今日天气
阿斯塔纳 +7 °С
阿拉木图 +14 °С
今日坚戈汇率
USD 421.58
EUR 496.83
RUB 5.53
CNY 62.20

جازدا شەتەلدە الاڭسىز دەمالعىسى كەلەتىندەر ۆاكسينا العانى ءجون - ەرلان قياسوۆ

15 六月 2021 19:14

نۇر-سۇلتان. قازاقپارات - الەم ەلدەرىن ىندەتتىڭ قايتا تارالۋى الاڭداتىپ وتىر.

COVID-19 ۆيرۋسىنىڭ ءۇشىنشى تولقىنى قاۋپى تۋىندادى. بۇل جايىندا ق ر باس مەملەكەتتىك سانيتاريا دارىگەرى ەرلان قياسوۆ ءمالىم ەتتى، دەپ حابارلايدى قازاقپارات.

باس سانيتاردىڭ ايتۋىنشا، اسىرەسە، ۆاكسيناتسيا دەڭگەيى باياۋ ەلدەردە ۆيرۋس جۇقتىرۋ كورسەتكىشى كۇرت ارتقان.

«جەر جۇزىندە 176 ميلليوننان استام ادام ۆيرۋس جۇقتىردى، كۇن سايىن 290 مىڭنان اسا جاڭا دەرەك تىركەلىپ وتىر. 3,8 ميلليوننان استام ادام كوز جۇمدى. قازاقستانمەن شەكارالاس ايماقتاردا قالىپتاسقان قاۋىپتى جاعداي ءبىزدى الاڭداتىپ وتىر. رەسەي مەن قىرعىزستاندا اۋرۋ تارالۋ كورسەتكىشى وتكەن جىلدان دا اسىپ ءتۇستى»، - دەيدى ەرلان قياسوۆ.

ونىڭ سوزىنە سەنسەك، قازاقستاندا قازىر ەپيدەميولوگيالىق احۋال تۇراقتى، تۇرعىندار اراسىندا ۆيرۋس جۇقتىرۋ تومەندەگەن.

«الايدا، جاز ايلارىندا ءبىزدىڭ كوپتەگەن وتانداستارىمىز الىس-جاقىنداعى شەت مەملەكەتتەرگە بارىپ دەمالۋعا اعىلادى. سونىڭ ىشىندە، covid-19-دىڭ تارالۋى بويىنشا ەپيدەميولوگيالىق احۋالى الاڭداتاتىن ەلدەر دە بار. مۇنى ەسكەرمەۋگە بولمايدى. شەتەلدە دەمالۋعا نيەتتى ازاماتتاردى ءوزىنىڭ جانە جاقىندارىنىڭ قاۋىپسىزدىگىن قامتاماسىز ەتۋگە شاقىرامىن. ۆاكسيناتسيا ءسىزدىڭ اعزاڭىزدىڭ ۆيرۋسقا قارسى قورعانىشىن قامتاماسىز ەتىپ، ساياحاتتى قاۋىپسىز وتكىزۋگە مۇمكىندىك بەرەدى. جازعى دەمالىستى الاڭداماي، ويداعىداي وتكىزۋ ءۇشىن COVID-19 عا قارسى ەكپە الىڭىز. ۆاكسيناتسيا سىزگە اۋەجايدا ەش قيىندىقسىز ەلگە ورالۋىڭىزعا، ءارى ءسىز بەن جاقىندارىڭىزدىڭ ءوزىن قاۋىپسىز سەزىنۋىنە مۇمكىندىك بەرەدى» دەپ ەسكەرتەدى باس سانيتاريا دارىگەرى ەرلان قياسوۆ.

回到顶部