Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

پەدوفيلدى ۇستاۋ ءۇشىن 13-قاباتتان سەكىرگەن الماتىلىق «جىل پوليسەيى» اتاندى

23 June 2021 10:46

الماتى. قازاقپارات - الماتى قالالىق پوليتسيا دەپارتامەنتىنىڭ تۇركسىب اۋداندىق پوليتسيا باسقارماسىنىڭ كريمينالدىق ءبولىم باسشىسىنىڭ ورىنباسارى باقىتجان باكىروۆ رەسپۋبليكالىق بايقاۋدا «جىل پوليسەيى» نوميناتسياسىندا جەڭىمپاز اتاندى.

پەدوفيلدى ۇستاۋ ءۇشىن 13-قاباتتان سەكىرىپ كەتكەن ءتارتىپ ساقشىسى بۇل كۇندە «قازاقستاندىق بەتمەن» اتانىپ كەتكەن. باقىتجان باكىروۆتىڭ ەرلىگىنە كوپشىلىك ءتانتى بولدى.

قازاقپارات ءتىلشىسى ونىڭ وزىنەن وقيعا قالاي بولعانى تۋرالى اڭگىمەلەپ بەرۋىن سۇرادى.

- باقىتجان، ماراپاتىڭىز قۇتتى بولسىن!

- راحمەت. ويلاماعان جەردەن تاعى دا ماراپاتتالدىم. «جىل پوليسەيى» اتاعى ماعان ۇلكەن جاۋاپكەرشىلىك جۇكتەدى. سوڭعى ەكى جىلدا كوپشىلىكتىڭ قۇرمەتىنە، العىسىنا بولەنىپ جاتىرمىن. ۇلكەن راحمەت! تۋعان ەلىمە، جەرىمە، قازاقستان پوليسياسىنا ءارى قاراي دا ادال قىزمەت ەتۋگە ۋادە بەرەمىن. حالقىمىنىڭ ىقىلاسىنان ارتىق العىس جوق ەكەن، سونى ءتۇسىندىم.

- قاي وڭىردە دۇنيەگە كەلدىڭىز؟

- مەن 1983 -جىلى 17-شىلدە كۇنى وڭتۇستىك قازاقستان وبلىسىنىڭ جەتىساي قالاسىندا دۇنيەگە كەلدىم. وتباسىنداعى ءۇش بالانىڭ ۇلكەنىمىن. وزىمنەن كەيىن قارىنداسىم جانە ءىنىم بار. اكەم انۋاربەك باكىروۆ ماقتا زاۋىتىندا ينجەنەر بولىپ جۇمىس ىستەيدى. انام ءۇي شارۋاسىنداعى كىسى.

- بۇل ماماندىقتى تاڭداۋعا نە تۇرتكى بولدى؟

- كىشكەنتاي كەزىمنەن قىلمىسكەرلەرمەن كۇرەسۋدى ارماندايتىنمىن. وعان بىردەن- ءبىر سەبەپ - فيلمدەر. سول كەزدە پوليسەيلەردىڭ، تەرگەۋشىلەردىڭ جۇمىسى تۋرالى كينولاردى ءجيى كورسەتەتىن. سونى تاپجىلماي وتىرىپ كورەتىن ەدىم. بالكىم سول تۇرتكى بولعان شىعار. وسە كەلە پوليسيا ماماندىعىنا دەگەن قىزىعۋشىلىعىم ارتا ءتۇستى. ءسويتىپ ارمان قۋىپ الماتىعا كەلدىم.

- ءوزىڭىز ارمانداعان وقۋ ورنىنا تۇسە الدىڭىز با؟

- ءيا. الماتىداعى اباي اتىنداعى مەملەكەتتىك ۋنيۆەرسيتەتىنىڭ زاڭ فاكۋلتەتىنە وقۋعا ءتۇستىم. گرانتقا ىلىگە المادىم. اقىلى بولىمىندە ءبىلىم الدىم. 2000 -جىلى ءتۇسىپ، 2005 -جىلى ءتامامدادىم. وقۋىمدى بىتىرگەن سوڭ ءبىر جىلداي ءوز ماماندىعىم بويىنشا جۇمىس تابا المادىم. قۇرىلىستا ىستەدىم. 2006 -جىلى ەلوردادا پوليسيا قىزمەتكەرلەرىنە بايقاۋ جاريالانعانىن ەستىپ، باعىمدى سىناپ كورگىم كەلدى. نۇر- سۇلتانعا كەلىپ سول بايقاۋعا قۇجات تاپسىرىپ، باعىما قاراي ءى ءى م اكادەمياسىنىڭ العاشقى دايارلىق وقۋىن 3 اي وقىدىم. وسى ۋاقىت ارالىعىندا ءبىراز تاجىريبە جيناقتادىم.





- ەڭبەك جولىڭىزدى قاي مەكەمەدە باستادىڭىز؟

- 2006 -جىلى الماتى قالاسى پوليسيا دەپارتامەنتى كريمينالدىق پوليسيا باسقارماسىنىڭ جەدەل ۋاكىلى قىزمەتىنە ورنالاستىم. ەڭبەك جولىم وسى جەردە باستالدى. 15 جىل بولدى وسىندامىن. بىلتىردان بەرى تۇركسىب اۋداندىق پوليتسيا باسقارماسىنىڭ كريمينالدىق ءبولىم باسشىسىنىڭ ورىنباسارى قىزمەتىنە تاعايىندالدىم.

