Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

نۇر-سۇلتاندا وليمپيادا كۇنى اتالىپ ءوتتى

23 June 2021 17:58

نۇر-سۇلتان. قازاقپارات - ەل ايماقتارى اراسىندا وتكىزىلگەن حالىقارالىق وليمپيادا كۇنى ەستافەتاسى 23- ماۋسىم كۇنى نۇر-سۇلتانداعى ۋربان-سپورت مەرەكەلىك فەستيۆالىمەن اياقتالدى، دەپ حابارلايدى قازاقپارات ءتىلشىسى.

قازاقستان ۇلتتىق وليمپيادا كوميتەتى ماۋسىم ايىن تۇتاستاي وليمپيادالىق قۇندىلىقتارعا ارنادى. بۇل اي حالىقارالىق جانە قازاقستان وليمپيادالىق قوزعالىسىنىڭ «ءبىز بىرگەمىز! تەزىرەك، بيىگىرەك، مىقتىراق - بىرگە» ۇرانىمەن ءوتتى.




3x 3 باسكەتبول، ستريتبول، ستريت- ۆوركاۋتەرلەر مەن كانوەشىلەر جانە تەكبول - بۇل سالىستىرمالى تۇردە سپورتتىڭ جاڭا تۇرلەرى، فۋتبول مەن ۇستەل تەننيسىنىڭ گيبريدى سانالادى. تەكبولدى ويلاپ شىعارعان كوماندا جاڭا سپورت ءتۇرىن وليمپيادا باعدارلاماسىنا ەنگىزۋگە تىرىسۋدا.




ودان بولەك، ەلوردانىڭ ەڭ جاس تۇرعىندارىنا ارناپ توكيو-2020 وليمپيادسىنا جولداما يەگەرلەرى، ۇلتتىق قۇراما مۇشەلەرى كيريلل گەراسيمەنكو مەن اناستاسيا لاۆروۆا شەبەرلىك ساباعىن وتكىزدى.




«بارشاڭىزدى حالىقارالىق وليمپيادا كۇنىمەن قۇتتىقتايمىن! وليمپيادا ويىندارىنىڭ باستالۋىنا ءبىر اي قالعانىن ەسكەرسەك، بۇل شىنىمەن دە ماڭىزدى مەرەكە. وليمپيادانى ءبىر جىلعا شەگەرگەننەن كەيىن بۇل ويىنعا قاتىسۋ مۇمكىندىگىن الۋ مەن ءۇشىن ۇلكەن قۋانىش. ال وليمپيادادا اناستاسيا لاۆروۆانىڭ دا باق سىنايتىنى قۋانىشىمىزدى ەسەلەي تۇسەدى. وسىنداي ءىس-شاراعا قاتىسىپ، كىشكەنتاي سپورتشىلاردىڭ قىزىعۋشىلىعىن كورگەنىمە قۋانىشتىمىن!»، - دەپ قۇتتىقتادى كيريلل گەراسيمەنكو.




Qazsport تەلەارناسى وليمپيادا كۇنىنە تىكەلەي ەفيرىن ارناپ، ەلورداداعى ۋربان-فەستيۆالدى، قۇراما كوماندانىڭ توكيوعا دايىندىعىن جانە ايماقتارداعى سيۋجەتتەردى ەل نازارىنا ۇسىندى.




توكيو وليمپياداسىنىڭ باستالۋىنا تۋرا ءبىر اي قالعاندا وتكىزىلگەن مەرەكەنى ەل تۇرعىندارى تىكەلەي ەفيردەن تاماشالادى.

«مەن كۇن سايىن جاتتىعامىن. جاز كەزىندە دە جاتتىعۋدى توقتاتپايمىن. ءبىزدىڭ ءوز كوماندامىز بار، اۋلالار بولىپ جارىسامىز. ءبىزدىڭ سپورتشىلاردىڭ وليمپياداداعى ونەرىن ءبارىمىز دە تاماشالايمىز. مەن بوكسشىلارعا، ۆاسيلي لەۆيتكە جانكۇيەرمىن»، - دەدى جاس باسكەتبولشى مەدەت تولەنبايەۆ.




بەس وليمپيادا شىعىرشىعى بەس قۇرلىقتى بىلدىرەتىنى سەكىلدى، مەرەكەلىك ەستافەتانى وتكىزۋگە ەلىمىزدىڭ بەس ايماعى اتسالىستى. ولار قازاقستاندىقتاردىڭ بەلسەندى بولىپ، سپورت تۋرالى جاڭا دۇنيەلەرمەن تانىسۋىنا، ءوز مۇمكىندىكتەرىن ارتتىرۋىنا سەبەپكەر بولدى.




جاقىندا الماتىدا قۇزعا ورمەلەۋشىلەر اراسىندا جارىس وتسە، پەتروپاۆلدا وليمپيادا چەمپيونى الەكساندر ۆينوكۋروۆتىڭ قاتىسۋىمەن ۆەلوجارىس بولدى، وسكەمەندە ولگا رىپاكوۆانىڭ قاتىسۋمەن جەڭىل اتلەتيكالىق جارىستار ۇيىمداستىرىلسا، اقتاۋدا ادىلبەك نيازىمبەتوۆ پەن ايبەك يماشيەۆ بوكس جانە دزيۋدودان شەبەرلىك ساباعىن وتكىزدى.




«بارشاڭىزدى حالىقارالىق وليمپيادا كۇنىمەن قۇتتىقتايمىن! بۇل قوزعالىسقا كوپتەگەن ەلدەردىڭ قاتىساتىنى جاقسى. وليمپيادالىق كوڭىل- كۇي بۇكىل جاز بويى سەزىلىپ تۇرسا ەكەن. سەبەبى سپورتشىلار توكيعا اتتانادى. بىزدەر، وليمپياداشىلار، بارشا قازاقستاندىقتاردى سپورتشىلاردى قولداۋعا شاقىرامىز. وليمپيادادا سىزدەردىڭ قولداۋلارىڭىز بىزگە اسا قاجەت»، - دەدى ريو وليمپياداسىنىڭ جۇلدەگەرى، بوكسشى ۆاسيلي لەۆيت.




16 - شىلدە كۇنى كوماندانىڭ العاشقى بولىگى توكيوعا اتتانادى. ال ازىرگە وليمپياداشىلار مەن چەمپيوندار بالالارمەن جانە جاستارمەن كەزدەسەدى. سپورتشىلار قازاقستاندىقتاردىڭ پاتريوتيزمدى، سپورت پەن دەنساۋلىقتى تاڭدايتىنىنا سەنىمدى.




ەستەرىڭىزگە سالا كەتەيىك، قازىرگى تاڭدا قازاقستان سپورتشىلارى توكيو وليمپياداسىنا سپورتتىڭ 26 تۇرىنەن 72 جولداما جەڭىپ الدى.

اۆتور: كۇنسۇلتان وتارباي


Keywords: سپورت,
Up