Aýa raıy
Astana -8 °S
Almaty -3 °S
valıýta baǵamy
USD 389.34
EUR 428.78
RUB 6.05
CNY 55.45

Qostanaıda dástúrli án oryndaýshylarynyń baıqaýy ótip jatyr

2019 jyldyń 17 qazan 2019 10:13

QOSTANAI. QazAqparat – Qostanaı aýdanynyń «Altyn dán» mádenıet úıinde ataqty aqyn Nurjan Naýshabaıulynyń 160 jyldyǵyna arnalǵan І respýblıkalyq dástúrli án oryndaýshylary baıqaýy ótip jatyr, dep habarlaıdy QazAqparat.

Bul baıqaýǵa Qostanaı oblysynan bólek, Semeı, Almaty, Nur-Sultan, Jezqazǵan, Kókshetaý qalalarynan 15 úmitker keldi. Belgili jyraý, Qazaqstannyń eńbek sińirgen qaıratkeri Almas Almatov, QR mádenıet qaıratkeri Aqylbek Shaıahmet, QR mádenıet salasynyń úzdigi Batyrbek Baınazarov, Halyqaralyq jáne respýblıkalyq baıqaýlardyń laýreaty Manapbek Qadirov, Nurjan Naýshabaev atyndaǵy Zatobol mektep-gımnazııasy dırektorynyń orynbasary Nurzııa Sarjanovalar bastaǵan qazylar alqasy baıqaý jeńimpazdaryn anyqtaıdy. Oblystyq mádenıet basqarmasynyń basshysy Erlan Qalmaqovtyń sózinshe, bul shara dástúrli túrde ótkizilýi múmkin. «Nurjan Naýshabaıulynyń ómir joly, shyǵarmashylyǵy halyq kókeıinde bolǵanymen, solaqaı saıasattyń yqpalymen sol bir jyldary tasada qalyp jatty. El egemendigin alǵan ýaqyttan beri óńirimizde Naýshabaıulynyń ádebı murasyn jańǵyrtýǵa birqatar sharalar qabyldanǵan edi. Máselen, Qostanaı aýdany ortalyǵyndaǵy mektepke, el aǵalarynyń atsalysýymen, Nurjannyń esimi berildi. Al búgingi shara sol ıgilikti bastamalardyń dara jalǵasy», - deıdi basqarma basshysy. Án saıysynda Nurjan Naýshabaıulynyń ǵana emes, Estaıdyń, Ásettiń, Mádıdiń, Ahmettiń shyǵarmalary da shyrqaldy. «Baıqaý sharty boıynsha qatysýshylar mindetti túrde Nurjan babamyzdyń bir ánin jáne halyq ánderi men halyq kompozıtorlarynyń bir shyǵarmasyn oryndaýy kerek. Ánshi-jyrshylardyń arasynda osaly joq, bári óz óńiriniń myqtylary. Alǵashqy kúni-aq úzdikter anyqtala bastaıdy ǵoı. Qatysýshylardyń ándi durys tańdaýy qýantady», - deıdi qazylar alqasynyń múshesi Batyrbek Baınazarov. Baıqaýdyń birinshi kúni Nurjan Naýshabaıulynyń el arasynda keń tarala qoımaǵan «Kóńil ashar», «Bátımaǵa», «Kókenaı», «Asyl-aı», «Ara-aı», «Jan sáýlem» jáne «Nazymy» qatar shyǵarmalary oryndaldy. Respýblıkalyq dástúrli án oryndaýshylar baıqaýynyń ІІ kezeńi búgin ótedi.










Joǵary qaraı