Aýa raıy
Astana 1 °S
Almaty 5 °S
valıýta baǵamy
USD 388.81
EUR 429.01
RUB 6.08
CNY 55.49

Saparhan Omarov: Astyq baǵasynyń joǵarylaýyna qarsy bola almaımyn

2019 jyldyń 17 qazan 2019 11:31

NUR- SULTAN. QazAqparat – Búgin Parlament Senatynyń jalpy otyrysynda Aýyl sharýashylyǵy mınıstri Saparhan Omarov astyq baǵasynyń ósýine birqatar faktor yqpal etetinin aıtty, dep habarlaıdy QazAqparat tilshisi.

«Ótkende Úkimet otyrysynda qambaǵa 19 mln tonna astyq quıyldy dep málimdedińiz. Biraq beıresmı sarapshylardyń, dıqandardyń jáne ózge de mamandardyń pikiri boıynsha bul kórsetkish anaǵurlym tómen degen málimet aıtylýda. Oǵan dálel retinde qazir astyqqa baǵa kún saıyn ósip bara jatyr», - dedi senator Murat Baqtııaruly QR Aýyl sharýashylyǵy mınıstri Saparhan Omarovqa qarata aıtqan sózinde.

Óz kezeginde mınıstr astyq shyǵymy boıynsha atalǵan málimet óńirlerden jiberilgen aqparatqa súıene otyryp jarııalanǵanyn atap ótti.

«19,1 mln tonna astyq jınaldy dep aıtylǵan málimet jedel aqparat negizinde jarııa etildi. Bul aqparatty biz ár oblystaǵy aýyl sharýashylyǵy basqarmalarynyń bergen málimeti boıynsha aldyq. Budan basqa, bıyldan bastap bizde ónim kólemin tekserý úshin ǵaryshtyq monıtorıng qoldanylýda. Sonyń aıasynda bizde osy astyqtyń jınalǵan kólemi bar», - dedi S. Omarov.

Sonymen qatar, vedomstvo basshysy astyq baǵasynyń ósýi kóp faktorǵa baılanysty ekenin atap ótti.

«Bul jaǵdaı barsha álemdegi astyq naryǵyna baılanysty ekenin atap ótken jón. Munymen qosa, bıyl elimizdegi astyqtyń eki mln tonna kem jınalýy da áser etýde. Bizde ónim kóbirek jınalsa, onyń quny tómendep ketedi, al az bolsa, astyqtyń baǵasy joǵarylaıdy. Búginde astyq baǵasynyń joǵarylaýyna qarsy bola almaımyn. Óıtkeni árbir sharýa óziniń shyǵarǵan ónimine laıyqty baǵa alýy kerek», - dedi Saparhan Omarov.

Budan buryn habarlanǵandaı, 14 qazanda Úkimet otyrysynda Qazaqstanda 19,1 mln tonna astyq bastyrylǵany aıtyldy.

«2019 jyly egin jınaý jumystary ýaqtyly bastalyp, oblys ákimdikteriniń derekterine sáıkes jalpy dándi daqyldar egilgen 15,2 mln gektardyń 15,1 mln gektarynda ónim jınaldy. 19,1 mln tonna astyq bastyryldy. Bıyl jazdyń ystyq jáne qurǵaq bolýyna baılanysy dándi daqyldar ónimdiligi tómendegenin atap ótkim keledi. Osynyń saldarynan ótken jylmen salystyrǵanda dándi daqyldar óndirisiniń tómendeýi kútilýde», - dedi Aýyl sharýashylyǵy mınıstri.

Joǵary qaraı