Ауа райы
Нұр-Сұлтан 16 °С
Алматы 25 °С
валюта бағамы
USD 384.05
EUR 432.79
RUB 5.96
CNY 55.46

ҚР Ішкі істер министрінің орынбасары қызметіне Алексей Калайчиди тағайындалды

2019 жылдың 30 қаңтар 2019 17:07 840

АСТАНА. ҚазАқпарат - ҚР Ішкі істер министрінің орынбасары қызметіне Алексей Калайчиди тағайындалды, деп хабарлайды ҚазАқпарат Ақорданың баспасөз қызметіне сілтеме жасап.

«Мемлекет басшысының Өкімімен Алексей Дмитриевич Калайчиди Қазақстан Республикасы Ішкі істер министрінің орынбасары болып тағайындалды, ол Қазақстан Республикасы Президенті Әкімшілігінің Құқық қорғау жүйесі бөлімінің меңгерушісі қызметінен босатылды», - делінген хабарламада.

Еске сала кетсек, Берік Бисенқұлов ҚР Ішкі істер министрінің орынбасары қызметінен босатылған болатын.

Алексей Калайчиди 1963 жылы 3 қаңтарда туған, ұлты грек.

1985 жылы - Фрунзе политехникалық институтын, 1990 жылы - КСРО ІІМ Жоғарғы курстарын, 2008 жылы - Е. Бөкетов атындағы Қарағанды мемлекеттік университетін бітірген.

Еңбек жолын 1985 жылы шілде айында Қырғыз КСР Тоқмақ қ. №93 арнайы басқармада шебер ретінде бастаған, содан кейін Шымкент қ. «Южгорсельпроект» мемлекеттік жобалық институтында инженер болып жұмыс істеген.

Ішкі істер органдарындағы қызметін 1990 жылдың сәуір айынан бастап Шымкент облысы Абай аудандық ІІБ қылмыстық іздестіру жедел уәкілінен бастаған. Әкімшілік полиция жүйесінде лауазымдық баспалдақтың барлық жолдарынан өткен: инспектор, бөлім бастығы, басқарма бастығының орынбасары, Оңтүстік Қазақстан облысы ІІД және ІІМ орталық аппаратында басқарма бастығы.

2005-2006 жылдары ІІМ заң қызметіне, сондай-ақ жеке құрам бойынша инспекцияға басшылық жасаған.

2006 жылдың қараша айынан 2008 жылдың наурыз айы аралығында Жамбыл облысы ІІД бастығының тәрбие және кадр жұмысы жөніндегі орынбасары болып қызмет атқарған.

2008 жылдан бастап Президент Әкімшілігінде жұмыс істеді: инспектор, сектор меңгерушісі, Құқық қорғау жүйесі бөлімі меңгерушісінің орынбасары.

Соңғы тағайындалуға шейін 2016 жылдың маусым айынан бастап Мемлекет басшысының өкімімен Құқық қорғау жүйесі бөлімінің меңгерушісі болып қызмет атқарды.

«Құрмет» (2012 жыл) орденімен және 5 мерекелік медальмен марапатталған.

Үйленген, екі баласы және немересі бар.

Жоғары қарай