Aýa raıy
Astana 1 °S
Almaty 0 °S
valıýta baǵamy
USD 388.81
EUR 429.01
RUB 6.08
CNY 55.49

Berlınde 700 mln eýrony quraıtyn ınvestıtsııalyq jobanyń kelisimine qol qoıyldy

2019 jyldyń 9 qazan 2019 05:30

BERLIN. QazAqparat – Linde Gas, SMS Group, CLAAS Group, Barit Gmbh jáne taǵy basqa kompanııalarmen yntymaqtastyq perspektıvalary talqylanǵan Qazaqstan-Germanııa bıznes-forýmy alańyndaǵy kelissózder aıasynda 700 mln. eýro kóleminde ınvestıtsııa salý jónindegi kelisimderge qol jetkizildi.

QR Syrtqy ister mınıstrliginiń álimetterine qaraǵanda, tıisti jobalardy júzege asyrý týraly qujattarǵa 2019 jylǵy jeloqsanda Qazaqstan Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary aıasynda qol qoıylý josparlanýda.

Forýmǵa eki eldiń 200-den astam isker toptar ókilderi qatysty. Іs-shara barysynda perspektıvasy bar saýda-ekonomıkalyq, ınvestıtsııalyq jobalar talqylandy, ózara tıimdi seriktestikke arnalǵan jańa múmkindikter men salalar tanystyryldy.

Premer-Mınıstrdiń orynbasary Roman Sklıar bastaǵan Qazaqstan delegatsııasynyń quramynda QR Syrtqy ister mınıstriniń orynbasary Ermek Kósherbaev, Ekologııa, geologııa jáne tabıǵı resýrstar vıtse-mınıstri Sanjar Jarkeshov, Saýda jáne ıntegratsııa vıtse-mınıstri Azamat Asqaruly, sondaı-aq «Báıterek» holdıngi, «Samuryq-Qazyna» qory, beıindik memlekettik organdar, oblys ákimshilikteri, ulttyq kompanııalar men bıznes ókilderi boldy.

«Ekonomıkalyq damýdyń shıkizattyq vektorynan alystaý úshin Qazaqstan otandyq ekonomıkany jańǵyrtý men ındýstrıalandyrýdy qolǵa aldy. Jańa saıasattyń irgetasy ındýstrıaldy-ınnovatsııalyq jáne «jasyl» ekonomıka negizderin qurý bolyp tabylady. Bul turǵyda qazaqstandyq kásipkerlerdiń maqsaty jańa tehnologııalar men ınnovatsııalar salasyndaǵy kóshbasshy retinde Germanııa kompanııalarymen seriktestik ornatý bolýy tıis. Tsıfrlyq tehnologııany, sondaı-aq Indýstrııa 4.0 elementterin engize otyryp qurylatyn jańa salalardy damytý asa ózekti», - dedi QR Úkimeti basshysynyń orynbasary R.Sklıar.

Búgingi tańda Germanııa – Qazaqstannyń aldyńǵy qatarly syrtqy ekonomıkalyq seriktesteriniń biri. Sońǵy 14 jylda nemis kompanııalary Qazaqstan ekonomıkasyna 5 mlrd. AQSh dollary shamasynda ınvestıtsııa saldy. Nemis statıstıkalyq vedomstvosynyń málimetine sáıkes, 2018 jyldyń qorytyndysy boıynsha saýda aınalymy 8,6 mlrd. eýrony qurap, tarıhı joǵary kórsetkishke jetken.

Odan basqa qazirgi ýaqytta Qazaqstanda Germanııa kapıtalynyń qatystýymen 900-den astam kompanııa qyzmet etýde. Sondaı kompanııalardyń biri – tehnıkalyq gaz óndirýmen aınalysatyn Linde Group kompanııasy tolyǵymen óz esebinen 300 mln. dollar kóleminde kapıtal salýdy qamtamasyz etý arqyly tikeleı ınvestıtsııalardy júzege asyryp jatqandyqtan, úlgili ınvestor bolyp sanalady.

