今日天气
阿斯塔纳 +7 °С
阿拉木图 +14 °С
今日坚戈汇率
USD 421.58
EUR 496.83
RUB 5.53
CNY 62.20

قازاقستان پرەزيدەنتى ي ى ۇ-نىڭ عىلىم جانە تەحنولوگيا جونىندەگى سامميتىنە قاتىستى

16 六月 2021 18:17

نۇر-سۇلتان. قازاقپارات - قاسىم- جومارت توقايەۆ يسلام ىنتىماقتاستىعى ۇيىمىنىڭ (ي ى ۇ) عىلىم جانە تەحنولوگيا جونىندەگى ەكىنشى ءسامميتىنىڭ اشىلۋ راسىمىنە بەينە بايلانىس ارقىلى قاتىستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

«عىلىم، تەحنولوگيا جانە يننوۆاتسيا: جاڭا بەلەستەرگە جول اشۋ» اتتى تاقىرىپ بويىنشا وتكەن جيىنعا بىرىككەن اراب امىرلىكتەرى ءتوراعالىق ەتتى. قازاقستان پرەزيدەنتى ي ى ۇ- نىڭ عىلىم جانە تەحنولوگيا جونىندەگى العاشقى سامميتىنىڭ ءتوراعاسى رەتىندە ءسوز سويلەپ، بىرىككەن اراب امىرلىكتەرىنە جانە ي ى ۇ باس حاتشىسىنا ۆيرتۋالدى ءسامميتتى ۇيىمداستىرعانى ءۇشىن بارلىق دەلەگاتسيانىڭ اتىنان العىس ءبىلدىردى.





قاسىم-جومارت توقايەۆ قازىرگى جاھاندىق سىن- قاتەرلەر تۋرالى ايتا كەلىپ، ي ى ۇ مەملەكەتتەرى مەن جالپى الەمدى تۇراقتى ءارى وركەندەگەن بولاشاققا قول جەتكىزۋ ءۇشىن ۇيلەسىمدى ءىس- قيمىلدار جۇرگىزۋگە شاقىردى.

مەملەكەت باسشىسى يسلام الەمى عىلىمي وي-سانانىڭ نەگىزى بولعانىن ەسكە سالدى. ونىڭ پايىمداۋىنشا، ۇيىمنىڭ قازىرگى تاريحي مىندەتى ومىردەن وتكەن ۇلى تۇلعالارعا قۇرمەت كورسەتە وتىرىپ، عىلىمي ىلگەرىلەۋ جولىمەن العا قادام باسۋ. پرەزيدەنت ۇلى ويشىل ءابۋ ناسىر ءال-فارابيدىڭ 1150 جىلدىعىنىڭ اتاپ وتىلۋىنە وراي ي ى ۇ- عا مۇشە ەلدەردىڭ سىرتقى ىستەر مينيسترلەرى كەڭەسىنىڭ 47-سەسسياسىندا ارنايى قارار قابىلداعانى ءۇشىن ۇيىم مەملەكەتتەرىنە العىس ءبىلدىردى.

قاسىم-جومارت توقايەۆ العاشقى ءسامميتتىڭ استانا دەكلاراتسياسى مەن 2026 -جىلعا دەيىنگى ي ى ۇ باعدارلاماسىنىڭ جۇزەگە اسىرىلۋى ۇيىمدى ودان ءارى دامىتۋدىڭ وزەكتى ماقساتتارى مەن مىندەتتەرىن دەر كەزىندە ايقىنداۋعا مۇمكىندىك بەرگەنىن اتاپ ءوتتى. وسىعان بايلانىستى مەملەكەت باسشىسى ءبىرقاتار ناقتى ۇسىنىس ايتتى.





پرەزيدەنت پاندەمياعا قارسى كۇرەستەگى ورتاق كۇش-جىگەر تۋرالى ايتا كەلىپ، ۆاكتسينالاردى ءادىل بولۋگە جانە ولاردى ساياسي قۇرال رەتىندە پايدالانۋعا جول بەرمەۋگە شاقىردى. پرەزيدەنت قازاقستاننىڭ كوروناۆيرۋس ىندەتىنە قارسى QazVac ۆاكسيناسىن ازىرلەگەنى جانە ونىڭ قازىرگى ۋاقىتتا د د س ۇ- دا ماقۇلداۋ راسىمىنەن ءوتىپ جاتقانى جونىندە مالىمدەدى.

- قازاقستان ي ى ۇ- عا مۇشە ەلدەرگە گۋمانيتارلىق كومەك رەتىندە ءوز ۆاكتسيناسىن ۇسىنۋعا دايىن بولادى. سونىمەن قاتار ءبىز QazVac ۆاكسيناسىن يسلام ىنتىماقتاستىعى ۇيىمىنا مۇشە وزگە دە ەلدەردە ءوندىرۋ مۇمكىندىگىن قاراستىرا الامىز، - دەدى مەملەكەت باسشىسى.

