Ауа райы
Астана 20 °С
Алматы 22 °С
валюта бағамы
USD 385.16
EUR 425.95
RUB 6.01
CNY 54.51

Қызылордада тұрмысы төмен отбасының балалары автобуста тегін жүреді

2019 жылдың 22 тамыз 2019 10:53

ҚЫЗЫЛОРДА. ҚазАқпарат - Қызылорда қаласында әлеуметтік жағдайы төмен отбасындағы оқушылар жаңа оқу жылынан бастап қоғамдық көліктерде тегін жүреді. Олардың жалпы саны 6800 оқушыны құрайды, деп хабарлайды ҚазАқпарат тілшісі.

Облыстық білім басқармасының хабарлауынша, бұл мақсатта жергілікті бюджеттен 68 млн 600 мың теңге қаржы бөлінді. Игілікті бастама ел Үкіметінің 2008 жылғы 25 қаңтардағы №64 қаулысымен бекітілген әлеуметтік жағынан қорғалмаған отбасылардан шыққан білім алушыларға қаржылай және материалдық көмек көрсетуге бөлінетін қаражатты жұмсау ережесі негізінде қолға алынып отыр. Ендігі кезекте сол санатқа енгізілген жас өрендер қалаішілік автобустарда тегін қатынай алады.

«Мұндай санатқа мемлекеттік атаулы әлеуметтік көмек алуға құқығы бар, мемлекеттік атаулы көмек алмайтын, жан басына шаққандағы табысы ең төменгі күнкөріс деңгейінің шамасынан төмен, төтенше жағдайлардың салдарынан шұғыл жәрдемді талап ететін отбасының балалары жатқызылады. Сондай-ақ, оған жетім немесе ата-анасының қам­қорлығынсыз қалған, бірақ отбасыларда тәрбиеленіп жатқан балалар, білім беру ұйымының алқалы бас­қару органы айқындайтын білім алушылар мен тәрбиеленушілердің өзге де санаттары енгізілген», - деп мәлім етті Қызылорда облыстық білім басқармасы.

Мұндай қамқорлыққа ие болған оқушылар қай сыныпта оқитынына қарамастан оларға бір айлық есептік көрсеткіш мөлшерінде қоғамдық көлікте тегін жүру жеңілдігі беріледі. Бұл мақсатта құжат жинау мен рәсімдеу ісімен мектеп басшылығы айналысады.


Жоғары қарай