Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

فۋتبولدان ەۋروپا چەمپيوناتى: جارىستىڭ 1/8 فينالىنا شىققان قۇرامالار انىقتالدى

24 June 2021 08:47

نۇر- سۇلتان. قازاقپارات - فۋتبولدان ەۋروپا چەمپيوناتىنىڭ فينالدىق ساتىسىنىڭ توپتىق كەزەڭى مارەسىنە جەتتى. جارىستىڭ 1/8 فينالىنا شىققان قۇرامالار تولىق بەلگىلى بولدى، دەپ حابارلايدى قازاقپارات ءتىلشىسى.

توپتىق كەزەڭدەگى سوڭعى ويىن كۇنىندە E جانە F توبىنداعى قۇرامالار شەبەرلىك بايقاستى. E توبىندا العاشقى ەكى تۋردا نەبارى ەكى ۇپايدى قاناعات تۇتقان يسپانيا ءۇشىنشى تۋردا سلوۆاكيانى 5:0 ەسەبىمەن تاس- تالقان ەتىپ جەڭدى. الدىمەن 30-مينۋتتا سلوۆاكيالىق مارتين دۋبراۆكا ءوزىنىڭ قاقپاسىنا گول سوعىپ السا، ودان كەيىن يسپانيا ساپىنان ەمەريك لاپورت 45-مينۋتتا ەسەپتى ۇستەمەلەي ءتۇستى. ال ولاردىڭ قاتارىنان پابلو سارابيا 56، فەرران توررەس 67-مينۋتتا مەرگەندىك تانىتسا، 71-مينۋتتا سلوۆاكيالىق يۋراي كۋتسكا تاعى ءبىر اۆتوگولدىڭ اۆتورى اتاندى.

اتالعان توپتاعى شۆەتسيا مەن پولشا كەزدەسۋىندە دە بەس سوعىلدى. ويىن بارىسىندا شۆەتسيالىق ەميل فورسبەرگ 2، 59-مينۋتتاردا دالدىك كورسەتسە، 61، 84-مينۋتتاردا پولشالىق روبەرت ليەۆاندوۆسكي ەكى گول سوقتى.

شۆەتسياعا جەڭىس الىپ كەلگەن دوپتى 93-مينۋتتا ۆيكتور كلاسسون ءوزىنىڭ ەنشىسىنە جازدى. وسىلايشا ولار قارسىلاسىن 3:2 ەسەبىمەن تىزە بۇكتىردى. بۇل توپتا 7 ۇپايمەن شۆەتسيا كوش باستاسا، ەكىنشى ورىن 5 ۇپايى بار يسپانياعا بۇيىردى.

F توبىندا دا پلەي- و ف ف ساتىسىنا تارتىستى باسەكە ءجۇردى. جانكۇيەرلەر الدىمەن پورتۋگاليا مەن فرانسيا كەزدەسۋىنە كوز تىكتى. كەزدەسۋ بارىسىندا قوس قۇراما قاقپاسىنا ءۇش پەنالتي بەلگىلەنىپ، ولاردىڭ بارلىعى تولىقتاي ورىندالدى. پورتۋگاليالىق كريشتيانۋ رونالدۋ 30، 60-مينۋتتاردا پەنالتيدەن ءمۇلت كەتكەن جوق. وسىلايشا ول قۇراما ساپىندا ءوزىنىڭ 109-گولىن سوعىپ، الەمدىك رەكوردتا وزگەرىس ەنگىزدى.

بۇدان بۇرىن مۇنداي كورسەتكىش يراندىق الي داەيدىڭ ەنشىسىنە جازىلعان بولاتىن. ال فرانسيا قۇرامىنان كاريم بەنزەما 45-مينۋتتا سونداي مۇمكىندىكتى پايدالانسا، 47-مينۋتتا ويىن بارىسىنان گول سوعىپ كەتتى. ويىندا 2:2 ەسەبى تىركەلىپ، قوس قۇراما دا پلەي- وفف ساتىسىنا جولداما الدى. اتالعان توپتاعى تاعى ءبىر كەزدەسۋدە ۆەنگريا قۇراماسى گەرمانياعا قارسى جىگەرلى ويىن كورسەتتى.

ولاردىڭ قاتارىنان ادام سالاي 11-مينۋتتا ەسەپ اشسا، نەمىس فۋتبولشىسى كاي حاۆەرتس 66-مينۋتتا تارازى باسىن تەڭەستىرگەن ەدى. دەگەنمەن 68-مينۋتتا اندراش شەفەر قايتادان ۆەنگريانى العا شىعاردى. ال 84-مينۋتتا نەمىس فۋتبولشىسى لەون گورەتسكا تاعى دا ەسەپتى تەڭەستىردى. ويىندا 2:2 ەسەبىمەن تەڭ ءتۇستى.

گەرمانيا ەكىنشى ورىن الىپ، پلەي- وفف ساتىسىنا شىقتى. جارىستىڭ 1/8 فينالىندا ۋەلس پەن دانيا، يتاليا مەن اۆستريا، نيدەرلاندى مەن چەحيا، بەلگيا مەن پورتۋگاليا، حورۆاتيا مەن يسپانيا، فرانسيا مەن شۆەيتساريا، انگليا مەن گەرمانيا، شۆەتسيا مەن ۋكراينا كەزدەسەتىن بولدى. ەندى 1/8 فينال ويىندارى 26-29 ماۋسىم كۇندەرى وتكىزىلەدى.

ويىندار ءدۇبىرلى دودا تاريحىندا تۇڭعىش رەت ەۋروپانىڭ 10 مەملەكەتىندە ورنالاسقان 11 ستاديوندا وتۋدە. بۇل ەۋروپا چەمپيوناتىنىڭ 60 -جىلدىق مەرەيتويىنا وراي ۇيىمداستىرىلعان. فۋتبولدان ەۋروپا چەمپيوناتى 11-ماۋسىمدا باستالدى، ول 11-شىلدەدە مارەسىنە جەتەدى.

Keywords: سپورت,
Up