Aýa raıy
Astana 11 °S
Almaty 17 °S
valıýta baǵamy
USD 389.52
EUR 429.21
RUB 6.07
CNY 54.94

Myrzataı Joldasbekov jerlesterimen júzdesti

2019 jyldyń 12 qyrkúıek 2019 02:11

TARAZ. QazAqparat – Memleket jáne qoǵam qaıratkeri Myrzataı Joldasbekov týǵan jeri Taraz óńirine kelip, jerlesterimen júzdesti, dep habarlaıdy QazAqparat.

Oblystyq mádenıet, arhıvter jáne qujattama basqarmasynyń uıymdastyrýymen Sh.Ýálıhanov atyndaǵy oblystyq ǵylymı-ámbebap kitaphanasynda Memleket qaıratkeri, ǵylym doktory, professor, belgili dıplomat, ádebıetshi-ǵalym Myrzataı Joldasbekovpen rýhanı kezdesý ótti. Basqosýda áńgime arqaýyna aınalǵan taqyryp – oblystyń 80 jyldyǵyna oraı jaryq kóretin kóptomdyqtyń daıyndalý barysy boldy.

Jambyl oblysynyń 80 jyldyǵy qarsańynda kóptomdyq shyǵarý qolǵa alynyp jatqany belgili. Oǵan óńirimizdiń tarıhyna qatysty máselelermen qatar, el aýzynda saqtalǵan derekter toptastyrylmaqshy. Oblystyq memlekettik arhıvtiń muraǵattanýshysy Maqulbek Rysdáýlettiń aıtýynsha, oblys ákimi Asqar Myrzahmetovtiń bastamasymen daıyndalyp jatqan kóptomdyqtyń alǵashqy legi daıyndalyp, baspaǵa jiberilgen. Bul, oblystyń 80 jyldyq mereıtoıyna arnalǵan aıryqsha tartý bolmaq.

Basqosýda eldiń keleshegi, tarıhy, jas urpaqtyń jarqyn bolashaǵy týrasynda keleli áńgimeler aıtyldy. Al Myrzataı Joldasbekov kóptomdyqty ázirleý barysynda asyǵystyqqa jol berýge bolmaıtynyn, bul iske jaýapkershilikpen qaraý kerektigin jetkizdi.

«Jas urpaq eldiń, óńirdiń tarıhyn, óziniń túp tamyryn bilip júrýi tıis. Sondyqtan sizderdiń jasap jatqandaryńyz – alǵys aıtýǵa, qurmet kórsetýge turarlyq izgilikti bastama. Biraq asyqpaý kerek. Jan-jaqty saralap, jeti ret ólshep, bir ret kesken jón. Málimetterdiń burmalanbaýyna nazar aýdaryńyzdar. Bilmegendi suraýdyń eshqandaı da sókettigi joq. Bilmegenderińiz bolsa aqyl-keńes aıtyp, kórgen-túıgenimmen, qolymda bar derektermen bólisýge daıynmyn», – dedi Myrzataı Joldasbekov.




Kezdesýde keleli keńes aıtqan ǵalym óziniń birqatar qundy eńbekterin Sh.Ýálıhanov atyndaǵy oblystyq ǵylymı-ámbebap kitaphanasynyń qoryna syıǵa tartty.

Budan keıin ol Taraz qalasyndaǵy «Móldir» meıramhanasynda óńirdiń belgili tulǵalarymen, zııaly qaýymmen, mádenıet pen óner, ádebıet, rýhanııat salasynyń ókilderimen júzdesti. Jıynda oblys ákimi Asqar Myrzahmetov sóz sóılep, elimiz Táýelsizdiginiń qalyptasý jyldarynda Elbasynyń senimdi serigi bolǵan, kórnekti ǵalym Myrzataı Joldasbekovtiń memlekettiń damýyna qosqan zor úlesine toqtalyp, jerlesteri atynan denine saýlyq, otbasyna amandyq, jumystaryna tabys tiledi.

Sondaı-aq jıynǵa qatysqandardyń barlyǵyna M.Joldasbekovtiń «Táýelsizdik taǵylymy», «Kúnderimniń kýási», «Kindigimdi kesken jurt», «Asyldarym», «Shirkin, dáýren!» kitaptary taratyldy.

Avtor Ǵıbrat Sembaı
Basty sózder: Aımaq, Qoǵam, Ákim, Jambyl oblysy,
Joǵary qaraı