Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستان بوكسىنا قانداي وزگەرىس كەرەك - ەرماحان ىبىرايىموۆتىڭ پىكىرى

29 July 2021 20:21

نۇر- سۇلتان. قازاقپارات - «الماتى» وليمپيادالىق دايارلاۋ ورتالىعى ديرەكتورىنىڭ ورىنباسارى، ا ي ب ا حالىقارالىق فەدەراتسياسى كوميسسياسىنىڭ مۇشەسى ەرماحان ىبىرايىموۆ بوكستان ۇلتتىق قۇراماعا قانداي كەرەك ەكەنىن ايتىپ بەردى، دەپ حابارلايدى قازاقپارات ءتىلشىسى.

«ەرماحان مىرزا، بوكستان ۇلتتىق قۇراما باسشىلىعىنا كەلسەم، كوپ نارسە وزگەرتەر ەدىم دەپسىز. ەگەر باسشىلىققا كەلسەڭىز، وزگەرىستى نەدەن باستايسىز؟» دەگەن سۇراق قويىلدى بوكسشىعا ورتالىق كوممۋنيكاتسيالار قىزمەتىندە.

«مەن 2002-2004 -جىلى باس باپكەر قىزمەتىندە بولعانمىن. ول كەزدە باقتيار ارتايەۆ وليمپيادا چەمپيونى بولدى، گەننادي گولوۆكين «كۇمىس»، سەرىك ەلەۋوۆ «قولا» مەدال يەلەنگەن ەدى. ءۇش مەدال بولدى. ءار وليمپيادا ويىنىندا قازاقستان بوكسشىلارى 3-4 مەدال الىپ كەلە جاتىر. ءبىراق، ەستەرىڭىزدە بولسا 2008 -جىلى قازاقستان قورجىنىنا ەكى- اق مەدال سالىندى. باقىت سارسەكبايەۆ پەن ەركەبۇلان شىناليەۆ «التىن» جانە «قولا» جۇلدە الدى. كوپتەگەن جانكۇيەرلەرىمىز الەۋمەتتىك جەلىدە كوپتەگەن اڭگىمە ايتىپ جاتىر. سوندىقتان، بارلىق جانكۇيەرلەردى سابىرعا شاقىرامىن. قالعان ءتورت بوكسشىمىزدىڭ ءبارى مەدال اكەلسە، بۇل اڭگىمەنىڭ ءبارى ارتتا قالار ەدى. سوندىقتان، ءتورت بوكسشىمىزعا سەنىم مول»، - دەدى ە. ىبىرايىموۆ.

سونىمەن بىرگە، سپيكەر قازاقستان بوكسىنا تاكتيكالىق تۇرعىدا وزگەرىستەر ەنگىزۋ كەرەكتىگىن ايتتى.

«ءبىزدىڭ بوكسشىلار الدىڭعى قولمەن مۇلدەم جۇمىس ىستەمەيدى. تەك كۇشتىرەك قولىنا سەنەدى، وڭ بولسا وڭ قولمەن، سولاقاي بولسا - سول قولىمەن قاتتى سوققى جاسايدى. ءبىراق قاشىقتى ساقتامايدى. لوندونداعى سەرىك ساپيەۆتەي، افيناداعى باقتيار ارتايەۆتاي جاقسى ويىن كورسەتە الماي جاتىر. سوندىقتان بۇل جەردە تاكتيكالىق تۇرعىدان بۇكىل بوكسشىعا وزگەرىس كەرەك. اياقپەن قورعانىس جاساۋ دەگەن ۇعىم بار. مۇحامەد ءالي ايتقانداي، كوبەلەك ءتارىزدى ۇشىپ- قونىپ، ارا سياقتى شاعۋ كەرەك. سونداي بوكسشىنى قازىر كورمەي وتىرمىن. ءالى دە جىگىتتەرگە ايتارىم، اياقپەن جۇمىس ىستەڭىزدەر، قاشىقتى ساقتاپ، قايتادان جەتىپ بارىپ، قورعانىس جاساۋ كەرەك. سونداي وزگەرىستەر ەنگىزەر ەدىم»، - دەدى ەرماحان ىبىرايىموۆ.

بۇعان دەيىن ەرماحان ىبىرايىموۆ توكيو وليمپياداسىن جەڭىلگەن بوكسشىلارىمىزدىڭ ويىنىنا تالداۋ جاساعان ەدى.


Keywords: سپورت,
Up