Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستاندىق عالىمدار جارا مەن كۇيگەن دەنەنى ەمدەۋگە ارنالعان پرەپارات ويلاپ تاپتى

15 October 2021 20:13

نۇر-سۇلتان. قازاقپارات - ءبىلىم جانە عىلىم مينيسترلىگى ۇلتتىق بيوتەحنولوگيا ورتالىعىنىڭ عالىمدارى ءار ءتۇرلى تەرەڭ جارالار مەن كۇيگەن دەنەنى ەمدەۋگە ارنالعان بىرنەشە يننوۆاتسيالىق قۇرال مەن پرەپارات ويلاپ تاپتى.

ءبىلىم جانە عىلىم مينيسترلىگىنىڭ باسپا ءسوز قىزمەتى حابارلاعانداي، ولاردىڭ ءبىرى - X- Graft بيولوگيالىق جابىنى.

پرەپارات كلينيكالىق سىناقتاردان وتكەن جانە جاقىن ارادا قازاقستاندا تىركەلەدى. زەرتتەۋ ناتيجەلەرى كورسەتكەندەي، بۇل بيولوگيالىق ماتەريالدى قولدانۋ ناۋقاستاردى اۋرۋحاناعا جاتقىزۋ مەرزىمىن قىسقارتىپ، جارالار مەن كۇيگەن دەنەنىڭ جازىلۋىن ەداۋىر تەزدەتەدى.

«ورتالىق عالىمدارى جاساعان X- Graft بيولوگيالىق جابىنى تىندىك ينجەنەريانىڭ زاماناۋي تەحنولوگيالارىن قولدانا وتىرىپ كوللاگەن مەن ەلاستين تالشىقتارىنان جاسالعان. بۇل تاڭعىش ۇلكەن، تەرەڭ جارالاردى ەمدەۋگە ارنالعان. ونى قولدانۋ ىڭعايلى، جارانىڭ بەتىنە جابىسپايدى. ەمدىك قاسيەتى بويىنشا بيولوگيالىق جابىن شەتەلدىك انالوگتاردان كەم تۇسپەيدى»، - دەدى ءبىلىم جانە عىلىم مينيسترلىگىنىڭ ۇلتتىق بيوتەحنولوگيا ورتالىعىنىڭ باس ديرەكتورى ەرلان رامانقۇلوۆ.

سونداي-اق، ۇلتتىق بيوتەحنولوگيا ورتالىعىنىڭ عالىمدارى ۇلكەن، تەرەڭ جارالار مەن كۇيىكتەردى ەمدەۋگە ارنالعان «فيبروسپرەي» جاسۋشالىق پرەپاراتىن جاسادى.

«اەروزول - ادام تەرى جاسۋشالارىنىڭ (فيبروبلاستتاردىڭ) سۋسپەنزياسى جانە جارانىڭ جازىلۋ جىلدامدىعىن ەكى ەسە ارتتىرادى. سونىمەن قاتار، كلينيكالىق تاجىريبەدە پرەپارات تەرى ترانسپلانتاتسياسىنىڭ جازىلۋىن جەدەلدەتۋ ءۇشىن قولدانىلادى»، - دەپ حابارلادى دەپارتامەنتتەن.

تاعى ءبىر پرەپارات - بيوكومپوزيت جاسۋشالى گيدروگەلدىڭ كلينيكاعا دەيىنگى زەرتتەۋلەرىنىڭ ناتيجەلەرى جوعارى تيىمدىلىكتى كورسەتكەنى حابارلاندى. گيدروگەل قۇرامىنا كىرەتىن باعانالى جاسۋشالار سۇيەك نەمەسە شەمىرشەك تىندەرىنىڭ رەگەنەراتسياسىن تەزدەتەدى. ارنايى تەحنولوگيانىڭ ارقاسىندا پرەپارات وتادان كەيىن ءۇش-التى اي ىشىندە زاقىمدالعان سۇيەك پەن شەمىرشەك ءتىنىن قالپىنا كەلتىرەدى.

massaget.kz

Up