Ауа райы
Астана 21 °С
Алматы 24 °С
валюта бағамы
USD 384.87
EUR 432.52
RUB 6.11
CNY 55.95

Қарағанды облысында Халықаралық мұражайлар фестивалі басталды

2019 жылдың 11 маусым 2019 21:57 963

ҚАРАҒАНДЫ. ҚазАқпарат - Бүгін Жезқазғанда «Ұлы Дала мұрасы» халықаралық мұражайлар фестивалі басталды. Оған әлемнің бірнеше елінен келетін 18 мұражайдың қызметкерлері қатысады. Дәріскерлер мен қонақтар ретінде Қытай, Түркия, Ресей, Өзбекстан және Моңғолиядан келген делегаттар келді, деп хабарлайды ҚазАқпарат тілшісі.

Іс-шара «Рухани жаңғыру» бағдарламасы және Қазақстан Республикасының Тұңғыш Президенті Н.Ә. Назарбаевтың «Қоғамдық сананы жаңғырту» бағдарламалық мақаласын, сондай-ақ «Ұлы даланың жеті қыры» атты мақаласын жүзеге асыру аясында ұйымдастырылып отыр.

Фестиваль 11-13 маусым аралығында өтеді. Бірінші күні " Тарихта өз есіміңді қалдыр" акциясы өтті.

Фестиваль аясында Жезқазған тарихи-археологиялық мұражайы, Түрік Республикасының Анкара университеті мен Астрахань музей-қорығы арасында ынтымақтастық туралы үшжақты меморандумға қол қойылды.

Бағдарламада қолданбалы өнер бойынша шеберлік-сыныптар өткізу де қарастырылған. Оған мұражайлардың суретші-реставраторлары, қыш ісінің шеберлері қатысты.

Шараны ұйымдастырушылар «Ұлы Дала мұрасы» экспозициясын ұсынды. Ең қызықты жәдігерлердің бірі «Алтын адамның» дәл көшірмесі болды. Сондай-ақ, көрмеде Қазақстанның 60-тан астам бірегей жәдігері жиналған.


Сонымен қатар көпшілік назарына әртүрлі елдердің мұражайларынан жеткізілген сирек кездесетін жәдігерлер ұсынылды. Қытай делегациясы Қарағанды облысының мұрағаттар және құжаттама басқармасының қарамағына 18 ғасырдағы Қытай мен Қазақстан арасындағы жібек саудасы туралы құжаттың көшірмесін берді. Моңғол делегациясы қазақ диаспорасының Моңғолия аумағына қалай қоныс аударғаны туралы құжаттың көшірмесін сыйға тартты. Өзбек делегациясы атынан қарағандылықтар 19-20 ғасырлардағы қазақ халқының тарихына қатысты құжаттар мен фотосуреттердің көшірмесін сыйлыққа алды.


12 маусым күні фестиваль қатысушылары үшін мұражай қызметкерлеріне арналған «Мұражай қызметін жаһандық жаңғырту - уақыт қажеттілігі» тақырыбында семинар-тренинг өтеді. Дәріскерлер Анкара университетінің профессоры Айша Чакир Илхан, жоғары санатты экскурсовод-әдіскер, Қазақ спорт және туризм академиясының туризм сарапшысы, ЮНЕСКО ұлттық комиссиясының мүшесі Бақыт Оразымбетова, тарих ғылымдарының кандидаты, Әл-Фараби атындағы ҚазҰУ археология, этнология және музеология кафедрасының доценті, профессор Тәттігүл Қартаева және басқа да танымал тұлғалар болды.

Фестивальдің қорытынды күнінде, 13 маусымда қатысушылар үшін Ұлытау жеріне саяхат ұйымдастырылады. 



 

Жоғары қарай