Ауа райы
Астана 8 °С
Алматы 6 °С
валюта бағамы
USD 389.59
EUR 429.06
RUB 6.05
CNY 55.07

Елорданың құрылыс компаниялары заң талаптарын ескермейді – Біржан Нұрымбетов

2019 жылдың 5 қыркүйек 2019 17:31

НҰР-СҰЛТАН. ҚазАқпарат - Нұр-Сұлтан қаласының екі құрылыс компаниясындағы жалақы бойынша берешек 265 миллион теңгені құрайды. Бұл туралы ҚР Еңбек және халықты әлеуметтік қорғау министрі Біржан Нұрымбетов айтты, деп хабарлайды ҚазАқпарат тілшісі.

«Негізгі проблема - жалақының уақтылы төленбеуі. Қазіргі уақытта республиканың жұмыс істеп тұрған 39 кәсіпорнында жалақы бойынша мерзімі өткен берешек сомасы 1,8 мың жұмыскерге 683 миллион теңгені құрайды. Елордада заң талаптарын ескермейтін және 2 айдан астам уақыт жұмысшыларына жалақы төлемейтін кәсіпорын басшылары да кездеседі. Бұл, ең алдымен, «Шар-Құрылыс» және «ДжиЭлБи» ЖШС, жалпы қарызы 265 млн. теңге», – деді Біржан Нұрымбетов елорданың жекелеген кәсіпорындарындағы еңбек қатынастарының проблемалық мәселелеріне арналған кеңес барысында.

Сонымен қатар, оның айтуынша, жалақыны ұзақ уақытқа кешіктіру фактілері «Мостостроительный отряд – 25 им. Рязанова» ЖШС-да көптеген жанжалдың себебі болып отыр. Бүгінгі таңда республикадағы бұл компанияның жалпы берешегі 30 миллион теңгеден асады. Оның 5 миллион теңгесі Нұр-Сұлтан қаласында әлі төленбеген. Ал жұмыскерлер осы жылдың қыркүйегінде тағы да наразылық митингісін ұйымдастырды.

«Келесі проблемалық мәселе – банкротқа ұшыраған кәсіпорындардағы жалақы бойынша берешек. Республика бойынша 86 кәсіпорында 2,3 мың жұмыскердің алдындағы қарыз 983 миллион теңгені құрайды. Оның ішінде Нұр-Сұлтан қаласындағы 4 банкроттық кәсіпорынның 9,4 млн теңге берешегі бар», – деді министр.

Біржан Нұрымбетов қоғамдағы әлеуметтік шиеленістің алдын алуға да назар аударды.

«Жыл басынан бері республикада еңбек жанжалдарының 3 фактісі тіркелді. «Абу-Даби Плаза» құрылыс кешені құрылыстағы қазақстандық және шетелдік жұмысшылардың арасындағы үнемі туындаған қақтығыстардың тұрақты шиеленіс көзі болып отыр. Тек осы жылдың өзінде аталған мекемеде 4 жанжал орын алған. Бірақ олар тұрмыстық және ұлтаралық сипатта болды. Олардың себебі жергілікті және шетелдік қызметкерлердің еңбек жағдайының әртүрлі болуында», – деді министр.

Сондай-ақ, ол ҚР Еңбек және халықты әлеуметтік қорғау министрлігі Бас прокуратурамен бірлесіп шетелдік жұмыс күшін тартатын 63 кәсіпорында (тексеру жүргізуге) бастамашылық еткенін атап өтті. 38 кәсіпорында тексеру аяқталды, оның ішінде 19-да еңбекақы төлеудегі сәйкессіздіктің 161 фактісі анықталды.

«Тексеру нәтижелері көрсеткендей, Нұр Сұлтан қаласында Arabtec CCL филиалында жергілікті және шетелдік жұмыскерлерді тамақтандыру кезінде теңсіз жағдайлар фактілері анықталды. Жатақханада тұратын шетелдік жұмыскерлерге күніне 3 рет ас беріледі, оның құны 2-ден 3 мың теңгеге дейін, ал жергілікті қызметкерлер бөлек тамақтанады. Оларға тек 800 теңге мөлшерінде өтемақылық төлем беріледі. Сонымен қатар, жұмыс берушілердің берілген рұқсатқа сәйкес келмейтін лауазымдарға шетелдік жұмыскерлерді тарту фактілері, сондай-ақ қазақстандық кадрларды қамту талаптарының сақталмау фактілері анықталды. Тексеру нәтижелері бойынша мемлекеттік еңбек инспекторлары тарапынан нұсқама берілді», – деді Б.Нұрымбетов.

Министр шетелдік жұмыс күшіне байланысты бұзушылықтардың тұрақты анықталуына байланысты ҚР Еңбек министрлігі квоталарды қысқарту бойынша шаралар қабылдап, шетелдік мамандарды тартуға рұқсат беру ережесін күшейтуді жоспарлап отырғанын атап өтті.


Жоғары қарай