Ауа райы
Астана -20 °С
Алматы -9 °С
валюта бағамы
USD 386.44
EUR 428.37
RUB 6.06
CNY 54.93

Мәслихат депутаттары мәселе көтермейді, сол үшін оларды көбі танымайды - Байбек

2019 жылдың 26 қыркүйек 2019 12:21

НҰР-СҰЛТАН. ҚазАқпарат - Қазақстан аймақтарындағы мәслихат депутаттары тұрғындармен белсенді жұмыс істеуі керек. Бұл туралы Nur Otan партиялық бақылау комитетінің отырысында партия төрағасының бірінші орынбасары Бауыржан Байбек айтты, деп хабарлайды ҚазАқпарат тілшісі.

«Бүгінгі таңда аймақтық құрамды күшейту керек. Мәслихат депутаттары белсенді болғаны дұрыс. Өкінішке қарай, аймақ тұрғындары олардың бәрін тани бермейді. Себебі олар өзекті мәселелерді белсенді түрде көтеріп жатқан жоқ. Ал бұл жерде мемлекет басшысы мен партия алға қойған міндеттерді жүзеге асыру әлеуеті жоғары», - дейді Бауыржан Байбек.

Ол Nur Otan партиясы азаматтардың сенімін ақтап, алға қойған міндеттерді абыроймен атқаруы керектігін айтты.

«Бізді көп өзгеріс күтіп тұр. Басқарушы партия ретінде өте әбжіл қозғалуымыз керек. Қазіргі уақытта сайлаушылардың сеніміне кіру оңай емес. Азаматтардың пікірі жылдам өзгереді, оған әлеуметтік желілер де айтарлықтай әсер етуде. Әр адам өзіне «Партия маған не береді?» деген сұрақ қояды», - дейді ол.

Партия төрағасының бірінші орынбасарының сөзінше, әлеуметтік желі қолданушылары қоғамдық жұмыс қалай атқарылып жатқанын жақсы біледі.

«Сондықтан мәслихат депутаттарының әлеуметтік желіні қолдана білуі өте маңызды. Бұл – сайлаушымен тікелей байланыста болу мүмкіндігі. Әлеуметтік желі арқылы қандай мәселе туындап жатқанын біліп, оны жылдам шешуге болады», - дейді Бауыржан Байбек.

Жоғары қарай