Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

قوسشىدا ەلەكتر نىساندارىن سالۋ كەزىندە 222 ميلليون تەڭگە جىمقىرىلعان

28 May 2022 09:34

كوكشەتاۋ. قازاقپارات - قوسشى قالاسىندا سىرتقى ەلەكترمەن جابدىقتاۋ وبەكتىلەرىن سالۋ كەزىندە 222 ميلليون تەڭگەدەن استام بيۋجەت قارجىسى جىمقىرىلدى، دەپ حابارلايدى قازاقپارات ءتىلشىسى.

اقمولا وبلىسى پروكۋراتۋراسى باسپا ءسوز قىزمەتىنىڭ مالىمەتىنشە، اتالمىش قىلمىس پروكۋرورلىق تەكسەرىس بارىسىندا انىقتالدى.

«تاپسىرىس بەرۋشى رەتىندە قوسشى قالاسىنىڭ قۇرىلىس ءبولىمى ترانسفورماتورلىق قوسالقى ستانسيالاردى ورناتپاعان. الايدا 222,2 ميلليون تەڭگە مولشەرىندە نەگىزسىز تولەم جۇرگىزىپ، وسى جۇمىستاردى ورىنداۋ تۋرالى اكتىلەرگە قول قويعان (2019-جىلدان باستاپ قازىرگى ۋاقىتقا دەيىن جۇمىستار ورىندالعان جوق). ارنايى پروكۋرورلار باسقارماسى وسىعان بايلانىستى ق ر قىلمىستىق كودەكسىنىڭ 189-بابىنىڭ 4-بولىگى 2-بولىمشەسى (اسا ءىرى كولەمدە جىمقىرۋ) بويىنشا قىلمىستىق ءىستى تەرگەپ جاتىر»، - دەدى پروكۋراتۋرانىڭ باسپا ءسوز قىزمەتى.

قازىرگى ۋاقىتتا تەرگەۋ ورگانى سوتتىڭ سانكسياسىمەن قۇرىلىس ءبولىمىنىڭ باسشىسىن قاماۋعا الدى.

«وسى رەتتە، پروكۋراتۋرا بيۋجەت قاراجاتىن جىمقىرعاندارعا ق ر قىلمىستىق كودەكسىنىڭ 189-بابى 4-بولىگى 2-بولىمشەسى بويىنشا 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعانىن حابارلايدى. وزگە اقپارات تەرگەۋ مۇددەسى ءۇشىن جاريا ەتۋگە جاتپايدى»، - دەپ تولىقتىردى ۆەدومستۆودان.

ايتا كەتسەك، اقمولادا جەمقورلىق جاساپ سوتتالعان 42 شەنەۋنىكتىڭ 16 سى عانا تۇرمەگە قامالعان.

Up