Ауа райы
Астана -2 °С
Алматы -2 °С
валюта бағамы
USD 384.97
EUR 427.12
RUB 6.04
CNY 54.75

Бердібек Сапарбаев Шиелі және Жаңақорған аудандарында болды

2019 жылдың 27 қазан 2019 14:06

ҚЫЗЫЛОРДА. ҚазАқпарат - ҚР Премьер-Министрінің орынбасары Бердібек Сапарбаев бастаған үкіметтік жұмыс тобы Қызылорда облысына сапары барысында Шиелі, Жаңақорған аудандарының тұрғындарымен кездесті, деп хабарлайды ҚазАқпарат тілшісі.

Кездесу барысында ҚР Президенті Қасым-Жомарт Тоқаевтың Қазақстан халқына Жолдауының басты бағыттары таразыланды. ҚР Еңбек және халықты әлеуметтік қорғау министрі Біржан Нұрымбетов келесі жылдың 1 қаңтарынан бастап еңгізілетін көпбалалы және мұқтаж отбасыларға арналған көмектің жаңа әдісі тұралы айтты.




«Мемлекеттің негізгі қағидаты - шын мәнінде көмекке мұқтаж адамдарға, бірінші кезекте балалар мен көпбалалы отбасыларға көмек көрсететін болады. Еңбекке қабілетті азаматтар жұмыс істеуге тиіс, мемлекет жұмысқа орналасуға немесе шағын бизнеспен айналысуға көмектеседі. Мемлекеттік көмек көпбалалы отбасыларды қолдауды, аз қамтылған отбасыларға атаулы әлеуметтік көмекті, аз қамтылған отбасылардың балаларына арналған кепілді әлеуметтік пакетті қамтитын болады», - деді Б.Нұрымбетов.

Министрдің айтуынша, көп балалы отбасыларды қолдау республикалық бюджет қаражатынан мемлекеттік жәрдемақыны енгізу есебінен қамтамасыз етіледі. Аталмыш мемлекеттік жәрдемақы жанұяның табысына қарамастан барлық көпбалалы отбасыларға төленетін болады. Мемлекеттік жәрдемақының мөлшері балалардың санына байланысты сараланып, әр балаға орта есеппен 10-11 мың теңгеден беріледі. Ал, АӘК аз қамтылған отбасыларға, соның ішінде көп балалы отбасыларға да төленетін болады.

Министр АӘК алатын еңбекке қабілетті отбасы мүшелері жұмыс істеуі тиіс екенін атап өтті. Оларды жұмысқа орналастыру үшін өнімді жұмыспен қамтуды және жаппай кәсіпкерлікті дамытуға бағытталған «Еңбек» мемлекеттік бағдарламасының барлық тетіктері пайдаланылатын болады. Егер отбасының еңбекке жарамды мүшесі ұсынылған жұмыстан және жұмыспен қамтуға жәрдемдесу шараларынан бас тартса, онда АӘК төлемі барлық отбасы мүшелері үшін тоқтатылады.

Министрдің баяндамасын мұқият тыңдап, ауыл тұрғындары мемлекеттік әлеуметтік көмектің жаңа тетіктерін мақұлдады.

Аудан тұрғындары зейнеткерлік және тұрғын үймен қамтамасыз ету, мұқтаж отбасыларға әлеуметтік көмек көрсету, жұмысқа орналастыру, мемлекеттік қолдау шараларын көрсету және басқа да мәселелерді шешуге қатысты өздерін қызықтырған сұрақтарды қоюға мүмкіндік алды.

«Мемлекет өзінің барлық әлеуметтік міндеттемелерін толық көлемде орындап отыр. Әлеуметтік салаға республикалық бюджеттің 45% бағытталды. Мемлекет басшысы халықтың өмір сүру деңгейін жақсартуға ерекше көңіл бөледі, жалақы, зейнетақы мен жәрдемақы өсуде, жүздеген нысан – мектептер, ауруханалар, әлеуметтік тұрғын үйлер салынып, жолдар жөнделуде. Ағымдағы жылдың 9 айынынң өзінде АӘК төлеуге 200 млрд теңгеден астам қаржы жұмсалды», - деді Б.Сапарбаев.

Сонымен қатар, вице-премьер жастарға рухани-адамгершілік тәрбие мен білім беру және денсаулық сақтау саласының сапасын арттыру, МӘМС енгізу, сандық технологияларды дамыту, жұмыспен қамтуды қамтамасыз ету және әлеуметтік саланы дамытудың басқа да мәселелерін қозғады.

Сондай-ақ, үкіметтік топ Шиелі ауданындағы жаңа аудандық аурухананың жұмысымен танысты. Нысан 2019 жылдың желтоқсанында пайдалануға беріледі. Келесі нысан – Шиелі Гежуба цемент зауыты. Кәсіпорынның құрылысы 2018 жылдың желтоқсанында аяқталып, 2019 жылдың мамыр айында пайдалануға берілді. Жобаның құны - 64 млрд теңге. Орталық Азияның заманауи технологияларымен жабдықталған зауыт жылына 1 млн тонна өнім шығаруға қуатты.

Бұдан бұрын Бердібек Сапарбаев Қызылордада білім саласының қызметкерлерімен кездескен болатын. Сондай-ақ, Бердібек Сапарбаев Қызылордада мүмкіндігі шектеулі жандарды оңалту орталығында болды .




Жоғары қарай