Aýa raıy
Astana 0 °S
Almaty 7 °S
valıýta baǵamy
USD 388.70
EUR 428.70
RUB 6.08
CNY 55.46

Almatyda túrki álemi kınofestıvali ótýde

2019 jyldyń 19 qazan 2019 10:37

ALMATY. QazAqparat - Almatyda Túrki álemi derekti fılmderi IV Halyqaralyq festıvaliniń qazaqstandyq baǵdarlamasy ótýde. Іs-sharany T.Júrgenov atyndaǵy Qazaq ulttyq óner akademııasynyń qoldaýymen Túrki álemi jýrnalısteri federatsııasy jáne ál-Farabı atyndaǵy Qazaq ulttyq ýnıversıteti uıymdastyrdy, dep habarlaıdy QazAqparat.

«Qazan aıynyń basynda Ystanbulda (Túrkııa) ashylǵan kınofestıval bıyl toǵyz qatysýshy eldiń jetekshi seriktes-ýnıversıtetterinde ótip jatyr. Kınofestıvalde Túrkııa, Qazaqstan, Túrikmenstan, Bosnııa jáne Gertsegovına, Qyrǵyzstan, Ázerbaıjan, Ózbekstan, Majarstan, Makedonııa, Kıpr elderiniń úzdik jumystary qatysýda. Fılmder áleýmettik, mádenı, rýhanı jáne qoǵamdyq mańyzdy taqyryptar men jastar tárbıesin qamtıdy», delingen habarlamada.

Sharanyń saltanatty ashylýyna kınematografııanyń ańyzyna aınalǵan, túrki áleminiń tanymal akteri men rejısseri Asanáli Áshimov, Túrki álemi jýrnalıster federatsııasynyń prezıdenti Menderes Demır jáne basqa da sheteldik qurmetti qonaqtar, sondaı-aq kınodokýmentalıster men fılmderdiń avtorlary, qoǵam men mass-medıa ókilderi, Almatynyń stýdentteri qatysty.




«Ortaq túrki murasyn saqtaýǵa, ulttyq erekshelikti nasıhattaýǵa jáne túrkitildes memleketterdiń shyǵarmashylyq ıntegratsııasyn nyǵaıtý isine arnalǵan kınofestıvaldi ótkizý biz úshin úlken mártebe. Derekti kıno ózekti áleýmettik jáne qoǵamdyq mańyzy bar taqyryptardy kótere otyryp, jas urpaq boıynda rýhanı-adamgershilik qundylyqtardy, dúnıetanym men ómirlik baǵyt-baǵdardy damytady», - dep atap ótti sharanyń qonaqtary men qatysýshylaryn qarsy ala otyryp KazUÝ-dyń birinshi prorektory Muhambetqalı Búrkitbaev.

Ol Bakýde (Ázerbaıjan) ótken Túrkitildes memleketterdiń yntymaqtastyǵy keńesiniń 7-shi otyrysynda Qazaqstannyń Tuńǵysh Prezıdenti - Elbasy Nursultan Nazarbaevtyń «Túrki keleshegi - 2040» baǵdarlamasyna mádenıet, bilim jáne jastar saıasatyna arnalǵan sharalardy qosý qajettigi jónindegi paıymdamasymen ushtasatyndyǵyn basa aıtty.

Kınofestıvalde Asanáli Áshimov rýhanı damýǵa shaqyratyn júrekjardy óleńderin oqyp, stýdent jastarǵa úlken sáttilik tiledi.

«Jaqsy oqyńyzdar! Sonda sizder ózderińizge de, elimizge de, halqymyzǵa da úlken paıda ákelesizder. Eńbek etińizder, ozyq bolýǵa talpynyp tyrysyńyzdar, bilimdi bolyńyzdar. Men sizderdi osyǵan shaqyramyn!» - dedi kıno maıtalmany.

«Jyl saıyn festıval óziniń tynysyn keńeıtip bizdiń elderimizdi rýhanı jaqyndastyryp keledi. Bul shara uly túrki oıshyly Ál-Farabıdiń jerinde ótkizilýde, onyń murasy bizdi biriktiredi, ol búkil adamzat úshin qundy. 2020 jyly álem onyń 1 150 jyldyǵyn atap ótpek, bul mańyzdy oqıǵa kelesi kınofestıvaldiń taqyrybynda mindetti túrde kórinis tabatyn bolady», - dep atap ótti Menderes Demır.

Sonymen qatar ol Asanáli Áshimovke álemdik kınematografqa jáne túrki elderiniń mádenı baılanystaryn nyǵaıtýǵa qosqan zor úlesi úshin arnaıy syılyq tabys etti.

Qazaqstandyq baǵdarlamada kınofestıvaldiń fınalyna ótken úzdik stýdenttik jáne kásibı derekti fılmder kórsetiledi.
















Basty sózder: Almaty, Mádenıet, Túrki elderi,
Joǵary qaraı