Aýa raıy
Astana 15 °S
Almaty 21 °S
valıýta baǵamy
USD 386.91
EUR 428.81
RUB 5.79
CNY 54.79

Júıeli túrde para alyp kelgen densaýlyq saqtaý salasynyń sheneýnikteri ustaldy

2019 jyldyń 18 shilde 2019 14:19 532

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi densaýlyq saqtaý salasyndaǵy jemqorlyq faktilerin jarııalady, dep habarlaıdy QazAqparat tilshisi.

Agenttiktiń habarlaýynsha, sońǵy úsh jarym jylda Qazaqstannyń densaýlyq saqtaý salasynda 400-den astam jemqorlyq faktisi anyqtalǵan. 191 adam jaýapqa tartylyp, 90 adam sottaldy. Qylmystyń basym kópshiligi Túrkistan, Qyzylorda, Pavlodar jáne Batys Qazaqstan oblystarynda tirkelgen.

«QR Densaýlyq saqtaý mınıstrligi men oǵan qarasty uıymdardyń qyzmetkerlerine qatysty 226 jemqorlyq faktisi tirkelgen. Onyń 90% Taýarlar men qyzmetterdiń qaýipsizdigi men sapasyn baqylaý komıtetine jáne onyń bólimshelerine tıesili. Saraptamaǵa sáıkes, zańǵa qarsy áreketter medıtsınalyq buıymdar men dárilik zattar, naýqastarǵa azyq-túlik alýdaǵy jymqyrýmen baılanysty. Qyzmetke alýdaǵy «qamqorlyq», ústemeaqy taǵaıyndaý, múgedektik, zańsyz eńbekaqy tóleý syndy baqylaý-ruqsat berý fýnktsııalaryn atqarýda jemqorlyq jıi kezdesedi», - deıdi agenttik.

Medıtsınalyq qyzmet tólemi komıtetiniń Pavlodar oblysyndaǵy departamentiniń basshysy Qazanǵapov pen onyń orynbasary Aqanaeva bıýdjet qarajatyn bólý boıynsha óńirdegi medıtsınalyq uıymdardan júıeli túrde para alyp kelgen.

Medıtsınalyq qyzmet tólemi komıteti Túrkistan oblystyq departamentiniń basshysy Qalybekova jáne bólim basshysy Jumaqov qamqorlyq pen esepti tabysty ótkizý úshin oblystaǵy medıtsınalyq uıymdardan birneshe ret para alǵan.

Nashaqorlyqtyń medıtsınalyq-sanıtarlyq máseleleri respýblıkalyq ǵylymı-tájirıbelik ortalyǵynyń dırektory mindetin atqarýshy Imanberdıev «Salamatty Qazaqstan» memlekettik baǵdarlamasyn júzege asyrýǵa bólingen bıýdjet qarajatyn jymqyryp kelgen, memlekettik satyp alý kelisimsharttarynyń baǵasyn joǵary etip kórsetken.

Almaty qalasy Densaýlyq saqtaý basqarmasynyń basshysy bolǵan Mýsınov qaramaǵyndaǵylarmen birigip, prokýratýra qyzmetkerine dárilik zattar shyǵynyn tekserýin oń qorytyndylaý úshin 25 myń dollar para bergen.

Mańǵystaý oblysy densaýlyq saqtaý basqarmasynyń basshysy Qadyr ózine baǵynyshty uıymdardan júıeli túrde para alyp kelgen.

Astana medıtsınalyq ýnıversıtetiniń ortalyq dırektory Álıjanov bas esepshi Tasemenovamen birigip, tegin medıtsınalyq kómektiń kepildendirilgen kólemine bólingen memlekettik bıýdjetten 36 mln 600 myń teńge jymqyrǵan.

Qyzylorda oblysy tutynýshylardy qorǵaý departamenti basshysynyń mindetin atqarǵan oblystyń bas sanıtarlyq dárigeri Turǵanbekov aýdandyq basqarma basshylarynan 30-50 myń teńge aralyǵynda júıeli túrde para alyp keldi degen kúdikke ilindi.

Joǵary qaraı