Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستان مەن رەسەيدە وندىرىلگەن «سپۋتنيك V»  ۆاكسيناسىنىڭ ايىرماشىلىعى بار ما؟

22 April 2021 19:43

نۇر-سۇلتان. قازاقپارات - ق ر دەنساۋلىق ساقتاۋ مينيسترلىگى حالىقتى يممۋنداۋ جونىندەگى ۇلتتىق كونسۋلتاتيۆتىك كوميسسياسىنىڭ مۇشەسى، مەديتسينا عىلىمدارىنىڭ دوكتورى، پروفەسسور جاننات ساتىبالديەۆا قازاقستاندا شىعارىلعان «سپۋتنيك V» ۆاكتسيناسىنا كۇمان كەلتىرۋگە نەگىز جوق ەكەنىن ايتتى، دەپ حابارلايدى قازاقپارات ءتىلشىسى.

«بۇل تۇرعىدا الاڭداۋعا نەگىز جوق. بىرىنشىدەن، ۆاكسينانىڭ نەگىزگى كومپونەنتى - ول رەسەيدە وندىرىلگەن «سپۋتنيك V».

ال قاراعاندى فارماتسيەۆتيكالىق كەشەندە اتقارىلاتىن كەزەڭدەرگە توقتالساق، فلاكوندارعا قۇيۋ، بولشەكتەپ ولشەۋ مەن باسقا دا جۇمىستار قامتىلعان. ياعني، وسىنىڭ بارلىعى ۆاكتسينانىڭ ساپاسىنا اسەر ەتپەيدى. بۇل زاۋىت اككرەديتتەلگەن جانە ءتيىستى وندىرىستىك تاجىريبە تالاپتارىنا سايكەس كەلەدى»، - دەدى ج. ساتىبالديەۆا ۆاكسينا تاقىرىبىنا ارنالعان ونلاين تالقىلاۋ بارىسىندا.

وسى ورايدا ول اتالعان زاۋىت زاماناۋي تەحنولوگيالارمەن جۇمىس ىستەيتىنىن اتاپ ءوتتى.

«بۇل تۇرعىدا الاڭداپ كەرەك ەمەس. سەبەبى ول بيولوگيالىق سيپاتتاعى دارىلىك پرەپاراتتارمەن جۇمىس ىستەۋ ءۇشىن ارنالعان. بۇل ءوز كەزەگىندە كوروناۆيرۋسقا قارسى ۆاكسينا شىعارۋعا لايىقتى كەشەن. زاۋىت جوعارى ساپالى جابدىقتارمەن قامتاماسىز ەتىلگەن. سوندىقتان ساپا بويىنشا ەشقانداي ايىرماشىلىق جوق. وسى ورايدا تەحنولوگيالار ترانسفەرى ەسكەرىلگەن جانە مۇنداي ىنتىماقتاستىققا قولداۋ بىلدىرگەن ءجون»، - دەدى عالىم.

بۇدان بۇرىن حابارلانعانداي، جاننات ساتىبالديەۆا قازاقستاندا ۆاكسينالاردى تەكسەرۋگە ەرەكشە ءمان بەرىلەتىنىن ايتتى. سونىمەن قاتار ول «سپۋتنيك V» ۆاكتسيناسىنىڭ تيىمدىلىگىنە قاتىستى تۇسىنىك بەردى.

Up