Aýa raıy
Astana 13 °S
Almaty 23 °S
valıýta baǵamy
USD 386.05
EUR 428.25
RUB 5.84
CNY 54.65

Shymkentte menıngıtke shaldyqqandar sany kóbeıip barady

2019 jyldyń 18 shilde 2019 14:30 270

ShYMKENT. QazAqparat – Shymkentte menıngıtke shaldyqqandar sany kóbeıip otyr. Sońǵy alty aıda cerozdy menıngıtti 40 adam juqtyrǵan. Al, 3 naýqasqa menıngokokk ınfektsııasyn juqtyrdy degen dıagnoz qoıylǵan, dep habarlaıdy QazAqparat tilshisi.

Dárigerlerdiń aıtýynsha, menıngıtke ásirese 5 pen 14 jas aralyǵyndaǵy balalar jıi shaldyǵady. Aýrýhanada jatqan naýqastardyń arasynda menıngokokk ınfektsııasyn juqtyrǵan 2 jasóspirim bar. Mı qurty aýrýynyń bulaısha órship ketýine, shilińgir shildeniń ystyǵy da sebep bolǵan. 

Máselen, osy aýrýdy juqtyrǵan 7 jasar balanyń ákesi Baǵdat Úmbetálıev aptap ystyqta balasy haýyzǵa shomylǵanyn aıtady. Al, keshkisin balasynyń basy aýyryp, toqtaýsyz qusqan. Dene qyzýy 39 gradýsqa deıin kóterilgen soń jedel járdemmen aýrýhanaǵa jetkizgen.

«Dene qyzýy túspegen soń, jedel járdem shaqyryp, aýrýhanaǵa alyp keldik. Bizge dıagnozyn menıngıt dep qoıdy. Óte joǵary, juqpaly túri deıdi. Bul aýrýdyń qaıdan kelgenin bilmeımiz. Sýdan ba, kúnnen be, salqyn tıdi me? Basseınge barǵan, sodan ba dep oılap otyrmyz»,- deıdi qala turǵyny.

Mamandardyń aıtýynsha, bul kesel mı men julynnyń jumsaq qabyqtarynyń qabynýynan týyndaıdy. Kópshilik oryndarda tazalyq saqtalmaýynyń saldary adam ólimine deıin ákelipp soǵýy ábden múmkin.

«Bizde jaz mezgilinde enterovırýsty cerozdy menıngıt jıi bolady. Negizinde olar jazda jasóspirim balalarda kóp bolady. Óıtkeni, olar jabyq basseınderge kóp barady. Ol jaqtaǵy sý eshqaıda aqpaıdy, bir jerde turyp qalady. Sol jerlerde serozdy menıngıt juqtyrady. Eger balanyń dene qyzýy kóterilse, basy aýyryp, qussa, tez arada dárigerge kórsetý kerek. Ol aýrý bir kúnde biline bermeıdi, keı balalar eki-úsh kúnnen keıin aýyrady. Keıde birden bastalyp ketedi»,- deıdi Shymkent qalalyq juqpaly aýrýlar aýrýhanasynyń bólim meńgerýshisi Janar Jaıyqbaeva.

 

Avtor Aınur Aqbaeva
Basty sózder: Medıtsına, Oqıǵa, Shymkent,
Joǵary qaraı