Aýa raıy
Astana -2 °S
Almaty 4 °S
valıýta baǵamy
USD 389.98
EUR 434.01
RUB 6.10
CNY 55.04

Qostanaı oblysynyń áleýmettik nysandary qysqy maýsymǵa daıyn

2019 jyldyń 16 qyrkúıek 2019 15:58

QOSTANAI. QazAqparat – Oblys ákimi Arhımed Muhambetovtiń tóraǵalyq etýimen ótken selektorlyq keńeste óńirdik aldaǵy jylý maýsymyna daıyndyǵy talqylandy, dep habarlaıdy QazAqparat tilshisi.

Oblystyq energetıka jáne turmystyq-kommýnaldyq sharýashylyq basqarmasynyń basshysy Almat Isenbaevtyń aıtýynsha, jańa jylý maýsymyna daıyndyq aıasynda josparlanǵan mindetterdiń barlyǵy júzege asyrylǵan. Qazir óńirde 736 derbes jylý júıesi men 105 qazandyq jylý taratýǵa saqadaı saı tur. Jylý maýsymyna daıyndyq barysynda 18,4 shaqyrym jylý júıesi jáne 95,7 shaqyrym sý qubyry jóndeýden ótken. Keıbir eldi mekenderde jylý qubyrlarynyń birazy egistik alqaptary arqyly ótedi. Olarǵa kúzgi jıyn-terin jumystary aıaqtalǵan soń jóndeý júrgiziledi.

«Oblystaǵy áleýmettik nysandar men turǵyn-úıler de kúz-qys maýsymyna tolyǵymen daıyn. Bıyl áleýmettik nysandarǵa jylý taratatyn 125 qazandyq jóndeýden ótken. Jalpy, óńirde 377,6 myń tonna kómir qory bar. Jylý maýsymy aıaqtalǵansha barlyǵy 485,1 myń tonna kómir jaǵylady dep kútilýde», - dedi basqarma basshysy.

Oblys ákimi Jangeldın, Qamysty, Qarasý, Meńdiqara, Beıimbet Maılın, Naýyrzym aýdandarynyń ákimderine bıýdjettik mekemelerge kómir jetkizýdi jedeldetýdi tapsyrdy.

«Qysqy otyn qoryn daıyndaý barysyna, ásirese, shalǵaı aýdandar muqııat qaraýy kerek. 7 nemese 10 kúnge jetetin kómir jınap qoıdyq degen áńgime bolmasyn. Kómir qory kem degende 1 aıǵa jetetin bolsyn. Qysta aýa raıy buzylyp, jol jabylyp qalyp jatsa, kommýnaldyq mekeme qyzmetkerlerine aýyr tıedi. Sondyqtan kómir qoryn mol qamdap alý kerek. Aýdan ákimderine qazirden bastap eskertemin. Buǵan tikeleı jaýap beresizder. Aýdandar men aýyldarda kómir jetkilikti bolýy kerek», - dedi oblys ákimi Arhımed Muhambetov.

Sonymen qatar Arqalyq qalasyna mazýt jetkizý barysy da josparly túrde júzege asyrylyp jatyr. Arqalyqta byltyrǵy maýsymnan qalǵan 1,84 myń tonna mazýt bar. Qalǵan mazýt qazan aıynan bastap aldaǵy jyldyń aqpanyna deıin josparly túrde jetkiziledi.

Jıynda jylý aqysynyń ýaqytyly tólenbeý sebepteri de sóz boldy. Búginde turǵyndardyń jylý kompanııalaryna bereshegi 244 mln teńgege jetken. Oblys ákimi bereshektiń búginge deıin 30% ǵana ótelgenin, bul kommýnaldyq mekemelerdiń jumysyna keri yqpal etetinin aıtty. Tıisinshe, jaýapty organ basshylaryna qaryzdy óndirý sharalaryn qatańdatýdy tapsyrdy.


Joǵary qaraı