Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

اقمولا وبلىسىن دامىتۋعا بيىل 118 ميلليارد تەڭگە قاراستىرىلعان - ءاليحان سمايىلوۆ

27 May 2022 22:08

كوكشەتاۋ. قازاقپارات - 2022-جىلى اقمولا وبلىسىن دامىتۋعا 118 ميلليارد تەڭگە قاراستىرىلعان.

بۇل تۋرالى ق ر پرەمەر-ءمينيسترى ءاليحان سمايىلوۆ اقمولا وبلىسىنا جۇمىس ساپارى بارىسىندا ءوڭىردىڭ كەشەندى الەۋمەتتىك-ەكونوميكالىق دامۋ ماسەلەلەرىنە ارنالعان كەڭەستە ايتتى، دەپ حابارلايدى قازاقپارات primeminister.kz سايتىنا سىلتەمە جاساپ.

ۇكىمەت باسشىسى اقمولا وبلىسى ەلىمىزدىڭ ماڭىزدى اگرارلىق-ونەركاسىپتىك وڭىرلەرىنىڭ ءبىرى ەكەنىن اتاپ ءوتتى.

سونداي-اق مۇندا موليبدەن ءوندىرىسى، حيميا ونەركاسىبى، ماشينا جاساۋ جانە باسقا دا سالالار قارقىندى دامىپ كەلەدى. كەڭەس بارىسىندا وبلىس اكىمى ەرمەك مارجىقپايەۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، اۋىل شارۋاشىلىعى ءمينيسترى ەربول قاراشوكەيەۆ، ۇلتتىق ەكونوميكا ۆيتسە-ءمينيسترى باۋىرجان وماربەكوۆ، ەكولوگيا، گەولوگيا جانە تابيعي رەسۋرستار ۆيتسە-ءمينيسترى ءزۇلفيا سۇلەيمەنوۆا، ەنەرگەتيكا ۆيتسە-ءمينيسترى جاندوس نۇرماعانبەتوۆ، دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك، ءبىلىم جانە عىلىم ۆيتسە-ءمينيسترى عاني بەيسەنبايەۆ بايانداما جاسادى.

بايانداماشىلاردى تىڭداعان ق ر پرەمەر-ءمينيسترى 2022-جىلى اقمولا وبلىسىن دامىتۋعا 118 ميلليارد تەڭگە قاراستىرىلعانىن ايتتى.




سونىمەن قاتار رەسپۋبليكالىق بيۋدجەتتى ناقتىلاۋ اياسىندا قوسىمشا 52,2 ميلليارد تەڭگە ءبولىندى.

بۇل شىعىستار اۆتوموبيل جولدارىن رەكونسترۋكتسيالاۋ مەن جوندەۋگە، ينجەنەرلىك، كولىك جانە الەۋمەتتىك ينفراقۇرىلىمدى دامىتۋعا، تۇرعىن-ءۇي كوممۋنالدىق شارۋاشىلىعىنا، تۇرعىن ءۇي قۇرىلىسىنا، دەنساۋلىق ساقتاۋ سالاسىن قارجىلاندىرۋعا، ءبىلىم بەرۋدى دامىتۋعا، جىبەك جولى اۋىلىنداعى قوسالقى ستانتسيانى رەكونسترۋكتسيالاۋعا جانە تاعى باسقاسىنا باعىتتالىپ وتىر. سونىمەن قاتار اگروونەركاسىپتىك كەشەندى قولداۋعا، ەسىل وزەنىنىڭ ارناسىن تەرەڭدەتۋگە، كاسىپكەرلىكتى نەسيەلەۋگە جانە ناتيجەلى جۇمىسپەن قامتۋعا قوسىمشا قاراجات ءبولىندى.




سونداي-اق ءاليحان سمايىلوۆ وبلىستىڭ ءبىرقاتار وزەكتى ماسەلەسىنە نازار اۋداردى.

پرەمەر-مينيستر وبلىستا جىل باسىنان بەرى الەۋمەتتىك ماڭىزى بار ازىق-تۇلىك تاۋارلارىنىڭ باعاسى شامامەن %14 وسكەنىن ايتتى.

«ازىق-تۇلىك تاپشىلىعى مەن قىمباتشىلىقتىڭ نەگىزسىز ورىن الۋىنا جول بەرمەۋ ءۇشىن جۇيەلى جۇمىس جۇرگىزۋ كەرەك. بۇل ماسەلە بويىنشا تۇراقتى تۇردە جينالىستار وتكىزىلىپ، بارلىق قاجەتتى قۇرالدار مەن مەحانيزمدەر قابىلدانىپ وتىر. وبلىس اكىمدىگى ولاردى ءىس جۇزىندە قولدانۋى كەرەك»، - دەدى ۇكىمەت باسشىسى.




