Aýa raıy
Astana -1 °S
Almaty 1 °S
valıýta baǵamy
USD 389.75
EUR 434.26
RUB 6.12
CNY 55.05

Muǵalimder, depýtattar jáne sportshylar «Eki juldyz» jobasynda án salady

2019 jyldyń 17 qyrkúıek 2019 21:00

NUR-SULTAN. QazAqparat – 21 qyrkúıekten bastap Qazaqstan ulttyq arnasynan «Eki juldyz» jobasy qaıta efırge shyǵady, dep habarlaıdy QazAqparat telearnanyń baspasóz qyzmetine silteme jasap.

«Eki juldyz» shoýynda tanymal ánshiler men ózge salanyń mamandary án aıtyp qana qoımaı, eń myqty jup retinde jeńiske jetýge talpynady. Qatysýshylar arasynda belgili sportshylar, kıno jáne teatr akterleri, depýtat, ustaz, aıtysker aqyn, kásipker men telejúrgizýshiler bar.

Atap aıtqanda, jobadan akter, QR Halyq ártisi Doshan Joljaqsynov, QR Halyq ártisi, teatr jáne kıno akteri Tuńǵyshbaı Jamanqulov, QR Parlamenti Májilisiniń depýtaty Merýert Qazbekova, aıtysker aqyn Dıdar Qamıev, telejúrgizýshiler Áıkerim Esenáli, Qaragóz Súleımenova, kásipker Larıon Lıan, boksshy, Olımpıada júldegeri Ádilbek Nııazymbetov, taekvondoshy Sevda Alıeva, qazaq tili pániniń muǵalimi Sergeı Vorontsov, teatr jáne kıno akterleri Qaırat Ádilgereı, Mereke Qalbaeva, Gúlbahram Ahat, Dáýren Aıdarqulov, Táýekel Músilim, Darıǵa Badyqova jáne Berik Tursynbekovtyń ónerin tamashalaýǵa bolady.

Olarmen juptasyp, básekege túsetin estrada juldyzdary qatarynda Ushqyn Jamalbek, Aqbota Kerimbekova, Aqbota Nur, Jiger Aýypbaev, Qýandyq Rahym, Nurbolat Abdýllın, Serik Ibragımov, Zarına Altynbaeva, Jubanysh Jeksenuly, Aıgúl Imanbaeva, Saltanat Baqaeva, Ǵazızhan Shekerbekov, Jeńis Ysqaqova, Baljan Bıdash pen «Slavıan bazarynan» júldemen oralǵan Ernar Sadyrbaev bar.

Ár kezeń túrli taqyryptarǵa bólingen - ulttyq mýzykadaǵy aıryqsha tulǵa Shámshi Qaldaıaqovtyń jáne ańyzǵa aınalǵan «Dos-Muqasan» ansambliniń ánderi «Eki juldyz» sahnasynda shyrqalady.

«Qatysýshylardyń óneri úsh adamnan quralǵan qazylar alqasynyń jáne zalda otyrǵan kórermenniń arnaıy mobıldi qosymsha arqyly bergen daýys sanymen baǵalanady. Qazylar alqasy men kórermenniń daýysy 50/50 paıyz quqyqqa ıe. Ár baǵdarlama saıyn eń az qoldaýǵa ıe bolǵan bir jup jobamen qosh aıtysady. Qazylar alqasynyń turaqty múshesi - Qazaqstannyń Eńbek sińirgen qaıratkeri, ánshi Tolqyn Zabırova», - delingen telearnanyń resmı habarlamada.

Baǵdarlama 21 qyrkúıekten bastap ár senbi saıyn 21:00-de kórsetiledi.

Eske sala ketsek, qyrkúıek aıynda ulttyq arnanyń 61-shi maýsymy ashylǵan bolatyn. Jańa maýsymda Qazaqstan arnasynan 14 jańa joba efırge shyǵady. Osyǵan deıin kórermen yqylasyna bólenip úlgergen 10 baǵdarlama jańasha formatta qaıta usynyldy.


Avtor Aıjan Serikjanqyzy
Basty sózder: BAQ, Óner,
Joǵary qaraı