Ауа райы
Астана -1 °С
Алматы 6 °С
валюта бағамы
USD 388.70
EUR 428.70
RUB 6.08
CNY 55.46

Жапониядағы тайфун: 74 адам қаза тауып, 11-і із-түзсіз кеткен

2019 жылдың 16 қазан 2019 09:13

НҰР-СҰЛТАН. ҚазАқпарат - Жапонияда «Хагибис» тайфуны салдарынан қаза тапқандар саны 74-ке жетті. Тағы 11 адам хабар-ошарсыз жоғалған, деп хабарлайды ҚазАқпарат NHK телеарнасына сілтеме жасап.

Телеарнаның хабарлауынша, 200-ден астам адам жарақат алған. Апат құрбандары мен зардап шеккендердің көпшілігі Хонсю аралының солтүстік-шығысындағы Фукусима және Мияги префектураларының тұрғындары. Сондай-ақ Канагава префектурасы да адам шығынын аз көрген жоқ.

Қазір 13 мың пәтер жарықсыз отыр, 130 мың үйде су жоқ.

Жапония министрлер кабинетінің бас хатшысы Ёсихидэ Суганың мәлімдеуінше, апаттан зардап шеккен өңірлерде инфрақұрылымды қалпына келтіру және іздестіру-құтқару операциялары жүріп жатыр. Оған 110 мың адам жұмылдырылған.

230 мектеп, ондаған супермаркет жабылған, 120-дан астам банкомат істен шыққан.

«Хагибис» тайфуны күншығыс еліне өткен демалыс күндері жеткен еді. Кей өңірлерде екі күн ішінде жауын-шашынның екі айлық мөлшері жауған.

Басты сөздер: Оқиға, Әлем,
Жоғары қарай