بۇعان قوسا پرەمەر-مينيستر اكىمدىككە ۇستەمە باعالاردى باقىلاۋدى كۇشەيتۋدى (%15 دان اسپاۋى ءتيىس)، ەلىمىزدىڭ وڭتۇستىكتەگى وڭىرلەرى مەن تاياۋ شەتەل فەرمەرلەرىمەن ەرتە پىسەتىن كوكونىستەردى جەتكىزۋگە تىكەلەي شارتتار جاساسۋدى، ساۋدا جەلىلەرىمەن جۇمىس ىستەۋ كەزىندە «اينالىم سحەماسى» تەتىگىن پايدالانۋدىڭ تيىمدىلىگىن ارتتىرۋدى جانە فورۆاردتىق مەحانيزم ارقىلى اۋىل شارۋاشىلىعى ونىمدەرىن جەتكىزۋدى تاپسىردى.

ءاليحان سمايىلوۆ ءوڭىردىڭ ەكونوميكاسىن ءارتاراپتاندىرۋ - وتە وزەكتى ماسەلە ەكەنىن اتاپ ءوتتى.

بۇل ءۇشىن بيىل وڭىردە جەكە ينۆەستيتسيالار ەسەبىنەن جالپى قۇنى 273 ميلليارد تەڭگەنى قۇرايتىن 169 جوبانى ىسكە قوسۋ جوسپارلانىپ وتىر.

اتاپ ايتقاندا، التىن شىعارۋ فابريكاسى، جەل ەلەكتر ستانتسياسى، برويلەر قۇس فابريكاسى جانە كىرپىش زاۋىتى ىسكە قوسىلادى دەپ جوسپارلانعان.

سونىمەن قاتار اكىمدىك كوكشەتاۋدا جەو جانە كوپسالالى اۋرۋحانا سالۋ، بۋراباي اۋدانىندا كۋرورتتىق ايماق، ارشالى اۋدانىندا جەل ەلەكتر ستانتسياسىن، سونداي- اق زەرەندى اۋدانىندا قۇس فابريكاسىن جانە قۇراما جەم زاۋىتىن سالۋ سەكىلدى 1 تريلليون تەڭگەگە 135 جوبانى پىسىقتاپ جاتىر.

«جوسپارلانعان جوبالاردىڭ ءبارىن ۋاقىتىلى ىسكە قوسىپ، جاڭا جوبالاردى ساپالى تۇردە پىسىقتاۋ قاجەت. اكىمدىك بۇل ماسەلەلەردى ەرەكشە باقىلاۋدا ۇستاعانى ءجون»، - دەدى ءاليحان سمايىلوۆ.

كەڭەستى قورىتىندىلاي كەلە، پرەمەر-مينيستر ورتالىق مەملەكەتتىك ورگاندار مەن وبلىس اكىمدىگىنە تاعى دا ءبىرقاتار تاپسىرما بەردى:

اتاپ ايتقاندا، رەسپۋبليكالىق دەيگەيدەگى جولداردىڭ نورماتيۆتىك جاي-كۇيىن كەمىندە %88، ال، جەرگىلىكتى جولداردى كەمىندە %87 عا جەتكىزۋدى قامتاماسىز ەتۋ، كەنجەباي جانە راحىمجانساي جەراستى سۋلارى كەن ورىندارىنان سۋ قۇبىرىن تارتۋ جوباسىن پىسىقتاۋ، ستەپنوگورسك قالاسىنىڭ ماگيسترالدىق جىلۋ جەلىلەرىن رەكونسترۋكتسيالاۋ جۇمىستارىن قارجىلاندىرۋ مۇمكىندىگىن قاراستىرۋ تاپسىرىلدى.

سونداي-اق «ءبىلىمدى ۇلت» ساپالى ءبىلىم بەرۋ» ۇلتتىق جوباسى اياسىندا جاڭا مەكتەپتەر سالۋ، نۇر-سۇلتان قالاسىنداعى 2№ اقمولا كوپبەيىندى اۋرۋحاناسىن جانە كوكشەتاۋ قالاسىنداعى كوپبەيىندى وبلىستىق بالالار اۋرۋحاناسىن قايتا جاڭارتۋ جانە زاماناۋي جابدىقتارمەن جاراقتاندىرۋ مۇمكىندىگىن قاراستىرۋ تاپسىرىلدى.

«ءبىز كۇش-جىگەرىمىزدى بىرىكتىرىپ، جۇدىرىقتاي جۇمىلىپ، اقمولا وبلىسىنىڭ دامۋىنا تىڭ سەرپىن بەرۋىمىز كەرەك. حالىقتىڭ ءال-اۋقاتىنىڭ ءوسۋى، ءومىر ءسۇرۋ ساپاسىنىڭ جاقسارۋى وسىعان تىكەلەي بايلانىستى»، - دەپ تۇيىندەدى ءاليحان سمايىلوۆ.

Up