قاسىم-جومارت توقايەۆ عىلىمي زەرتتەۋلەر مەن ازىرلەمەلەر بويىنشا كەشەندى ءارى زاماناۋي ينفراقۇرىلىمنىڭ بار ەكەنىن اتاپ ءوتىپ، عىلىمي جەتىستىكتەر مەن تەحنولوگيالاردى كەڭ تۇردە بولىسۋگە دايىن ەكەنىن جەتكىزدى. - ءبىزدىڭ اكادەميالىق جانە عىلىمي- زەرتتەۋ ينستيتۋتتارىمىزدىڭ فلاگمانى سانالاتىن نازاربايەۆ ۋنيۆەرسيتەتى، سونداي-اق، Astana IT ورتالىعى جاساندى ينتەللەكت، Big Data جانە كيبەر قاۋىپسىزدىك سالالارىنداعى بىرلەسكەن عىلىمي- زەرتتەۋ جۇمىستارى مەن تاجىريبەلىك- كونسترۋكتورلىق جوبالار ءۇشىن بازا قالىپتاستىرا الادى، - دەدى پرەزيدەنت.





مەملەكەت باسشىسى ي ى ۇ- عا مۇشە ەلدەر ءۇشىن ءبىلىم بەرۋ جانە عىلىمي زەرتتەۋلەر ساپاسىن ارتتىرۋ باستى باسىمدىققا اينالۋى قاجەت ەكەنىن ايتتى. قاسىم- جومارت توقايەۆ 2025 -جىلعا قاراي قازاقستان عىلىم سالاسىنىڭ قارجىلاندىرىلۋ ۇلەسىن ىشكى جالپى ءونىمنىڭ 1 پايىزىنا، ال ءبىلىم بەرۋ ىسىندە 7 پايىزىنا دەيىن ارتتىرۋدى كوزدەپ وتىرعانىن جەتكىزدى. مەملەكەت باسشىسى ي ى ۇ- عا مۇشە ەلدەردىڭ ستۋدەنتتەرى ءۇشىن باكالاۆريات باعدارلاماسى بويىنشا وتاندىق وقۋ ورىندارىندا 100 گرانت بولۋگە دايىن ەكەنىن مالىمدەدى.

قاسىم-جومارت توقايەۆ ءوز سوزىندە ەكونوميكانى تسيفرلاندىرۋ، مەملەكەتتىك قىزمەت كورسەتۋ ساپاسىن جاقسارتۋ، تەڭىزگە شىعاتىن جولى جوق دامۋشى ەلدەر توبىنا قولداۋ كورسەتۋ جۇمىستارىن جالعاستىرۋ ماسەلەسىن دە كوتەردى. سونىمەن قاتار كليماتتىڭ وزگەرۋىنە قارسى كۇرەسكە جانە قورشاعان ورتانى قورعاۋعا، كومىرتەگىنەن ادا ەكونوميكا قالىپتاستىرۋعا باعىتتالعان ەلىمىزدىڭ كۇش- جىگەرى تۋرالى ايتتى. پرەزيدەنت ءوز سوزىندە ەلدەرىمىزدىڭ كەلەشەگى عىلىمي- تەحنيكالىق جانە يننوۆاتسيالىق دامۋ سالاسىنداعى جەتىستىكتەرگە بايلانىستى ەكەنىنە سەنىم ءبىلدىردى.

- يسلام الەمىنىڭ عىلىمي الەۋەتى زور دەگەن ورتاق پىكىردى قولدايمىز. الايدا ادام كاپيتالىن دامىتۋدا، اسىرەسە ساپالى ءبىلىم بەرۋ ىسىندەگى ينۆەستيتسيالاردىڭ كولەمىن ارتتىرۋىمىز قاجەت. سونىمەن قاتار عىلىمي ىقپالداستىعىمىزدى نىعايتىپ، دامىتۋ وتە ماڭىزدى بولىپ وتىر. ءدال وسى شارالاردىڭ ارقاسىندا يسلام الەمىنىڭ عىلىم مەن يننوۆاتسيا سالاسىنداعى ابىرويىن ارتتىرا الامىز، - دەدى مەملەكەت باسشىسى.





قازاقستان پرەزيدەنتى بىرىككەن اراب امىرلىكتەرىنىڭ ۇكىمەتىن جانە حالقىن ەل تاۋەلسىزدىگىنىڭ 50 جىلدىعىمەن جانە «ءال-امال» سپۋتنيگىنىڭ مارس وربيتاسىنا ءساتتى شىعۋىمەن قۇتتىقتادى. سونداي-اق مەملەكەت باسشىسى بۇل جەتىستىكتىڭ بارشا يسلام الەمى ءۇشىن اسا ماڭىزدى ەكەنىن اتاپ ءوتتى.

关键词: الةم,
回到顶部