Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

جاڭاوزەندىك جاس جىگىتتىڭ ۇلتتىق ونىمنەن جاسالعان تاتتىلەرى كوپشىلىكتىڭ سۇرانىسىنا يە بولدى

1 August 2021 11:29

اقتاۋ. قازاقپارات - جاڭاوزەندىك جاس جىگىتتىڭ ۇلتتىق تاتتىلەرى كوپشىلىكتى قىزىقتىرۋدا، دەپ حابارلايدى قازاقپارات ءتىلشىسى.

قۇلاندى اۋىلىنىڭ تۇرعىنى، ەۋرازيا ۋنيۆەرسيتەتىنىڭ 20 جاستاعى ستۋدەنتى دانيال تولەۋىش — جاس كاسىپكەر. ول «AQ DAM» اتتى ۇلتتىق تاتتىلەر برەندىن قالىپتاستىرۋ باعىتىندا ءوز كاسىبىن اشىپ، ەرەن ەڭبەكتەنۋدە. وتباسىلىق كاسىپتىڭ تەتىگىن تاپقان جاس جىگىت ۇلتتىق ونىمدەردى تۇتىنۋشىعا ادەمىلەپ، سىرتقى ورامىن كوز تارتاتىنداي كوركەم قىلىپ، كورىكتى ديزايندا بەزەندىرۋ ارقىلى وزگەلەردەن ەرەكشەلەنگەن تۇردە ۇسىنۋدى ءجون سانايدى. وسىلايشا، 20 جاستاعى دانيال سامات ۇلىنىڭ وتاندىق برەندى قازىرگى تاڭدا ماڭعىستاۋ وڭىرىندە تانىمال.

«اكەم مال شارۋاشىلىعىمەن اينالىساتىن بولعاندىقتان، ءبىز مال ونىمدەرىن جەپ وستىك. نۇر- سۇلتان قالاسىندا تۇرىپ جاتقان كەزىمدە تۇيە سۇتىنەن دايىندالعان ونىمدەردى ساتىپ العىم كەلەتىن. ءبىراق ول جاقتا، تۇيەنىڭ سۇتىنەن جاسالعان ونىمدەر ءبىزدىڭ جاڭاوزەن قالاسىنا قاراعاندا الدەقايدا قىمباتتىراق. سودان ماعان نەگە مەن وزىمىزدە وندىرىلگەن ءونىمدى وسىندا اكەلىپ قولجەتىمدى باعادا ساتپاسقا دەگەن وي كەلدى. اتا- اناممەن بۇل ويىممەن بولىسكەندە ولار مەنى بىردەن قولدادى. سولاي مەندە ەشقانداي قورقىنىش بولمادى»، - دەدى ول. جاڭاوزەن قالاسىندا ۇلتتىق تاتتىلەردى ساتۋمەن اينالىساتىندار كوپ، الايدا «AQ DAM» اتتى ۇلتتىق تاتتىلەر برەندىنە قىزىعۋشىلىق تانىتۋشىلار سانى كۇن ساناپ وسۋدە. بۇكىل وتباسى بولىپ وندىرەتىن ءونىمدى مۇنداي ادەمى ەتىپ قاپتاپ شىعارۋ يدەياسى قالاي پايدا بولعانىن ايتىپ بەردى.





«باسىندا نۇر- سۇلتان قالاسىنا تاسىپ نەمەسە تاپسىرىس ارقىلى الدىرتىپ ساتىپ ءجۇردىم. بۇل ءتيىمسىز بولدى. سەبەبى، شۇبات سياقتى ءونىم ۇزاق جولعا تاسىمالداۋعا شىداماي قيىندىقتار تۋدىراتىن. نە دە بولسا بۇل كاسىپتى توقتاتپاي، ءوز ونىمدەرىمىزدى جاڭاوزەن قالاسىندا ساتىلىمعا شىعارۋدى ۇيعاردىم. بارلىق ادام ءبىر نارسەنى الىپ، قولدانباس بۇرىن ەڭ الدىمەن ونىڭ سىرتقى تۇرىنە، قالاي بەزەندىرىلگەنىنە قارايدى. سىرتقى بەزەندىرىلگەنى ۇناسا، ونى قولدانىپ نەمەسە ءدامىن تاتىپ كورگىسى كەلەدى. ءبىزدىڭ دە ءونىمىمىزدىڭ سىرتقى ديزاينىنا قاراپ قىزىعىپ، ءدامىن تاتىپ كورگەننەن كەيىن تۇتىنۋشى ونى ۇناتىپ قالادى. ءسويتىپ، ادامدار ءبىر- بىرىنەن ەستىپ، كورىپ قىزىعۋشىلىقپەن تاپسىرىس بەرۋشىلەردىڭ سانى كوبەيە باستادى. قازىر تۇراقتى تۇتىنۋشىلارىمىز دا بار. سىيلىققا بەرۋگە نەمەسە ءدام رەتىندە ۇسىنۋعا وتە قولايلى. بۇل - ءبىزدىڭ وتباسىلىق كاسىبىمىز. ءونىمنىڭ بارلىعى انامنىڭ قولىنان شىعىپ جاتىر. قاپتاپ، بەزەندىرۋ- قارىنداستارىمنىڭ جۇمىسى. ءبىز بالقايماق، قۇرت، ىرىمشىك، شوكولادپەن قاپتالعان جەنت ونىمدەرىن شىعارامىز. تارى مەن تالقاندى عانا اقتوبە قالاسىنان الدىرتامىز»، - دەدى دانيال تولەۋىش.

جاس كاسىپكەر قازىرگى تاڭدا تاپسىرىسپەن جەتكىزۋ قىزمەتى ارقىلى عانا جۇمىس ىستەۋدە. ونىمدەرىن ماڭعىستاۋ وبلىسىنىڭ بارلىق جەرىنە جەتكىزەدى. الداعى ۋاقىتتا ۇلكەن دۇكەن اشىپ، قازاقستاننىڭ بارلىق قالاسىنان جانە شەت مەملەكەتتەردەن دە تاپسىرىس قابىلداپ جەتكىزۋ قىزمەتىن جاساۋ جوسپارى دا بار.

Keywords: قوعام,
Up