Aýa raıy
Astana 29 °S
Almaty 37 °S
valıýta baǵamy
USD 383.98
EUR 430.63
RUB 6.11
CNY 55.83

Arystaǵy apattyń aýyrtpalyǵyn Qazaqstan halqy jumylyp kóterýde

2019 jyldyń 25 maýsym 2019 15:29 518

NUR-SULTAN. QazAqparat - Arystaǵy apattan zardap shekken turǵyndarǵa Qazaqstan halqy jan-jaqtan kómek kórsetip jatyr. Osy rette «QazAqparat» HAA jasalyp jatqan jatqan ıgi isterdiń toptamasyn usynady.

Keshe Arystaǵy jarylystan zardap shekkenderge kómek qolyn sozý maqsatynda elimiz boıynsha  «Arys, biz birgemiz» aktsııasy bastalǵan bolatyn.  Eldiń ishki birligi synalar tusta jurt aıanyp qalǵan joq. Aktsııaǵa ún qosýǵa barlyq óńirler asyǵýda. Áýeli Arys qalasyna Qaraǵandy oblysynan áýe kemeleri arqyly 10 tonna azyq-túlik pen kıim-keshek joldanǵan bolatyn.  Ortaq isten eldegi kásipkerler de shet qalmaı alǵashqylardyń biri bolyp kómek qolyn sozdy. Atameken» UKP Basqarma tóraǵasynyń orynbasary Oljas Ordabaevtyń aıtýynsha, kásipkerik sektor da qoǵamnyń bir bólshegi retinde el bolyp jumylǵan bul sharadan tys qalmaıdy.


«Kásipkerler de belsendi qatysyp jatyr. Shymkent, Túrkistan qalasynyń kásipkerleri alǵashqy mınýttardan kómek kórsetip, halyqpen birge ekenin kórsetti.  Al Shymkent qalasyndaǵy «Intertıch» emhanasy júginýshilerge tegin qyzmet kórsetti», - dedi ol «Arys, biz birgemiz» telemarafony barysynda. Al búgin Túrkistan oblysynyń kásipkerleri men «Atameken» UKP óńirlik keńesiniń músheleri zardap shekkenderge medıtsınalyq jáne psıhologııalyq kómekter uıymdastyryp jatyr. Túrkistan qalasynda 300 adamǵa arnalǵan oryn daıyndaldy. Qazir kelgen adamdardy ornalastyryp, olarǵa  medıntsınalyq jáne psıhologııalyq kómek kórsetilýde.


Túrkistan oblysy men Shymkent qalasyndaǵy Qazaqstan halqy Assambleıasynyń ókilderi bolsa, birlesken shtab quryp, arnaıy Arys qalasynan kóshirilgen azamattardyń barlyǵyna kómek kórsetý jumystaryn júrgizip jatyr. 

Koreı mádenı ortalyǵy Arys qalasyna túske deıin 1 gazel taǵammen sý jiberse, slavıan mádenı ortalyqtary 5 avtobýs pen 2 júk kóligin joldaǵan. Shtab qurylǵannan keıin Túrkistan oblysy men Shymkent qalasyndaǵy Qazaqstan halqy Assambleıasynyń mádenı ortalyqtarynyń barlyǵy kómekke jumyla kirisip jatyr. Qazirgi ýaqytta QHA ókilderiniń jasaqtaýymen ashylǵan 15 orynda halyq qabyldanyp, kómek kórsetilip jatyr. Túrkistan oblysynyń densaýlyq saqtaý basqarmasy qysyltaıań shaqta 14 jedel járdem kóligin kómekke jibergen Jambyl oblysy men  Shymkent Shymkent qalasynyń ákimdigine alǵys aıtyp otyr. Túrkistan oblysynyń dárigerleri arystyqtarǵa shıpaly emnen bólek qarjylaı kómek berýdi de jón dep taýypty. Oblystyq dárigerler qaýymdastyǵy «Túrkistan» áleýmettik damý korporatıvtik qoryna 1 kúndik jalaqylaryn aýdarǵan.

