Aýa raıy
Astana 23 °S
Almaty 22 °S
valıýta baǵamy
USD 385.42
EUR 424.58
RUB 6.00
CNY 54.31

Shymkenttegi ýnıversıtetti tekserýden keıin úsh is qozǵaldy

2019 jyldyń 21 tamyz 2019 01:27

NUR-SULTAN. QazAqparat – QR Bilim jáne ǵylym mınıstrliginiń jospardan tys tekserýinen keıin Shymkenttegi ýnıversıtette úsh is qozǵaldy, dep habarlaıdy QazAqparat mınıstrliktiń baspasóz qyzmetine silteme jasap.

«2019 jylǵy 5-15 tamyz aralyǵynda QR Bilim jáne ǵylym mınıstrligi Shymkent qalasynyń aımaqtyq áleýmettik-ınnovatsııalyq ýnıversıtetinde jospardan tys tekserý júrgizgen bolatyn. Atalǵan oqý ornynda joǵary oqý oryndarynyń qyzmetine qoıylatyn 78 talaptyń 63-i saqtalmaǵandyǵy anyqtalyp otyr», delingen habarlamada.

Tekserý barysynda birqatar buzýshylyq anyqtalǵan.

«Atap aıtsaq joǵary jáne joǵary oqý ornynan keıingi bilim berýdiń memlekettik standartynyń talaptary buzylǵan; joǵary oqý oryndary qyzmetiniń úlgilik erejeleriniń talaptary saqtalmaǵan; joǵary oqý oryndarynyń bilim berý qyzmetin lıtsenzııalaý kezinde qoıylatyn biliktilik talaptaryna sáıkessizdik faktileri anyqtalǵan. Sondaı-aq, oqýǵa qabyldaý tártibin, bilim alýshylardy aýystyrý jáne qaıta qabyldaý tártibin, akademııalyq demalys berý tártibin saqtamaý faktileri áshkerelenip otyr», delingen habarlamada.

Sabaqqa qatyspaǵan birqatar stýdentterdiń synaq-emtıhan sessııasyna qatysý faktileri belgili bolǵan.

«Bul rette, atalǵan stýdentter ýnıversıtetke aqsha tóleı otyryp, sessııaǵa jiberilgen. Vedomost qaǵazdarynda stýdenttiń baǵasy kórsetilmegen, alaıda oqytýshynyń qoly qoıylǵan bos baǵandar bar.

Tipti basqa aımaqtarda turyp jatqan jáne basqa uıymdardyń qyzmetkerleri bolyp tabylatyn adamdardyń ýnıversıtettiń shtattyq qyzmetkerleri bolyp qyzmet etip júrý faktileri anyqtalyp otyr», delingen habarlamada.

Sonymen qatar, Bilim jáne ǵylym mınıstrligine ýnıversıtet túlekterin jumysqa ornalastyrý deńgeıi týraly jalǵan málimetter berilip otyrǵan. Mysaly, 2018 jyly jumysqa ornalasý deńgeıi naqty 34,4 paıyzdy quraǵanymen, ýnıversıtet tarapynan kelgen resmı esepterde 71,3 paıyz bolyp kórsetilgen.

Bilim berý salasyndaǵy zańnamany buzý faktileri boıynsha mınıstrlik ýnıversıtetke qatysty 3 ákimshilik quqyq buzýshylyq týraly is qozǵady: joǵary oqý oryndary qyzmetiniń úlgilik erejelerin buzǵany úshin, memlekettik bilim berý standartyn saqtamaǵany úshin jáne lıtsenzııalyq talaptarǵa sáıkes kelmegeni úshin. Búgingi tańda bilim berý salasyndaǵy Zańnamany buzýshylyqtardy joıý týraly uıǵarym shyǵaryldy.

Endigi kezekte ákimshilik óndiris materıaldary osy jyldyń 23 tamyzynda qaralatyn bolady. ÁQBtK-niń osy baptarynyń sanktsııalary ákimshilik aıyppul salýdy, sondaı-aq lıtsenzııanyń qoldanylýyn 6 aıǵa deıingi merzimge toqtatýdy kózdeıdi.

Mınıstrlik qabyldanǵan sharalar týraly qosymsha habarlaıtyn bolady.

Joǵary qaraı