Aýa raıy
Astana -2 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Elbasynyń qurmetti tóraǵa atanýyna oraı túrik basylymdary ne jazyp jatyr

2019 jyldyń 25 mamyr 2019 15:49

NUR-SULTAN. QazAqparat - Nursultan Nazarbaevtyń kóshbasshylyǵymen Qazaqstan áleýmettik, mádenı jáne ekonomıkalyq turǵydan damydy, beıbitshilik jáne kelisim prıntsıpterine negizdele otyryp, kórshiles eldermen baılanystaryn nyǵaıtty, sondaı-aq, halyqaralyq arenadaǵy salmaǵyn arttyra tústi. Bul týraly túriktiń tanymal BAQ ókilderi jazdy, dep habarlaıdy QazAqparat.

Eske sala keteıik, keshe Elbasy Nursultan Nazarbaev Túrki keńesiniń qurmetti tóraǵasy atanǵan bolatyn. Túrkııa Respýblıkasynyń Prezıdenti Rejep Taııp Erdoǵannyń usynýymen jáne Túrki keńesine múshe elderdiń maquldaýymen Qazaqstannyń Tuńǵysh Prezıdenti Nursultan Nazarbaevqa Túrki keńesiniń ómir boıǵy qurmetti tóraǵasy mártebesi berildi. Bul týraly Túrkııa Respýblıkasynyń Syrtqy ister mınıstri Mevlıýt Chavýshoglý 24 mamyr kúngi Elbasymen kezdesýinde málimdedi. M. Chavýshoglý Aqsaqal, Elbasy Nursultan Nazarbaevtyń qazaq halqynyń ıgiligi jolyndaǵy kóregendigin árqashan joǵary baǵalaǵanyn aıta otyryp, «Túrkııa men Qazaqstan arasyndaǵy baılanystardy damytýdaǵy kóshbasshylyǵy, eńbegi men kóregendigi úshin ózine taǵy da úlken alǵys bildiremiz» dedi.

Anadolý agenttiginiń jazýynsha, Nazarbaevtyń kóshbasshylyǵymen Qazaqstan áleýmettik, mádenı jáne ekonomıkalyq turǵydan damydy, beıbitshilik jáne kelisim prıntsıpterine negizdele otyryp, kórshiles eldermen baılanystaryn nyǵaıtty, sondaı-aq, halyqaralyq arenadaǵy salmaǵyn arttyra tústi. ıAdrolyq qarýdan bas tartý, AÓSShK-n qurý, BUU Qaýipsizdik Keńesi músheligi sııaqty bastamalarymen kózge túsken Qazaqstan búginde Eýrazııa keńistiginiń mańyzdy oıynshysyna jáne halyqaralyq qaýymdastyqtyń bedeli joǵary múshesine aınalǵan.

Jańalyqty Túrkııanyń birqatar gazetteri men aqparattyq portaldary jarııalady. Atap aıtqanda, túrik basylymdary N. Nazarbaevtyń Qazaqstannyń ǵana emes, Túrki áleminiń lıderi ekenin, onyń kúlli túrki jurtyn birlestirý jolynda mańyzdy qadamdar jasaǵanyn jazýda. Olar Túrki áleminiń Aqsaqaly atanyp ketken N. Nazarbaevtyń Túrki keńesiniń dem berýshisi jáne 1992 jyldan beri ótkizilgen 15 Túrki memleket basshylary sammıtiniń barlyǵyna múltiksiz qatysqan jalǵyz kóshbasshy ekendigine nazar aýdardy. Nazarbaevtyń «Uly dalanyń jeti qyry» baǵdarlamalyq maqalasyn jarııalaýy men qazaq tilin latyn álipbıine kóshirý týraly sheshiminiń Túrki álemin odan saıyn jaqyndastyrýǵa baǵyttalǵan strategııalyq qadamdar ekendiginiń asty syzylýda.

Óz kezeginde, Túrkııanyń belgili sarapshylary da jańalyqqa qatysty pikirlerin bildirýde. Máselen, saıasattanýshy, professor K. Zorlý men Eýrazııa jazýshylar odaǵynyń basshysy ıA. Omeroglý Nursultan Nazarbaevqa qurmetti tóraǵa ataǵynyń berilýine baılanysty qýanyshtaryn bólisip, Túrki keńesi men Túrki áleminiń osy qadamnan keıin kúsheıe túskenine jáne jaýapkershiliginiń arta túskenine nazar aýdardy.

Joǵary qaraı