Aýa raıy
Astana 11 °S
Almaty 17 °S
valıýta baǵamy
USD 389.52
EUR 429.21
RUB 6.07
CNY 54.94

Shamalǵanda zardap shekken áıel uıyqtap jatqan qyzdarymen avtobýsta qalyp qoıǵan

2019 jyldyń 16 qyrkúıek 2019 19:09

NUR-SULTAN. QazAqparat – Almaty oblysyndaǵy poıyz ben avtobýs apatynda 33 jastaǵy áıel men onyń eki qyzy zardap shekti, dep habarlaıdy QazAqparat «Qazaqstan temir joly» UK» AQ baspasóz qyzmetine silteme jasap.

Zardap shekken áıel «QTJ» UK» AQ qyzmetkeri bolyp shyqty.

«Qazaqstan temir joly» kompanııasy zardap shekken áıeldiń emdelýine, ári qaraı ońalýyna jáne materıaldyq turǵyda barlyq qajetti kómekti kórsetedi. Ol Almaty eksplýatatsııalyq lokomotıv deposynda esepshi bolyp jumys istegen. Temir jol salasynda 14 jyldyq eńbek ótili bar», - delingen resmı habarlamada.

Kompanııanyń habarlaýynsha, otbasy demalystaǵy týystarynan kele jatqan.

«Poıyz soqtyqqansha barlyq jolaýshylar avtobýstyń artqy esiginen shyǵyp úlgergen. Al Elmıra aldynda uıyqtap jatqan eki qyzymen avtobýstan shyǵyp úlgermegen. Qazir olar Qaskeleń qalasyndaǵy Qarasaı aýdandyq ortalyq aýrýhanasynda jansaqtaý bóliminde jatyr. Onyń qyzdary jabyq bas súıek-mı jaraqatyn alǵan. Áıeldiń mıy shaıqalyp, travmatıkalyq shok alǵan, oń qoly, buǵanasy men qabyrǵasy synǵan. Áriptesteri Elmıra men onyń qyzdarynyń saýyǵyp ketýin tileıdi», - dep jazdy baspasóz qyzmeti.

«QTJ» UK» AQ arnaıy komıssııasy oqıǵa ornyna shyqty. Kompanııa basshylyǵy aýrýhana baryp, zardap shekkenderdiń jaı-kúıin surady.

Esterińizge sala keteıik, 15 qyrkúıek kúni Shamalǵan stansasynda poıyz ben avtobýs soqtyǵysty. Jolaýshylar avtobýsy relske shyǵyp ketken.

Oqıǵa ornynda avtobýs júrgizýshisi mert bolyp, taǵy 3 adam Qarasaı aýdandyq aýrýhanasynyń jansaqtaý bólimine jatqyzyldy. Onyń ekeýi bala.

Qazir atalǵan fakti boıynsha QR QK 345-babynyń 3-tarmaǵy boıynsha is qozǵalyp, tergeý júrip jatyr. Іsti Bas kóliktik prokýratýra baqylaýyna aldy.

QR PrezıdentiQasym-Jomart Toqaev poıyz ben avtobýs soqtyǵysynan zardap shekkenderdiń týǵan-týystaryna kóńil aıtty.


Joǵary qaraı