті бір уақытта тапсырады.

2015 жылы Қазақстан Республикасы Тұңғыш Президентінің музейінде бейнелеу және сәндік-қолданбалы өнер туындыларының «Қазақ хандығы: Ұлы даланың ұлы бейнелері» атты көрмесінің ашылу рәсімі өтті. Экспозицияда бірқатар тарихи артефактілер: Ресей патшайымы І Елизаветаның атынан Абылай ханға тарту етілген атақты қылыштың бөлігі, Бөлек батырдың дулығасы, сонымен қатар Қ.Алтынбековтің тарихи дәлдікпен орындаған қазақ хандарының мөр-жүзіктері мен А.Абдубаиттің алтын зерлі жіппен кестеленген көркем паннолары бар.

2017 жылы Мәскеуде Махамбет Өтемісұлы атындағы Атырау қазақ драма театры алғаш рет ресейлік жазушы Георгий Пряхиннің «Тергеу» пьесасын қойды.

2019 жылы Польшада полония алғашқы жастар қысқы чемпионаты өтті. Оған құрамына Алматы, Астана, Көкшетау қалалары мен Солтүстік Қазақстан облысының Ясная Поляна ауылының өкілдері кірген Қазақстан құрамасы қатысты.

Крыница-Здруй курортты қалашығында өткен жарысқа Австрия, Беларусь, Ұлыбритания, Венгрия, Исландия, Испания, Италия, Қазақстан, Литва, Ресей, Украина және Чехия спортшылары қатысты. Командалық есепте қазақстандықтар Чехия мен Литвадан кейінгі үшінші орынға ие болды.

Марапатты жүлдегерлерге чемпионаттың жабылу салтанатына қатысқан Польша Сенатының басшысы Станислав Карчевский табыстады.

Басты сөздер: Күнтізбе,
Жоғары қарай