Aýa raıy
Astana -2 °S
Almaty 0 °S
valıýta baǵamy
USD 389.75
EUR 434.26
RUB 6.12
CNY 55.05

Arysta qaza tapqan áskerılerdiń otbasylaryna qandaı kómek kórsetildi

2019 jyldyń 16 qyrkúıek 2019 12:30

ARYS. QazAqparat – Arys qalasynda bolǵan jarylystan qaza tapqan áskerıler aǵa serjant Baýyrjan Álimbekov pen serjant Ábdiqul Ahmetovtiń týystary marqumdardyń otbasylaryna memleket tarapynan qandaı kómek kórsetilgenin aıtyp berdi, dep habarlaıdy QazAqparat tilshisi.

Marqum Baýyrjan Álimbekovtyń anasy Lázzat Súıindikovanyń aıtýynsha, ajal qushqan jalǵyz ulynyń artynda jary men tórt perzenti qalǵan. Tuńǵyshy 7 jastaǵy qyz bolsa, eń kishkentaıy alty aılyq náreste. Uly áskerı bólimdegi órtti óshiremin dep baqılyq bolǵannan keıin Qorǵanys mınıstrligi jarylystan zaqymdanǵan onyń baspanasyn jóndep bergen. Sonymen qatar, moraldyq jáne materıaldyq kómek kórsetken.

«Balamnyń bes jyldyq jalaqysyn ótemaqy retinde tóledi. Sodan keıin baspana alýǵa qomaqty aqsha aýdardy. Ol qarajatty ýaqyty kelgende úı alý úshin áıeli men balalarynyń atynan «Turǵyn úı qurylys jınaq bankine» saldyq», - deıdi Lázzat Súıindikova.

Jalǵyz ulynan aıyrylǵan ananyń sózinshe, mınıstrlik basshylyǵy, sondaı-aq áskerı bolǵysy kelgen nemerelerin «Jas ulan» mektebine esh kedergisiz jáne emtıhansyz qabyldaıtynyn aıtqan.

Al marqum bolǵan ekinshi áskerı qyzmetshi Ábdiqul Ahmetovtiń artynda jas kelinshegi men jalǵyz qyzy qaldy. Perzenti Aıbıbi endi ǵana bir jastan asqanyna qaramastan, ol ákesin izdeıdi eken. Bul týraly jary Araılym Qadirova aıtyp berdi.

«Meniń kúıeýim áskerı bólimde alty jyldaı qyzmet atqardy. Ol jumysyn óte qatty jaqsy kóretin. Tipti, otbasynan da bıik qoıatyn dep aıtsam bolady. Jumysyna eshqashan keshigip barmaıtyn, eshqashan suranǵan da emes. Sondaı altyn adam bolatyn. Jaman aty shyqqan emes. Qazir bárimiz tús kórgendeı bolyp qaldyq. Qyzy da áskerı formadaǵy adamdardy kórse, ákesin izdeıdi. Kúıeýim de qyzyn jaqsy kóretini sonshalyq, bos ýaqytyn sonymen ótkizýge tyrysatyn edi», - deıdi Á.Ahmetovtiń jary.

Eske salaıyq, Arystaǵy jarylys saldarynan qaza tapqan eki áskerı qyzmetshi memlekettik nagradalarmen marapattalǵan bolatyn. Ótken aptada aǵa serjant Baýyrjan Álimbekov pen serjant Ábdiqul Ahmetovtiń týystaryna Qorǵanys mınıstri Nurlan Ermekbaev ІІ dárejeli «Aıbyn» ordenderin tabys etti.








Avtor Aınur Aqbaeva
Basty sózder: Túrkistan oblysy, Ásker, Arys,
Joǵary qaraı