Ауа райы
Астана -9 °С
Алматы 6 °С
валюта бағамы
USD 389.98
EUR 434.01
RUB 6.10
CNY 55.04

Бокстан әлем чемпионаты: Абылайхан Жүсіпов қола медаль алды

2019 жылдың 20 қыркүйек 2019 22:25

НҰР-СҰЛТАН. ҚазАқпарат - Қазақстандық Абылайхан Жүсіпов Ресейдің Екатеринбург қаласында өтіп жатқан бокстан әлем чемпионатында Қазақстан қоржынына төртінші қола медаль салды, деп хабарлайды ҚазАқпарат тілшісі.

Абылайхан Жүсіпов 69 келіде ресейлік боксшы Андрей Замковоймен қолғап түйістірді. Бүгінгі жекпе-жекте қос қарсылас тартысты бәсеке көрсетті. Бір-біріне жұмсаған соққылары дәл тиіп жатты. Абылайхан өзінен он жас үлкен ресейлік былғары қолғап шеберінің осал тұсын табуға барынша тырысты. Дегенмен төрешілер жеңісті ресейлік боксшыға берді.

Абылайхан Жүсіпов 1997 жылы Қарағанды облысында дүниеге келген. Бұған дейін 2017 жылы әлем чемпионатында қола, Азия чемпионатында күміс жүлдегер атанған.

Ол 69 келіде биылғы әлем чемпионатын 1/16 финалдық сатысынан бастап, онда таиландтық Вуттичай Масухты тізе бүктірді. Одан кейін 1/8 финалда германиялық Ник Бурды жеңді. Ширек финалда Доминикан Республикасынан келген Эмилиано Поланкодан басым түсті.

Бүгінгі қарсыласы Андрей Замковой - Ресейдің 32 жастағы тәжірибелі боксшысының бірі. Ол 2012 жылы Олимпиадада қола алса, 2009 жылы әлем чемпионатында қола жүлдеге қол созды.

Бұған дейін бүгін қазақстандық үш боксшы қарсыластарына есе жіберді. Нәтижесінде Қазақстан қоржынына үш қола медаль түсті.


Автор Әділжан Үмбет
Басты сөздер: Бокс, Қоғам, Спорт,
Жоғары қарай