Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

مەملەكەتتىك حاتشى: لارري كينگ - امەريكانىڭ ساۋىتبەك ابدراحمانوۆى

30 November 2021 15:43

نۇر- سۇلتان. قازاقپارات - ەلوردادا ق ر پارلامەنتى ءماجىلىسىنىڭ دەپۋتاتى، كورنەكتى قالامگەر ساۋىتبەك ادراحمانوۆتىڭ 70 جىلدىق مەرەيتويىنا ارنالعان «مادەنيەت، ءبىلىم، عىلىم ىقپالداستىعى جانە قازىرگى زامانعى مەدياكوممۋنيكاتسيا» اتتى حالىقارالىق عىلىمي- تاجىريبەلىك كونفەرەنسيا ءوتتى، دەپ حابارلايدى قازاقپارات ءتىلشىسى.

«ساۋىتبەك ابدراحمانوۆ - تاۋەلسىز قازاقستاندى قۇرۋعا جانە ونىڭ رۋحانيات سالاسىن بايىتۋعا ولشەۋسىز ۇلەس قوسقان ارداقتى ازاماتتاردىڭ ءبىرى، ەلىمىزدىڭ اقپارات ءمينيسترى، باس باسىلىمنىڭ باسشىسى رەتىندە جاس مەملەكەتىمىزدىڭ تاريحىندا قالعان تۇلعا. ساۋكەڭ جەمىسى مول 70 جاسقا مەملەكەت جانە قوعام قايراتكەرى، ساليقالى ساياساتكەر، قارىمدى قالامگەر اتانىپ، ابىرويمەن جەتتى. شىعارماشىلىعى لايىقتى باعالانىپ، مەملەكەتتىك سىيلىق يەلەندى. ەل- جۇرتتىڭ الدىندا بەدەلدى حالىق قالاۋلىسىنا اينالدى. اۋدارمانىڭ قىر- سىرىن، پۋشكين تۋىندىلارىنىڭ تابيعاتىن زەرتتەپ، ادەبيەتتانۋشى عالىم اتاندى. ءسوزىنىڭ سالماعى بار، ءىسىنىڭ ونەگەسى بار ساۋكەڭدى قۇرمەتتەپ، بۇگىنگىدەي حالىقارالىق كونفەرەنسيا وتكىزۋ وتە ورىندى دەپ سانايمىن»، - دەدى ءىس- شارانى اشقان ق ر مەملەكەتتىك حاتشىسى قىرىمبەك كوشەربايەۆ.

قىرىمبەك كوشەربايەۆ مەرەيتوي يەسىمەن ساياسي سەرىكتەس رەتىندە دە ەڭبەك جولدارى قاتار وربىگەنىن، تالاي قىزىق پەن شىجىقتى بىرگە وتكىزگەندەرىن اتاپ ءوتتى.

«ساۋكەڭ - ەل ىسىنە ەرتە ارالاسىپ، اتقا قونعان ازامات. جەر ءجۇزىن شارلاپ، كوپتى كوردى. الەمنىڭ 61 مەملەكەتىن ارالاپ، قىزىقتى رەپورتاجدار مەن وچەركتەر جازدى. ول جۇرگەن جەرىندە قاراشانىڭ دا، حاننىڭ دا ءتىلىن تاپتى. كوپتەگەن مەملەكەت باسشىلارىمەن سۇحبات قۇردى. ەلباسىنان العان سۇحباتتارىنىڭ ءوزى ءبىر توبە. ونى تۇرعىلاستارى كەيدە سۇحبات الۋدىڭ ساڭلاعى دەيدى. الەمگە ايگىلى لارري كينگ دەگەن سۇحبات جانرىنىڭ مايتالمانى بولعان. ءبىزدىڭ ساۋكەڭ دە قازاقتىڭ لارري كينگى دەۋگە بولار ەدى. ءبىراق، بۇل ساۋكەڭنىڭ تاقياسىنا تارلىق ەتەدى. دۇرىسى لارري كينگ امەريكانىڭ ساۋىتبەك ابدراحمانوۆى»، - دەدى ول.

اۆتور: مارلان جيەمباي

Keywords: قوعام,
Up