Aýa raıy
Astana 1 °S
Almaty 5 °S
valıýta baǵamy
USD 388.81
EUR 429.01
RUB 6.08
CNY 55.49

Almatyda dárigerler alty jasar balanyń asqazanynan 100 teńgelik moneta aldy

2019 jyldyń 18 qazan 2019 15:47

ALMATY. QazAqparat - Almatylyq dárigerler alty jasar balanyń asqazanynan 100 teńgelik tıyndy alyp tastap, jerjańǵaqqa qaqalyp qalǵan eki jasar balanyń ómirin saqtap qaldy, dep habarlaıdy QazAqparat tilshisi.

Balalarǵa arnalǵan medıtsınalyq járdem ortalyǵynyń habarlaýynsha, medıtsınalyq mekemege alty jastaǵy balanyń anasy kelip, ulynyń tıyn jutyp qoıǵanyn aıtyp kómek surǵan.

«Shuǵyl túrde balanyń asqazany rentgenge túsirildi. Rentgen kishkentaı balanyń asqazanynda bóten zat, ıaǵnı 100 teńgelik tıyn bar ekenin kórsetti. Dárigerler operatsııasyz endoskopııalyq jolmen asqazannan bóten zatty shyǵardy. Ota sátti ótti. Búgin bala aýrýhanadan shyǵaryldy»- - dedi jedel járdem bóliminiń bastyǵy Meıirjan Qurmanalıev.

Osy tektes oqıǵa kelesi kúni de qaıtalandy.

«Bizdiń aýrýhanaǵa eki jasar bala keshki ýaqytta tústi. Anasynyń aıtýynsha, balasy jerjańǵaq qosylǵan shokolad jep otyryp qaqalyp qalǵan. Búldirshiniń túni boıy mazasy ketip, ystyǵy kóterilip, tynysy tarylǵan. Nátıjesinde anasy men balasy jedel járdemmen bizdiń aýrýhanaǵa jetkizildi. Balaǵa keýde qýysynyń rentgenografııasy, ókpeniń kompıýterlik tomografııasy, bronhoskopııa jasaldy. Osydan keıin «tynys alý joldarynda bóten zat tur» degen dıagnoz qoıyldy. Tekserý barysynda sol jaq ókpeniń dem almaıtyny anyqtaldy, bul ókpeniń abstsessine ákelý qaýipin tóndirdi », - dedi dáriger.

Dárigerler joǵaryda atalǵan ádisti qoldana otyryp, kishkentaı naýqasqa ýaqtyly kómek kórsetti. Qazir sábıdiń jaǵdaıy jaqsy. Ony aýrýhanadan shyǵarýǵa daıyndap jatyr.

Jalpy, jyl basynan beri shuǵyl kómek kórsetý ortalyǵyna ártúrli zattardy jutyp qoıǵan 120-ǵa jýyq bala júgingen.

Avtor Alma Muqanova
Basty sózder: Almaty, Medıtsına,
Joǵary qaraı