Aýa raıy
Astana 10 °S
Almaty 8 °S
valıýta baǵamy
USD 385.42
EUR 424.58
RUB 6.00
CNY 54.31

Berdibek Saparbaev Premer-Mınıstrdiń orynbasary laýazymyna taǵaıyndaldy

2019 jyldyń 20 tamyz 2019 10:40

NUR-SULTAN. QazAqparat - Berdibek Saparbaev QR Premer-Mınıstriniń orynbasary laýazymyna taǵaıyndaldy, dep habarlady Aqordanyń baspasóz qyzmeti.

B.M. Saparbaevty Qazaqstan Respýblıkasy Premer-Mınıstriniń orynbasary qyzmetine taǵaıyndaý týraly

Berdibek Mashbekuly Saparbaev Qazaqstan Respýblıkasy Premer-Mınıstriniń orynbasary bolyp taǵaıyndalsyn, ol Qazaqstan Respýblıkasynyń Eńbek jáne halyqty áleýmettik qorǵaý mınıstri qyzmetinen bosatylsyn.

Qazaqstan Respýblıkasynyń Prezıdenti Q.Toqaev

***

Buǵan deıin Májiliste Áleýmettik-mádenı damý komıtetiniń otyrysy ótti. Onda depýtattar Qazaqstan Respýblıkasy Premer-Mınıstriniń orynbasary laýazymyna taǵaıyndaý úshin Berdibek Saparbaevtyń kandıdatýrasyna kelisim berdi. Bul másele «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasy Konstıtýtsııalyq zańynyń 22-1-babyna sáıkes qaraldy. Kandıdatýrany Qazaqstan Respýblıkasy Premer-Mınıstriniń tapsyrmasy boıynsha Premer-Mınıstr Keńsesiniń basshysy Ǵalymjan Qoıshybaev usynyp, B. Saparbaevtyń mol tájirıbesi men kásibı biliktigin atap ótti.

Qazaqstan Respýblıkasy Parlamenti Májilisi Áleýmettik-mádenı damý komıteti otyrysynyń qorytyndysy boıynsha Qazaqstan Respýblıkasy Parlamentiniń Májilisi «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasy Konstıtýtsııalyq zańynyń 22-1-babyna sáıkes Qazaqstan Respýblıkasynyń Premer-Mınıstri usynǵan Qazaqstan Respýblıkasy Premer-Mınıstriniń orynbasary laýazymyna Berdibek Mashbekuly Saparbaevty taǵaıyndaý úshin usynyldy.

Otyrys sońynda depýtattar kandıdatqa aldaǵy jumysynda tabys tiledi.

***

Berdibek Máshbekuly SAPARBAEV 1953 jyly 9 aqpanda dúnıege keldi.

Qyzylorda oblysynyń Jańaqorǵan aýdanynyń Besaryq aýylynyń týmasy, bilimi joǵary. 1977 jyly Almaty Halyq sharýashylyǵy ınstıtýtyn «Ekonomıka jáne materıaldyq-tehnıkalyq jabdyqtaý» mamandyǵy boıynsha bitirdi. Ekonomıka ǵylymdarynyń doktory, professor.

Eńbek jolyn Qyzylorda oblysynyń Zadarınskıı sovhozynyń jumysshysynan bastady (1969-1971 jyldary); áskerı qyzmetin ótkerdi (1971-1973 jyldary). Instıtýtty bitirisimen Respýblıkalyq memlekettik eńbek jınaqtaý kassalary (gostrýdsberkassy) basqarmasynda ekonomıst (1977); QazKSR Qarjymıninde ekonomıst, aǵa ekonomıst, jetekshi, bas ekonomıst, bólim bastyǵynyń orynbasary (1977-1988 jyldary); josparlaý-qarjy basqarmasynyń bastyǵy, Bas ekonomıka basqarmasynyń bastyǵy, Qazaqstan Respýblıkasy Bilim mınıstriniń orynbasary (1988-1993 jyldary); Prezıdent Apparaty bólimi men Qazaqstan Respýblıkasy Mınıstrleri kabıneti meńgerýshisiniń orynbasary (1993); Qazaqstan Respýblıkasy Mınıstrler kabınetiniń Іster basqarmasynyń Qarjy, eńbek jáne áleýmettik qorǵaý bólimi meńgerýshisiniń orynbasary jáne meńgerýshisi (1994-1995 jyldary) boldy.

Qazaqstan Respýblıkasy Mınıstrler kabıneti Apparatynyń basshysy (1995); Qyzylorda oblysynyń ákimi (1995-1999 jyldary); Ońtústik Qazaqstan oblysynyń ákimi (1999-2002 jyldary) qyzmetterin atqardy;

Qazaqstan Respýblıkasy Kedendik baqylaý agenttiginiń tóraǵasy, Qazaqstan Respýblıkasy Qarjy vıtse-mınıstri - Kedendik baqylaý komıtetiniń tóraǵasy (2002-2006); Premer-Mınıstr Keńsesi basshysynyń orynbasary - Qazaqstan Respýblıkasy Parlamentindegi Úkimettiń Ókili (2006-2007); Qazaqstan Respýblıkasynyń Ekonomıka jáne bıýdjettik josparlaý vıtse-mınıstri (2007 jyly aqpan - 27 tamyz). 2007 jyldyń tamyzynan Qazaqstan Respýblıkasynyń Eńbek jáne halyqty áleýmettik qorǵaý mınıstri. 2009-2014 jyldary - Shyǵys Qazaqstan oblysynyń ákimi. 2014-2015 jyldary Qazaqstan Respýblıkasy Premer-Mınıstriniń orynbasary. 2015-2019 jyldary Aqtóbe oblysynyń ákimi qyzmetin atqardy.

«Qurmet» (1999), «Parasat» (2007) ordenderimen, «Astana» (1998), «Qazaqstan Respýblıkasynyń táýelsizdigine 10 jyl» (2001), «Qazaqstan Respýblıkasynyń Konstıtýtsııasyna 10 jyl» (2005) medaldarymen marapattalǵan.

QR Eńbek jáne áleýmettik qorǵaý mınıstri laýazymyn 2019 jyldyń aqpanynan beri atqaryp keldi.

Aıta keteıik, osyǵan deıin Gúlshara Naýshaqyzy Ábdiqalyqovanyń Qazaqstan Respýblıkasy Premer-Mınıstriniń orynbasary qyzmetinen bosatylǵandyǵyn jáne Parlament Májilisiniń depýtaty laýazymyna taǵaıyndalǵandyǵyn jazǵan bolatynbyz.

Basty sózder: Aqorda, QR Úkimeti, Taǵaıyndaý,
Joǵary qaraı