Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

كوروناۆيرۋستىڭ جاڭا شتامى دەرتتىڭ قايتا ورشۋىنە اكەلۋى مۇمكىن - ەپيدەميولوگ

30 November 2021 14:48

الماتى. قازاقپارات - كوروناۆيرۋستىڭ جاڭا «وميكرون» شتاممى دەرتتىڭ جاڭادان ورشۋىنە اكەلۋى مۇمكىن.

بۇل تۋرالى وڭىرلىك كوممۋنيكاتسيالار قىزمەتىندەگى بريفينگىندە الماتى قالاسى سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى قازاقپارات ءتىلشىسى.

اسەل قالىقوۆا مەگاپوليس «جاسىل» ايماقتا ورنالاسقانىنا قاراماستان، سوڭعى اپتادا كوروناۆيرۋس ينفەكتسيانىڭ 641 جاعدايى تىركەلگەنىن اتاپ ءوتتى. وتكەن تاۋلىكتە 34 ادامنان ينفەكسيا انىقتالدى. سپيكەر بۇكىل الەمدە ەپيدەميولوگيالىق جاعداي ناشارلاپ، قاتاڭ كارانتين رەجيمى قايتا ەنگىزىلگەنىن تىلگە تيەك ەتتى.

«سوندىقتان حالىقتى، اسىرەسە قارتتاردى، سوزىلمالى اۋرۋلارى بار ادامداردى، جاسوسپىرىمدەردى، جۇكتى ايەلدەردى ۆاكتسينالاۋدى ۇلعايتۋ قاجەت. الماتىنىڭ بارلىق تۇرعىندارى ەلدە «وميكرون» شتاممنىڭ پايدا بولۋىنا جانە تارالۋىنا جول بەرمەۋ ءۇشىن، اسىرەسە دەمالىس جانە مەرەكە كۇندەرى ادامدار كوپ جينالاتىن ورىنداردان اۋلاق بولۋلارىنا كۇش سالۋ قاجەت. كوروناۆيرۋستىڭ جاڭا «وميكرون» شتاممى اۋىر زارداپتارمەن دەرتتىڭ جاڭادان ورشۋىنە اكەلۋى مۇمكىن»، - دەدى اسەل قالىقوۆا.

ەپيدەميولوگ «وميكرون» جاعدايلارى افريكانىڭ 8 ەلىندە (وار، بوتسۆانا، لەسوتو، ناميبيا، زيمبابۆە، موزامبيك، ەسۆاتيني، تانزانيا)، سونداي-اق بەلگيادا، يزرايلدە، گونكونگتا، گەرمانيادا، چەحيادا جانە ۇلى بريتانيادا تىركەلگەنىن ايتتى.

«وميكرون» الدىڭعى نۇسقالاردان كوپتەگەن جاڭا مۋتاتسيالارمەن ەرەكشەلەنەدى. ونىڭ قازاقستانعا اكەلىنۋىنە جول بەرمەۋ ماقساتىندا ۆەدومستۆوارالىق كوميسسيا 3-جەلتوقساننان باستاپ بوتسۆانا، وار، لەسوتو، ناميبيا، زيمبابۆە، موزامبيك، مالاۆي، ماداگاسكار، ەسۆيتيني، تانزانيا جانە گونكونگتان شەتەل ازاماتتارىنىڭ قازاقستانعا كىرۋىن شەكتەۋ تۋرالى شەشىم قابىلدادى»، - دەپ اتاپ ءوتتى ول.

اۆتور: الما مۇقانوۆا

Keywords: ايماق,
Up