Ауа райы
Астана -9 °С
Алматы -4 °С
валюта бағамы
USD 381.10
EUR 420.81
RUB 5.65
CNY 54.57

Нұрлан Ноғаев: Алдымыздағы басты мақсат - ел бірлігін қамтамасыз ету

2019 жылдың 23 сәуір 2019 12:23

НҰР-СҰЛТАН. ҚазАқпарат - Қасым-Жомарт Кемелұлы Тоқаев халқымызды бір мақсат, бір мүддеге жұмылдыратынына сенімдіміз. Мұндай пікірді «Nur Otan» партиясының кезектен тыс ХІХ съезінде Атырау облысының әкімі Нұрлан Ноғаев айтты, деп хабарлайды ҚазАқпарат тілшісі.

«Алдымызда тұрған ендігі басты мақсат - Тұңғыш Президентіміз - Елбасы саясатының алтын арқауы, басты өзегі болған ел бірлігі мен ынтымағының жарасымды жалғасын қамтамасыз ету. Президенттік өкілеттігіңізді тоқтату жөніндегі шешіміңізді атыраулықтар алғашқы сәтте алаңдаушылықпен қабылдағаны рас. Дегенмен, бұл шешімнің себебін өзіңіз түсіндірген соң бойымыздағы толқу сезімі сейілді. Бұл тарихи сәт еліміздің болашағына деген ұстанымыңызды, көрегендік көсемдігіңізді тағы да айшықтады», - деді облыс әкімі «Nur Otan» партиясының Төрағасы, Елбасы Нұрсұлтан Назарбаевқа қарата.

Оның атап өтуінше, ұрпақтар сабақтастығы, биліктің институционалдығы мен осы жолдағы таңдау Қасым-Жомарт Тоқаев мырзаға түскенін «Nur Otan» партиясының мүшелері зор ілтипатпен, сеніммен қабылдады.

«Құрметті Елбасы! Қасым-Жомарт Кемелұлы - өзіңіздің сенімді көмекшіңіз, сенімді үзеңгілесіңіз. Әлемдік саясаттың ауа райын жақсы түсінетін, ел мүддесі үшін қажет шешім қабылдай алатын саясаткер ретінде дүниежүзіне танымал тұлға екенін өзіңіз атап өттіңіз. Кәсіби біліктілігімен, әр саладағы тәжірибесімен, адалдығы және адамгершілігімен танымал Қасым-Жомарт Кемелұлы Елбасымыздың стратегиялық бастамаларын жалғастырып, халқымызды бір мақсат, бір мүддеге жұмылдыра отырып, Тәуелсіздігіміздің мәңгі болуына, еліміздің дамуына бар күш-жігерін салатынына сенімдіміз», - деді Нұрлан Ноғаев.

Жоғары қарай