Ауа райы
Астана 0 °С
Алматы 7 °С
валюта бағамы
USD 388.70
EUR 428.70
RUB 6.08
CNY 55.46

Алматыда АӘК-ті заңсыз алғандар 3,4 млн теңгені мемлекетке қайтарды

2019 жылдың 10 қазан 2019 14:48

АЛМАТЫ. ҚазАқпарат – Алматы қалалық Әлеуметтік әл-ауқат басқармасы басшысының орынбасары Данияр Әлкебайұлы атаулы әлеуметтік көмекті заңсыз алған отбасылар ақшаны мемлекетке қайтырып жатқанын жеткізді, деп хабарлайды ҚазАқпарат тілшісі.

«АӘК алатындарға тамыз-қыркүйек айлары толық төленді. Оған кепілдік бере аламын. Бүгінгі таңда әлеуметтік көмекті заңсыз алғандар ақшаны мемлекетке қайтарып жатыр. Нақтырақ айтсам, 3,4 миллион теңге кері қайтарылды. Бастапқыда ескерту жасаймыз, адамдарға кірістерін жасырғандықтарын айтып, заңсыз алған ақшаны мемлекетке қайтарып беруі тиістігін түсіндіреміз. Содан кейін санаймыз, сомасын айтамыз. Өз еркімен қайтарғандарға түбіртек беріледі. Егер бұл өз еркімен жасалмаса, онда барлық материалдар сотқа жіберіледі», - деді ол.

Бүгін өткен брифингте айтылған мәліметтерге сүйенсек, Алматыда 11 мыңнан астам отбасыға АӘК тағайындалған. Алайда, қайта тексерудің нәтижесі бойынша 634 жанұяға төлемдер тоқтатылды. Себебі, олардың тұрмыстық жағдайы кедейлік шегінен асып кеткен.

«Сонымен қатар, қалада тұрмайтын балаларды анықтадық. Білім министрлігінің хабарлауынша, олар еліміздің басқа аймақтарында білім алуда. Сондықтан біз Қазақстанның өзге облыстарында білім алатын 597 балаға төлемақыны тоқтаттық. Сондай-ақ, АӘК алатын жеке кәсіпкерлермен де жұмыс жүргізілді. Олардың ішінде 186 жеке кәсіпкердің табысын ескере отырып, АӘК төлеуді тоқтаттық», - деп атап өтті Данияр Әлкебайұлы.

Бұған дейін, ол АӘК төлеудің жаңа тетіктері туралы айтқан болатын.

Жоғары қарай