Aýa raıy
Astana 26 °S
Almaty 26 °S
valıýta baǵamy
USD 385.42
EUR 424.58
RUB 6.00
CNY 54.31

Zııaly qaýym Abaıǵa arnalǵan rýhanı-taǵylymdyq sharada bas qosty

2019 jyldyń 23 tamyz 2019 13:12

NUR-SULTAN. QazAqparat – Elordada ótken «Abaı álemi» atty rýhanı-taǵylymdyq is-sharada elimizge belgili zııaly qaýym ókilderi, abaıtanýshylar men qala ákimdiginiń ókilderi bas qosty, dep habarlaıdy QazAqparat tilshisi.

Aldymen, Qazaqstan Jazýshylar odaǵynyń tóraǵasy, aqyn Ulyqbek Esdáýlet, elorda ákiminiń orynbasary Baqtııar Máken bastaǵan sharaǵa qatysýshylar Abaı Qunanbaıulynyń eskertkishine gúl shoqtaryn qoıdy. Qurmanǵazynyń «Saryarqa» kúıi oryndalǵannan keıin Baqtııar Máken jınalǵandardy aıtýly merekeli kúnimen quttyqtady.




«Uly Abaı – qazaq halqynyń ulttyq bolmysy, bet-beınesi. Abaı men qazaq búgin de egiz uǵymǵa aınaldy. Abaı dańǵyly, Abaı sózi, Abaı qalyptastyrǵan adamdyq formýlasy, rýhanı-ádebı mektebi osy kúni halyqtyń aınasyna, eldik murasyna negizdelip, qazaq sóziniń sınonımi sekildi úlken mánge ıe boldy. Ýaqyt ótken saıyn Abaı murasy týǵan eliniń ulttyq minberine shyǵyp, tuǵyrlanyp keledi. Abaı H á kimniń qara sózderi – ǵıbraty mol qazyna ekenin ýaqyt pen tarıhtyń ózi dáleldedi. Uly Abaıdyń qara sózderi búgin de urpaqtyń jadynda jańǵyryp tur. Bıyldan bastap qazaq elinde bas aqynnyń 175 jyldyǵyna daıyndyq jumystary bastalyp ketti. QR Prezıdenti Qasym-Jomart Toqaevtyń áleýmettik jeli arqyly Abaı óleńderinen úzindi oqý estafetasyn zor qýanyshpen barlyq el qoldap, danyshpan Abaıdyń 175 jyldyǵyn atap ótýi kerektigi jóninde bastama kóterdi. Qazir bul estafeta búkil respýblıka deńgeıinde júrip jatyr», - dedi ol.




Osydan keıin ortaǵa Prezıdent Qasym-Jomart Toqaevqa Abaı óleńinen úzindi oqý estafestasyn joldaǵan Láılim-Shyraq Erlanqyzy shyǵyp, Abaıdyń «Ǵylym tappaı maqtanba» óleńin oqyp berdi. Máneri erek oqýshynyń ónerine tánti bolǵan qala ákiminiń orynbasary B.Máken Láılim-Shyraqqa aqynnyń kitabynyń birin syıǵa tartty. Dástúrli ánshi Erlan Rysqalı shyrqaǵan Abaıdyń «Segizaıaǵy» jınalǵan jurtshylyqtyń kóńilin kóterip jiberdi.




«Qazaqtyń kemeńgeri, ǵulamasy, aqyl-oıdyń qol jetpes munarasy dep aıtatuǵyn Abaı atamyzdy biz Paıǵambarǵa teńeımiz. Paıǵambar bolǵanda ol kisi dinniń Paıǵambary emes, dildiń, tildiń, poezııanyń Paıǵambary. Bizdiń ultymyz, qoǵamymyz sońǵy ǵasyrdyń kóleminde qandaı jetistikterge qol jetkizse, sonyń barlyǵynda Abaı atamyzdyń úlesi bar dep aıtýǵa bolar edi. Parasat, paıym, adamgershilik, izgilik, ıman, qaıyrymdylyq, meıirimdilik deıtin izgi uǵymdardyń barlyǵy da ananyń sútimen, ákeniń tárbıesimen qosa osy Abaıdyń jyrymen birge urpaqtyń qanyna enip, janyna daryp jatyr dep aıtar edik», - dedi óz sózinde Qazaqstan Jazýshylar o daǵynyń tóraǵasy, aqyn Ulyqbek Esdáýlet.

U . Esdáýlet óz sózinde Abaıdyń 175 jyldyǵyna úlken daıyndyq júrip jatqanyn tilge tıek etti.




«Abaıdyń 175 jyldyǵyn toılaý jóninde Jarlyqqa qol qoıǵan Prezıdentimiz Qasym-Jomart Kemelulynyń bir óziniń bıliktegi basshylyq jumysyn osy Abaıdyń basyna baryp zııarat etkendeı, Abaıdyń aldyna baryp júgingendeı, Abaıdan bata alǵandaı ıgi shara dep qabyldadyq. Abaıdyń 175 jyldyǵy keń kólemde atalyp óteıin dep jatyr. Abaıdyń shyǵarmalary álemniń 10 tiline jańadan aýdarylmaqshy. Burynǵy 125, 150 jyldyǵynda basqa tilde shyqqan kitaptary bar. Dese de, ol kezde Abaıdy bir ǵana orys tilinen aýdarǵan. Endi árbir shet tilderine tikeleı qazaq tilinen aýdarý qolǵa alynyp jatyr. Osy qalanyń da ákimine aldyn ala rahmet aıtqymyz keledi. Osy sol jaǵalaýdan Qalamgerler alleıasy ashylaıyn dep jatyr. Qalamgerler alleıasy aınalyp kelgende aqyndar men jazýshylardyń alleıasy. Jazýshylar odaǵynyń osyndaǵy fılıalyna Shubardan eki qabattyq ǵımarat berilmek. Meniń oıymsha, qalamgerlerge kórsetilgen qurmet – Abaı atamyzǵa kórsetilgen qurmet, Abaıdyń izbasarlarlaryna kórsetilgen qurmet dep sanaımyn», - dep túıdi sózin Ulyqbek Esdáýlet.

Aıta ketsek, QR Prezıdenti mamyr aıynda Abaıdyń 175 jyldyq mereıtoıy týraly Jarlyqqa qol qoıǵan bolatyn.










Joǵary qaraı