Aýa raıy
Astana -4 °S
Almaty 12 °S
valıýta baǵamy
USD 389.98
EUR 434.01
RUB 6.10
CNY 55.04

Petropavlda zaǵıp jannyń aqshasyn tartyp áketken jigit ustaldy

2019 jyldyń 18 qyrkúıek 2019 15:47

PETROPAVL. QazAqparat – Petropavl qalasynda múmkindigi shekteýli jannyń qolynan aqshasyn tartyp áketken jigitti tártip saqshylary ustady, dep habarlaıdy QazAqparat.

Soltústik Qazaqstan oblysy polıtsııa departamenti baspasóz qyzmetiniń málimetinshe, tártip saqshylaryna Aqqaıyń aýdanynyń 42 jastaǵy turǵyny aryzdanǵan. Ony belgisiz bireý Petropavldaǵy meımanhanalardyń biriniń aldynda tonap ketken.

«Meımanhanadan shyqqan aýyl turǵynynyń qolynda 7 myń teńgesi bolǵan. Oǵan beıtanys adam kelip temeki suraǵan, keıin qolyndaǵy aqshasyn tartyp áketken. Jábirlenýshiniń kózi nashar kóredi, múgedek, sol sebepti qylmyskerdiń túsin tústep bere almady», - deıdi Birinshi polıtsııa bóliminiń jedel ýákilderi.

Dese de, zaǵıp janǵa jasalǵan shabýyl bir saǵatqa jetpeı ashyldy. Polıtseılerge qonaq úıde ornatylǵan syrtqy beınekameralardan alynǵan jazba kómektesti. Tez arada kúdiktiniń túr-álpeti qurastyryldy.

«Іzdestirýge kirisken saqshylardyń jumysy nátıjeli boldy. Kúdikti qolǵa tústi. Ol urlyq jasaǵany úshin buryn sottalǵan Qyzyljar aýdanynyń 23 jastaǵy turǵyny bolyp shyqty», - deıdi Petropavl qalalyq Polıtsııa basqarmasy Birinshi polıtsııa bóliminiń bastyǵy Balabek Jahın.

Atalǵan fakti QR Qylmystyq kodeksiniń 191-baby «Tonaý» boıynsha Sotqa deıingi tergep-tekserýdiń biryńǵaı tizilimine engizildi. Kúdikti eshqaıda ketpeý týraly qolhatpen bosatyldy.


Joǵary qaraı