Ауа райы
Астана -10 °С
Алматы -1 °С
валюта бағамы
USD 388.70
EUR 428.70
RUB 6.08
CNY 55.46

Шетелдік ЖОО-да оқығандар мемлекеттік қызметке жаңа тәртіппен қабылдануы мүмкін

2019 жылдың 26 қыркүйек 2019 15:07

НҰР-СҰЛТАН. ҚазАқпарат – ҚР Парламенті Сенатының жалпы отырысында «Қазақстан Республикасының кейбір заңнамалық актілеріне мемлекеттік қызмет және сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды, деп хабарлайды ҚазАқпарат тілшісі.

Заң жобасы бойынша Парламент Мәжілісінің депутаты Ерсұлтан Бектұрғанов баяндама жасады. Тек қана өткен жылдың ішінде мемлекеттік қызметке қызығушылық танытқандар саны 53 мың адамнан асып, 24 мыңнан астамы тестілеуден өткен. Қызметтегі ауыспалық екі есеге азайып, негізінен, бірінші басшылар ауысқанда, басқа мемлекеттік органдардан ауыстыру ретімен келетіндердің саны 18 есе қысқарған. Былтырдың өзінде 6 мыңнан астам төмен қызметтерден жоғары лауазымдарға мансаптық үлгімен көтерілген.

«Азаматтардың сынақ мерзімін анықтау мен арнайы тексеруден өткізу шараларын конкурстан өтіп, жұмысқа кірген күннен бастап қатар бастауды ұсынып отырмыз. Бұдан бөлек, мемлекеттік қызметтен теріс себептермен емес жұмыстан босағандарға жұмыстан шығарғаннан кейін тестен өтпей, 30 күн ішінде мемлекеттік қызмет конкурстарына қайтадан қатысуға мүмкіндік беру жағы ескерілген. Сонымен қатар, бұрын мемлекеттік қызметте істеген, кейін қайтадан жұмысқа келген азаматтарға сынақ мерзімін қоймау жеңілдіктері көзделген. Орталық мемлекеттік органдардың мемлекеттік қызметшілеріне олардың ведомстволары мен аумақтық бөлімшелері өткізетін ішкі конкурстарға қатысу құқығын беру ұсынылады», - деді Бектұрғанов заң жобасын таныстыру барысында.

Депутаттың атап өтуінше, жетекші шетелдік жоғары оқу орындарында докторантура бағдарламасы бойынша оқыған, сондай-ақ халықаралық ұйымдарда жұмыс тәжірибесі бар тұлғаларға мемлекеттік қызметке конкурстан тыс кіру мүмкіндігін жасау ұсынысы қамтылған.

Өз кезегінде сенатор Мұрат Бақтиярұлы осы жаңашылдыққа қатысты сұрақ қойды. Осы орайда мемлекеттік қызметке үміткерлердің білімімен қатар, іскерлігі мен азаматтық пайымына бірінші кезекте қарау керектігін атап өтті.

Бұл тұрғыда Ерсұлтан Бектұрғанов жетекші шетелдік ЖОО-да докторантура бітірген, белгілі дүниежүзілік компанияларда істейтін еліміздің азаматтарын шақыру қадамы олардың конкурстан тыс кіру деген конкурстан өтпеу дегенді білдірмейтінін атап өтті.

«Олар Президент жанындағы ұлттық комиссияның конкурсынан өтеді. Сондықтан ол азаматтар егжей-тегжейлі тексеріліп, содан кейін қабылдануы мүмкін», - деді депутат Бектұрғанов.

Жоғары қарай