Aýa raıy
Astana -3 °S
Almaty 4 °S
valıýta baǵamy
USD 389.34
EUR 428.78
RUB 6.05
CNY 55.45

QR Kásipodaqtar Federatsııasy Atyraýdaǵy jaǵdaıǵa baılanysty málimdeme jasady

2019 jyldyń 16 qazan 2019 19:12

NUR-SULTAN. QazAqparat - QR Kásipodaqtar Federatsııasynyń Atyraýdaǵy medıtsına qyzmetkerleriniń jaǵdaıyna baılanysty resmı málimdeme jasady, dep habarlaıdy QazAqparat Qazaqstan Respýblıkasynyń Kásipodaqtar federatsııasyna silteme jasap.

«Qazaqstan Respýblıkasynyń Kásipodaqtar Federatsııasy Atyraýdaǵy perınataldyq ortalyqta nárestesinen aırylǵan otbasyna taǵy da qaıǵyryp kóńil aıtady. Bul fakt qoǵamda úlken rezonans týdyrdy. Qazir aıyptylar qamaýǵa alynyp, tergeý júrgizilip jatyr. Arnaıy memlekettik komıssııa jumys isteýde. Bul iste sońǵy núkteni tek sot qana qoıa alady»,-delingen habarlamada.

Osy jaǵdaıǵa baılanysty qoǵam synyna medıtsına salasynyń barlyq qyzmetkerleri ilikti. Bul oqıǵa týraly aqparat BAQ arqyly taralyp, qoǵamdy dúrliktirdi. Densaýlyq saqtaý basqarmasynyń basshylyǵy, medıtsınalyq mekemeniń 31 qyzmetkeri óz erikterimen jumystan ketý týraly aryz jazýǵa jáne el Prezıdenti Qasym-Jomart Toqaevqa úndeý joldaýǵa májbúr boldy.

Memleket basshysy Qazaqstan Halqyna Joldaýynda tolyq kólemde saqtalýy mindetti kinásizdik prezýmptsııasy týraly óz pikirin bildirip, azamattardyń konstıtýtsııalyq quqyǵyn qorǵaý máselesi aıryqsha baqylaýǵa alyný mańyzdylyǵyn atap ótken bolatyn.

Qazaqstan Respýblıkasynyń Kásipodaqtar Federatsııasy Atyraýdaǵy jaǵdaıdy birinshi kúnnen bastap baqylaýda ustap otyr jáne óz mıssııasyna sáıkes Densaýlyq saqtaý mınıstrliginiń basshylyǵy men basqa da atqarýshy organdarǵa densaýlyq saqtaý salasy qyzmetkerleriniń quqyǵyn buzatyn sharalardy qabyldaýdan bas tartýǵa shaqyrady.

Federatsııa bul azamattardyń quqyǵy men múddesin qorǵaýdy odan ári jalǵastyrady. Mundaı mindet federatsııanyń aýmaqtyq bólimi men memlekettik qyzmetkerlerdiń salalyq kásipodaǵynyń aldyna da qoıylyp otyr.

«Qazaqstan Respýblıkasynyń Kásipodaqtar Federatsııasy memlekettik jáne atqarýshy organdardyń tarapynan aldyn-ala jasalǵan aıyptaý mánindegi málimdemeler orynsyz ekenin jáne jumysshylardyń, memlekettik, azamattyq qyzmetkerlerdiń konstıtýtsııalyq quqyǵynyń qorǵalýyna kúmán keltiretinin atap ótedi.

Qazaqstan Respýblıkasynyń Kásipodaqtar Federatsııasy barlyq azamattyq qoǵam men memlekettik basqarý ınstıtýttaryn áleýmettik shıelenis pen ýákiletti organǵa BAQ arqyly da qysym jasaýǵa alyp keletin is-qımyl úshin jaýapkershilikke tartylýy múmkin ekendigin este saqtaýǵa shaqyrady»,-delingen málimdemede.

Basty sózder: Atyraý oblysy, Medıtsına, Oqıǵa, Qoǵam,
Joǵary qaraı