Eldegi joǵary oqý oryndary da alǵashqylardyń biri bolyp aktsııaǵa úles qosyp jatyr.  Qazaq ulttyq qyzdar pedagogıkalyq ýnıversıteti men  Muhtar Áýezov atyndaǵy Ońtústik Qazaqstan memlekettik ýnıversıtetiniń ujymdary Arystaǵy aǵaıynǵa bir kúndik eńbekaqylaryn aýdardy.

Nur-Sultan qalasynyń ákimdigi Arys qalasynyń 500 balasyn barlyq qajetti zattarmen, kıimmen, aıaq kıimmen, mektepke qajet qural-jabdyqtarmen qamtamasyz etip, bir aıǵa jazǵy lagerge jiberetini málimdedi.  Qalanyń zardap shekken taǵy 1000 balasyna jazǵy demalysty L.Gýmılev atyndaǵy Eýrazııa ulttyq ýnıversıteti uıymdastyrady.



null

«Munda ne bolǵanyn estigende boıymdy qorqynysh bıledi. Ásirese qorǵansyz qalǵan balalar úshin, analar úshin janym aýyrdy. Men qazir jyly kórpesheler, balalardyń kıimderin ákeldim». Bul Almaty qalasynda ashylǵan gýmanıtarlyq kómek qabyldaý pýnkteriniń biri úles qosa kelgen Mádına Sáken esimdi turǵynnyń sózi. Bul shaharda qazirdiń ózinde eki birdeı kómek qabyldaıtyn oryn jumys istep tur. 

Apat kesirinen Qyzylordadaǵy temirjol stantsııalarynda kidirgen jolaýshylarǵa jergilikti halyq demeý bolyp jatyr.  Qyzylordalyqtar qańtarylǵan  5 poıyzdaǵy 1200-ge jýyq jolaýshyǵa ystyq tamaq pen salqyn sýdy tegin taratqan. Sondaı-aq,  15 jolaýshyǵa medıtsınalyq kómek kórsetildi.


null 

Elden qalmaı saqshylar da biraýyzdan bir kúndik eńbekaqylaryn Arystaǵy aǵaıynǵa joldaǵan. 

Jastyq jigerin jaqsylyq jasaýǵa baǵyttap júrgen eriktiler bul joly da el kóńilinen shyǵa bildi. Olardyń belsendi áreketin Arysqa arnaıy barǵan memleket basshysy qasym-Jomart Toqaev ta atap ótti. 

«Arys turǵyndarynyń ıgiligi jolyndaǵy aýqymdy ári paıdaly eńbekteri úshin barlyq volonterlerge rızashylyq bildiremin. Zardap shekkenderdiń jaǵdaıy shynymen de qıyn. Memleket olarǵa kómek beredi. Qala men turǵyn úılerdi qaıta qalpyna keltiremiz», - dep jazdy Prezıdent twitter paraqshasynda.

Jaıyqtaǵy aǵaıyn da arystyqtarǵa tezdetip kómek joldaý úshin judyryqtaı jumylyp jatyr. Oral qalasynda úsh jerde kómek kórsetý ortalyqtary ashyldy. Qazirgi ýaqytta osy oryndarda (N.Nazarbaev dańǵyly, 188, 1-qabat, 101-kabınet, Qadyr Myrza Álı, 18, 3-qabat, «Bastaý» kovorkıng ortalyǵy jáne J.Moldaǵalıev kóshesi, 19, 1-qabat, 109-kabınet) Arys turǵyndaryna asa qajetti zattar jınaqtalýda. 

Atyraý oblysynyń memlekettik qyzmetshileri  men SІM ujymy da  bir kúndik jalaqylaryn Arystyń zardap shekken turǵyndaryna aýdaratynyn habarlady.

Atyraý men Altaıdan , Arqa men Alataýǵa deıingi qazaq dalasynyń tutas aýmaǵyn qamtyǵan «Arys, bir birgemiz» aktsııasy jalǵasyp jatyr.

 

 

Avtor Esimjan Naqtybaı
Basty sózder: Jaqsylyq jasa, Arys,
Joǵary qaraı