Ауа райы
Астана -5 °С
Алматы 3 °С
валюта бағамы
USD 375.87
EUR 406.24
RUB 5.84
CNY 53.45

Түркістандағы перинаталдық орталық маңызды медициналық құралмен жабдықталды

2020 жылдың 23 қаңтар 2020 19:58

ТҮРКІСТАН. ҚазАқпарат – Түркістан облысындағы №3-ші перинаталдық орталығы жаңа туған нәрестелердің өмірі үшін маңызды медициналық құрал-жабдықпен қамтылды.

Аталған жабдық мұқият және өте дәл мөлшерлемемен баланың дене қызуын төмендете алады, деп хабарлайды ҚазАқпарат тілшісі.

Терапевттік гипотермияға арналған TecoTerm Neo және электроэнцефалография аппараттары жүйке жүйесінің зақымдануымен туған сәбилерге өмірлерінің алғашқы сәттерінде гипотермиялық емдік шара жасайды. Қан айналымын жақсартып, сәбилердің бас миы жасушаларының немесе зақымданған бөліктерінің қалпына келуін бақылауға мүмкіндік береді.





Небәрі 6 келі болатын жабдықтың құны 27 миллион теңге тұрады. Германияда шығарылған медициналық жабдықты перзентханаға «АЯЛА» қайырымдылық қоры Қазақстан халық банкі АҚ қаржылай қолдауымен табыстап отыр. Қор бұл медициналық жабдық өңірде гипоксияның ауыр түрлерімен байланысты сәбилер өлімін төмендетуге көмектесетініне сенімді.





Бүгінде терапевттік гипотермия - нәрестелердің бас миын қорғаудың әлемде мойындалған дәрі-дәрмекті қолданусыз, негізгі физикалық әдісі ретінде қаралады. Әсіресе шала туылған нәрестелерді күтуде аса маңызды.

«Сәбилер өлімін және мүгедектігін қысқарту жөніндегі жобаларды іске асыру біздің қор жұмысының негізгі басымдығы болып табылады. Бұл жабдық Түркістан облысындағы сәбилердің тіршілікке қабілеттілігін және бала туу көрсеткіштерін жақсартуға көмектесетініне сеніміміз мол», - дейді аталған қордың президенті Айдан Сүлейменова.





Айта кетейік, Түркістан облыстық №3-ші перинаталдық орталығы 225 науқасқа лайықталған. Өңірде нәрестелердің дүниеге келу көрсеткіші жыл сайын артып келеді. Мәселен, былтыр дәл осы перзентханада 8 мыңға жуық сәби өмірге келген болса, оларда 38-і ауыр асфикция диагнозы анықталған. Сондықтан гипотермия сияқты жабдықтың болуы сапалы көмек көрсету үшін өте маңызды. Өз кезегінде перзентхананың дәрігерлері өз тараптарынан жаңашылдыққа қызуғышылық танытып, Корея, Литва, Ресей мемлекеттерінде біліктілік арттырған. Жаңа туған нәрестелерге сапалы ем көрсету мақсатында реанимациялық палаталарда емдеу – профилактикалық музыкотерапиясы ұйымдастырылған. Жансақтау бөлімдері арнайы кенгуру креслоларымен жабдықталған. Жалпы, өңірде өткен жылы 55 мыңнан астам сәби дүниеге келген.











Жоғары қарай