Aýa raıy
Astana -3 °S
Almaty 15 °S
valıýta baǵamy
USD 389.98
EUR 434.01
RUB 6.10
CNY 55.04

Eraly Toǵjanov Kásipodaqtar federatsııasynyń tóraǵasy bolyp saılandy

2019 jyldyń 16 qyrkúıek 2019 18:03

NUR-SULTAN. QazAqparat – Eraly Toǵjanov QR Kásipodaqtar federatsııasynyń tóraǵasy bolyp saılandy, dep habarlaıdy QazAqparat federatsııanyń baspasóz qyzmetine silteme jasap.

«Elordada QR Kásipodaqtar federatsııasynda Bas keńestiń otyrysy ótti. Otyrysta federatsııa basshysy Baqytjan Ábdiraıym basqa qyzmetke aýysýyna baılanysty QR Kásipodaqtar federatsııasynyń tóraǵasy ókilettigin toqtatty», delingen habarlamada.

Elbasy Nursultan Nazarbaev QRKF kezekten tys XXV sezinde kásipodaqtardyń jetistikterin joǵary baǵalap, Kásipodaqtar federatsııasy qazaqstandyqtardy Tórtinshi ónerkásiptik revolıýtsııanyń jańa sharttaryna áleýmettik beıimdeý úshin qozǵaýshy kúsh bolýy tıistigin atap ótken bolatyn.

Bas keńestiń músheleri QRKF tóraǵasy laýazymyna 2 kandıdatýrany - belgili qoǵam jáne saıası qaıratker Eraly Toǵjanovtyń jáne «Qazaqstandyq temirjol, avtokólik, áýe jáne sý kóligi qyzmetkerleriniń salalyq kásipodaǵy» QB tóraǵasy Orazǵalı Ahmetbaevtyń kandıdatýrasyn usyndy.

QR Kásipodaqtar federatsııasynyń Jarǵysyna sáıkes balama negizde ótken daýys berý nátıjesinde Eraly Toǵjanov QR Kásipodaqtar federatsııasynyń tóraǵasy bolyp saılandy.

1963 jyly 13 mamyrda Eraly Luqpanuly Toǵjanov Batys Qazaqstan oblysynda týǵan. 1988 jyly E.A.Bóketov atyndaǵy Qaraǵandy memlekettik ýnıversıtetin bitirdi. 1988 jyldan 1991 jylǵa deıin E.A.Bóketov atyndaǵy Qaraǵandy memlekettik ýnıversıtetiniń Memleket jáne quqyq teorııasy men tarıhy kafedrasynyń oqytýshysy bolyp qyzmet atqardy. 1991 jyldan 1994 jylǵa deıin - QR Ǵylym akademııasynyń Memleket jáne quqyq ınstıtýtynyń aspıranty. 1994 jyldan 1996 jylǵa deıin - QR Ǵylym akademııasy Memleket jáne quqyq ınstıtýtynyń ǵylymı qyzmetkeri. 1996 jyldan 1997 jylǵa deıin - Qazaq gýmanıtarlyq-zań ýnıversıtetiniń aǵa oqytýshysy, Memlekettik qyzmet jáne halyqaralyq quqyq fakýlteti dekanynyń orynbasary. 1997 jyldan 1999 jylǵa deıin - Qazaq gýmanıtarlyq-zań ýnıversıtetiniń Halyqaralyq quqyq fakýltetiniń dekany. 1999 jyldan 2001 jylǵa deıin Qazaq gýmanıtarlyq-zań ýnıversıtetiniń Astana qalasyndaǵy fılıalynyń dırektory, Quqyq jáne memlekettik qyzmet ınstıtýtynyń dırektory bolyp qyzmet atqardy. 2001 jyldan 2006 jylǵa deıin - Qaraǵandy oblysy ákiminiń orynbasary. 2006 jyldan 2008 jylǵa deıin Qazaqstan Respýblıkasy Ádilet mınıstrliginiń Din isteri komıtetiniń tóraǵasy bolyp qyzmet atqardy.

2008 jyly aqpannan bastap 2017 jyldyń naýryzyna deıin Qazaqstan halqy Assambleıasy Tóraǵasynyń orynbasary qyzmetin atqardy, Al qyrkúıekten bastap QR Prezıdenti Ákimshiliginiń Qazaqstan halqy Assambleıasy Hatshylyǵynyń meńgerýshisi bolyp taǵaıyndaldy.

2017 jyly naýryz aıynan 2019 jyldyń maýsym aıyna deıin Mańǵystaý oblysynyń ákimi qyzmetin atqardy.

Zań ǵylymdarynyń kandıdaty. Saıasattaný ǵylymdarynyń doktory. 2007 jyly «Eren eńbegi úshin» medalimen marapattalǵan.

Joǵary qaraı