«Búgingi Qazaqstan – tıimdi bıznes júrgizý úshin jańa múmkindik. Qazaqstanǵa arnalǵan ósý boljamy tańqalarlyq. Mysaly, EADB boljamy boıynsha 2019 jyly JІÓ 3,5%-ǵa ósýi múmkin. 2020 jylǵa arnalǵan boljamdar da Qazaqstannyń Eýrazııalyq ekonomıkalyq odaqtaǵy ósý qozǵaltqyshy ekenin kórsetedi. Oń baǵyttaǵy damý Qazaqstan-Germanııa ekonomıkalyq qatynastaryna jaǵymdy yqpal etkenine biz qýanyshtymyz. Jyldyń birinshi jartysynda taýar aınalymy 2,7 mlrd eýrony qurady. Germanııanyń Ortalyq Azııa aımaǵyndaǵy saýdasynyń 80%-y burynǵydaı Qazaqstanǵa tıesili», - dedi German ekonomıkasy Shyǵys komıtetiniń basqarma múshesi, «Knaýf» kompanııasynyń Bas seriktesi Manfred Grýndke.

Sonymen qatar Qazaqstan tarapy German ekonomıkasynyń Shyǵys komıtetimen birlesip, «Saýda-ekonomıkalyq yntymaqtastyqtyń Jol kartasy» jobasyn ázirledi. Investıtsııalyq jobalar tizimin qamtıtyn bul qujatqa Memleket basshysynyń aldaǵy sapary aıasynda qol qoıý josparlanýda.

«Bul forým Qazaqstan men Germanııanyń saıası, ekonomıkalyq jáne sarapshy top ókilderi úshin tıimdi alań boldy. Qazaqstan ınvestııalyq klımatty jaqsartýǵa baǵyttalǵan reformalardy birtindep jasaýda. Kásipkerlermen ashyq dıalog ornatylyp, ınvestıtsııa tartý úshin ınfraqurylym jetildirilýde. Jaqyn ýaqytta forým alańynda qol jetkizilgen kelissózder nátıjesinde jańa birlesken kásiporyndar, óndiris oryndary iske qosylatyndyǵyna senimdimin», - dedi «Kazakh Invest» UK» AQ táýelsiz dırektory Ýlf Vokýrka is-sharanyń paneldi sessııasynda sóılegen sózinde.

Forým barysynda sondaı-aq «Qazaqstan jáne Germanııa: jańa baǵyttar, jańa ónerkásip, jańa yntymaqtastyq», «Jańa ekonomıka jáne óndiristi tsıfrlandyrý», «Azyq-túlik qaýipsizdigin qamtamasyz etý salasyndaǵy Qazaqstan-Germanııa yntymaqtastyǵy», «Geologııalyq barlaý, jańa energetıka jáne ónerkásipti ekologııalandyrý» taqyryptarynda tórt paneldik talqylaý ótip, taraptar IoT («zattar ınterneti»), logıstıka, energetıka, agroónerkásip kesheni, geologııalyq barlaý, ekonomıka, ónerkásip pen qala ınfraqurylymyn tsıfrlandyrý men ekologııalandyrý, bilim berý jáne qazaqstandyq kadrlardyń biliktiligin arttyrý sııaqty ózekti baǵyttar boıynsha pikir almasty.

Pikirtalas qorytyndysy boıynsha taraptar Qazaqstan – Germanııa bıznesiniń Ortalyq Azııadaǵy senimdi seriktesi ári bizdiń elimiz EO-nyń OA-ǵa arnalǵan jańa Strategııasyn júzege asyrý, Eýropa men Azııa qarym-qatynasy jónindegi EO Strategııasy aıasynda, sondaı-aq «Beldeý jáne Jol» bastamasy boıynsha eýropalyq elderdiń ekonomıkalyq múddesine jetekshi bolýy múmkin degen pikirge keldi.

Qazaqstan-Germanııa bıznes-forýmy QR Syrtqy ister Mınıstriligi, «Kazakh Invest» UK» AQ, GFR-daǵy QR Elshiligi jáne German ekonomıkasynyń Shyǵys komıtetimen uıymdastyryldy.

Joǵary qaraı