- ءومىرىڭىزدى قاتەرگە تىگىپ، اسا قاۋىپتى قىلمىسكەردى ۇستاۋ ءۇشىن 13- قاباتتان سەكىرگەندە بويىڭىزدى ەشقانداي قورقىنىش بيلەمەدى مە؟

- ول كەزدە مەن ءوز ءومىرىمدى ويلامادىم. ماقساتىم- قىلمىسكەردەن ايىرىلىپ قالماۋ، بۇيرىقتى بۇلجىتپاي ورىنداۋ بولدى. بىزگە 11-شىلدەدە كۇنى بەلگىسىز ادامنىڭ الماتىنىڭ تۇركسىب اۋدانىنا قاراستى اۋماقتا ءۇي توناپ، 15 جاسار قىزدى زورلاپ كەتكەنى تۋرالى حابار كەلىپ ءتۇستى. جەدەل ۋاكىلدەردەن ەكى توپ قۇرىلدى. سونىڭ ىشىندە مەن دە بارمىن.

- كۇدىكتىنى نەشە كۇندە قولعا تۇسىردىڭىزدەر؟

- كۇدىكتىنى ءتورت كۇن ىزدەستىردىك. كەيىن ونىڭ پاتەر جالداپ، تىعىلىپ جاتقانىن انىقتادىق. بىردەن ونى ۇستاۋ جوسپارىنا كىرىستىك. مەن جانە ارىپتەسىم جالدانعان پاتەر يەسىمەن بىرگە 13-قاباتقا كوتەرىلدىك. قىلمىسكەردى ۇستاۋ ءۇشىن سانتەحنيكتىڭ كيىمىن كيىپ الدىق. ونىڭ قوسالقى كىلتى بولدى. ايەل ونى شاقىرىپ، قۇبىردان سۋ اعىپ جاتقانىن ايتتى. «ونى جوندەۋگە سانتەحنيكتەر كەلدى» دەدى. ول دالىزگە شىقتى، مەن وعان قاراي ۇمتىلدىم. ول بولمەنىڭ بىرىنە قاشىپ كىرىپ، اشىق تۇرعان تەرەزەدەن سەكىرىپ كەتتى. بۇل سەكۋندتا ادەتتە ەشتەڭە ويلامايسىڭ، ەڭ باستىسى - قۋىپ جەتۋ. سوندىقتان مەن ونىڭ ارتىنان سەكىردىم. 11-قاباتتا تەراسسا بار، سول جەرگە قۇلادىق. قۇلاعان كەزدە اياعىمنىڭ سىنعانىن بىردەن سەزدىم. سەبەبى «سىرت» ەتكەن دىبىس شىقتى. قىلمىسكەر قاشۋ ارەكەتىن جالعاستىرماق بولدى. بار كۇش- جىگەرىمدى سالىپ، ونى ۋىستان شىعارماۋعا تىرىستىم. سەرىكتەسىم كەلگەنشە كۇتتىم. ەكىنشى توپ ءۇيدى قورشاپ تۇرعان ەدى. ولار ۇستىنە كوتەرىلىپ كەلگەنشە پەدوفيلدى جىبەرمەي وتىردىق.

- قازىر دەنساۋلىعىڭىز قالاي؟

- سول اياعىما ءۇش رەت وپەراتسيا جاسالدى. قازىر تولىق جازىلدىم. دەنساۋلىعىما شاعىمدانبايمىن. جۇمىسىما ورالدىم.

- ەرلىگىڭىز ەلەنىپ، ق ر پرەزيدەنتىنىڭ جارلىعىمەن دارەجەلى «ايبىن» وردەنىمەن ماراپاتتالدىڭىز. سول ساتتە قانداي سەزىمدە بولدىڭىز؟

- «ايبىن» وردەنىن العان كەزدە كەرەمەت سەزىمدە بولدىم. كەز كەلگەن ادام ماداق- ماراپاتقا ۇسىنىلسا قۋانىشقا كەنەلەدى عوي. مەن دە قاتتى قۋاندىم. سونداي- اق، بۇل ماراپات ماعان ۇلكەن جاۋاپكەرشىلىك جۇكتەدى.

- پوليسەي اتانۋ ءۇشىن ادامنىڭ بويىندا قانداي قاسيەتتەر بولۋى كەرەك دەپ ويلايسىز؟

- ەڭ الدىمەن، ءتوزىمدى جانە انتقا ادال بولۋ كەرەك. قىزمەتكە ورنالاسقاندا ءبىز انت قابىلدايمىز. وندا ازاماتتاردى قورعاۋ - ءبىزدىڭ جۇمىسىمىز ەكەنى كورسەتىلگەن. ءار ەر ازاماتتىڭ بويىندا جىگەر، نامىس بولادى. ەلىمىز بەن حالقىمىزدىڭ تىنىشتىعى ءۇشىن ەڭبەك ەتۋىمىز كەرەك. ەڭ ۇلكەن ۇلكەن مارتەبە وسى دەپ ويلايمىن.

- ءوزىڭىزدىڭ وتباسىڭىز جايىندا ايتىپ وتسەڭىز؟

- كوپبالالى اكەمىن. جارىم ماقپال ەكەۋمىز 6 بالا تاربيلەپ وتىرمىز. 4 ۇل، ەكى قىزىم بار. ۇلكەنى - 11 جاستا، كىشكەنتايىمىز - بىردە.

- سۇحباتىڭىزعا راحمەت!

اۆتور: الما مۇقانوۆا


Keywords: قوعام,
Up