Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستان- قىتاي شەكاراسىنداعى كەلەڭسىزدىك باعاعا اسەر ەتتى

28 October 2021 11:55

نۇر- سۇلتان. قازاقپارات - قازاقستان- قىتاي شەكاراسىندا تۇرىپ قالعان ۆاگوندار ءازىر ەلگە جەتكىزىلمەۋى مۇمكىن. حالىقارالىق تاسىمالداۋشىلار وسىلاي كۇدىكتەنەدى.

سول سەبەپتى ولار مايقاپشاعاي جانە قالجات كەدەن بەكەتتەرىن ىسكە قوسۋدى سۇرايدى. قۇزىرلى ورگاندار تاراپىنان ناقتى جاۋاپ ايتىلعان جوق. ءبىراق شەكاراداعى كەلەڭسىزدىك كاسىپكەرلەردى شىعىنعا باتىرعانى راس. ەلىمىزدەگى حالىقارالىق لوگيستيكالىق كومپانيالار ۇكىمەتكە ءۇن قاتا الماي وتىر.

ءىرى تاسىمالداۋشى باقتىباي مىرزاتايەۆ «قازاقستان تەمىر جولى» قۇر ۋادەگە تويدىرىپ كەلەدى دەيدى. 15- قازانعا دەيىن 7 مىڭداي ۆاگوننىڭ 300- ءى ەلگە جەتكىزىلۋى كەرەك- ءتىن. ءبىراق ولار ءالى دە شەكارادا تۇر.

قىتايلىق تاراپ كەلەڭسىزدىككە كارانتيندىك شارالاردى جەلەۋ ەتەدى. ءتىپتى اۆتوبەكەتتەگى تاسىمال دا قيىنداپ كەتكەن. قازىر تاسىمالداۋشىلار قىتاي جاققا وتە المايدى. سالدارىنان قاداعالاۋسىز قالعان تاۋارلار ءبۇلىنىپ كەلەدى. كەيدە مۇلىككە قول سالاتىندار دا بار ەكەن. ونىڭ ۇستىنە قىتايلىق بروكەرلەر كەدەندىك قىزمەت قۇنىن 25 ەسە ارتتىرىپ جىبەرگەن. بۇرىن 1000 دوللار بولسا، قازىر 25000 دوللار سۇرايدى. كاسىپكەرلەردى سونداي- اق ەۋروپا مەن ازياعا قاتىنايتىن ۆاگونداردىڭ ەمىن- ەركىن ءوتۋى ويلاندىرادى.

ەندى كۇن سايىن شىعىنعا باتىپ جاتقان 24 ءىرى لوگيستيكالىق كومپانيا وكىلدەرى قازاقستان ءۇشىن مايقاپشاعاي، قالجات كەدەن بەكەتتەرىن اشۋدى سۇرايدى. سەبەبى ۋاقىتتى وزدىرۋعا مۇلدە بولمايدى. ولار 200-گە تارتا يمپورتتاۋشى كاسىپورىنمەن كەلىسىمشارت جاساسقان. ونىڭ كوبى تەندەرمەن اينالىسادى. تاۋار ساتىپ، كۇن كورىپ وتىرعاندار دا بار. ماسەلە شەشىلمەسە، بۇل ونىمدەر قاجەتسىز بولىپ قالۋى مۇمكىن. ويتكەنى شىعىنعا قاراي باعا دا ءوسىپ، قاراپايىم تۇتىنۋشىعا قولجەتىمسىز بولادى.

باقتىباي مىرزاتايەۆ، حالىقارالىق لوگيستيكالىق كومپانيا جەتەكشىسى:

- جاز بويى تاۋارعا جىبەرگەن ۆاگوندارىمىزدىڭ ءبىرى دە قايتارىلمادى. اۆتوبەكەتتەن دە قايىر بولماي تۇر. قىتايلىق تاراپ ەكسپورتتىق دەكلاراتسيانى بەرۋدى قويدى. مۇنداي جاعدايدى پايدالانباق بولعان پىسىقايلار بار. ولار جۇك كولىكتەرىمىزدى ەرتە قايتارۋعا كومەكتەسەمىز دەپ، 25 مىڭ دوللارعا دەيىن اقى سۇرايدى. ۇكىمەتكە ءبىز شىعا المايمىز. «قازاقستان تەمىر جولى» ماسەلەنى شەشەمىز دەپ وتىر. ءبىز بۇرىن وزگە تاسىمالداۋشىلارمەن باسەكەلەس بولساق، قازىر مۇڭداس بولىپ قالدىق. ءبارىمىز دە تاۋار تاپشىلىعىنا تاپ بولاتىنىمىزدى سەزەمىز. مەنىڭ 15 ۆاگونىم شەكارادا تۇر. ميلليونداعان شىعىنعا باتتىم. ال كاسىپكەرلەر بىزبەن بايلانىستى ءۇزىپ جاتىر.

قىتاي- قازاق شەكاراسىنداعى جاعدايدى ەلىمىز فورس- ماجور دەپ باعالادى. باقتىباي مىرزاتايەۆ مەملەكەتتىك ورگانداردىڭ كاسىپكەرلەرگە ءتيىستى جاعداي جاساۋعا اسىقپايتىنىن ايتىپ قالدى. از ۋاقىتتا دايىندالۋى قاجەت قۇجاتتاردىڭ سوڭىنان ءبىر اي جۇگىرۋ كەرەك ەكەن. تاعى ءبىر لوگيستيكالىق كومپانيا جەتەكشىسى ەركىن حاميت بۇل ماسەلەمەن شىلدەدەن بەرى كۇرەسىپ كەلەدى. ونىڭ ايتۋىنشا، قىتايدا تاۋار قىمباتتاماعان. ءبىراق ءبىزدىڭ ەلگە ءتيىمسىز باعادا كەلەدى. ءارى جۇكتىڭ مەرزىمىنەن كەشىكتىرىلۋى سالدارىنان تاسىمالداۋشىلار كليەنتتەرىنەن ايىرىلىپ جاتىر.

www.24.kz



Up