Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

قازاق ءتىلى قوعامىنىڭ ورتالىق كەڭەسىنىڭ جاڭا قۇرامىنا 47 ادام سايلاندى

2021 жылдың 26 қараша 2021 16:46

تۇركىستان. قازاقپارات - «قازاق ءتىلى» قوعامىنىڭ ورتالىق كەڭەسىنىڭ جاڭا قۇرامىنا ق ر پارلامەنتىنىڭ قوس پالاتاسىنىڭ دەپۋتاتتارى مەن فيليال ءتوراعالارى جانە زيالى قاۋىم وكىلدەرىنەن قۇرالعان 47 ادام سايلاندى.

ال ورتالىق كەڭەس باسقارماسىنىڭ جاڭا قۇرامىنا 18 ادام سايلانىپ، قىزمەتكە كىرىستى، دەپ حابارلايدى قازاقپارات ءتىلشىسى.

تۇركىستاندا وتكەن قوعامنىڭ VI قۇرىلتايىندا مەملەكەتتىك حاتشى قىرىمبەك كوشەربايەۆ ق ر تۇڭعىش پرەزيدەنتى، ەلباسى نۇرسۇلتان نازاربايەۆ پەن ق ر پرەزيدەنتى قاسىم-جومارت توقايەۆتىڭ قۇرىلتايعا ارنالعان قۇتتىقتاۋ حاتتارىن وقىپ بەردى.

سونداي-اق قازاق ءتىلىنىڭ قولدانىلۋ اياسىن كەڭەيتۋ ءۇشىن ماڭىزدى جۇمىستار جالعاساتىنىن، ەلدى بىرىكتىرەتىن فاكتور مەملەكەتتىك ءتىل ەكەنىن اتاپ ءوتتى. پرەزيدەنت اكىمشىلىگى مەن ەل ۇكىمەتى تاراپىنان قازاق ءتىلىنىڭ مارتەبەسىن كوتەرۋگە بارىنشا قولداۋ كورسەتىلە بەرەتىنىن مالىمدەدى. مەملەكەتتىك ءتىل ساياساتىن ءتيىمدى ىسكە اسىرۋ باعىتىنداعى جوسپارلاردى سارالاپ، ءتيىستى تاپسىرمالار مەن جوسپارلاردى بەكىتتى.

«بۇل قۇرىلتايدى تۇركىستاندا وتكىزۋىمىزدە ءمان بار. ەلباسىنىڭ تاريحي شەشىمىمەن تۇركىستان وبلىسى قۇرىلىپ، تۇركىستان قالاسى وبلىس ورتالىعى رەتىندە دامىپ كەلەدى. قىرۋار جۇمىس اتقارىلىپ جاتىر. سىزدەر - ەل الدىندا جۇرگەن ازاماتسىزدار. ەلوردانى كورىپ جۇرسىزدەر، بۇل جولى تۇركىستاننىڭ جاڭا كەلبەتىن كورسىن، قۋانسىن دەپ قۇرىلتايدى وسىندا ۇيىمداستىرۋدى ءجون كوردىك»، - دەدى ق. كوشەربايەۆ.

كەلەلى باسقوسۋدا «قازاق ءتىلى» قوعامىنىڭ اتقارعان جۇمىسى بويىنشا ورتالىق كەڭەسىنىڭ ەسەبى تىڭدالدى. قوعام فيليالدارىنىڭ باسشىلارى دا بايانداما جاساپ، ءوز ۇسىنىستارىن ءبىلدىردى. سونىمەن بىرگە قوعامنىڭ جاڭا باعدارلاماسى مەن جارعىسى قابىلداندى. قۇرىلتايدا دەلەگاتتاردىڭ اشىق داۋىس بەرۋى ارقىلى حالىقارالىق «قازاق ءتىلى» قوعامىنىڭ پرەزيدەنتى بولىپ سايلانعان ق ر پارلامەنتى ءماجىلىسىنىڭ دەپۋتاتى بەرىك ءابدىعالي ۇلى مەملەكەتتىك ءتىلدى تۇعىرىنا تولىق قوندىرۋ باعىتىندا جۇمىس كۇشەيەتىنىن جەتكىزدى.

«قازاق ءتىلىنىڭ ماسەلەسىن قازاق ءتىلدى ورتادا عانا تالقىلاي بەرمەي، ورىس ءتىلدى ورتادا دا تالقىلاپ، مەملەكەتتىك ءتىلدىڭ ماڭىزدىلىعىن كەي اعايىندارعا ءتۇسىندىرۋ كەرەك. قازاقستاننىڭ ءاربىر ازاماتى قازاق ءتىلىن بىلۋگە مىندەتتى»، - دەدى ول.

قۇرىلتاي بارىسىندا وڭىرلەردە قوعام فيليالدارىنىڭ جۇمىسى كۇشەيتىلىپ، باس كەڭسە الماتىدان نۇر-سۇلتانعا كوشىرىلەتىنى ايتىلدى. باس ۇيىم مەن فيليالداردىڭ جۇمىس جوسپارى بەكىتىلدى. سونداي-اق جيىن بارىسىندا «قازاق ءتىلى» قوعامدىق بىرلەستىگىنىڭ قىزىلوردا وبلىستىق فيليالىنىڭ ءتوراعاسى ءسادۋاقاس اڭسات «پاراسات» وردەنىمەن، ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى، عالىم انار فازىلجانوۆا «قۇرمەت» وردەنىمەن ماراپاتتالدى.

ولاردى مەملەكەتتىك حاتشى ق. كوشەربايەۆ ارنايى ماراپاتتاپ، قازاق تىلىنە قوسقان ۇلەستەرى ءۇشىن العىسىن ءبىلدىردى.

ماڭىزدى باسقوسۋدا ق ر پارلامەنتى ءماجىلىسىنىڭ دەپۋتاتى گەننادي شيپوۆسكيح الەۋمەتتىك جەلىلەر مەن عالامتوردا قازاقشا كونتەنتتەردى كوبەيتىپ، جاستاردىڭ سۇرانىسىن قاناعاتتاندىرۋ كەرەك دەگەن پىكىرىن بىلدىرسە، قوعام قايراتكەرى ورازكۇل اسانعازى مەن ءتىل جاناشىرى اسىلى وسمان مەملەكەتتىك ءتىلدى تولىق تۇعىرىنا قوندىرۋعا كەرى اسەرىن تيگىزىپ وتىرعان فاكتورلارعا توقتالىپ، قازاق ءتىلىنىڭ بولاشاعى ءۇشىن ناقتى جۇمىستار اتقارىلۋى كەرەكتىگىن جەتكىزدى.

تۇركىستان وبلىسىندا 2 كۇنگە سوزىلعان قۇرىلتايعا قاتىسۋشىلار ارىستان باب پەن قوجا احمەت ياساۋي كەسەنەسىنە زيارات جاساپ، بابالار رۋحىنا تاعزىم ەتتى. وسى ساپاردا دەلەگاتتار ءتىل جاناشىرلارى ءارى قوعام قايراتكەرلەرى وزبەكالى جانىبەكوۆ پەن ءومىرزاق ايتبايەۆتى ەسكە الدى. جيىنعا قاتىسۋشىلار تۇركىستانداعى وڭ وزگەرىستەرگە ريزاشىلىقتارىن ءبىلدىرىپ، قۇرىلتايداعى ماڭىزدى باستامالاردى جۇزەگە اسىرۋعا بار كۇشتەرىن سالاتىندارىن جەتكىزدى.


اۆتور: اينۇر اقبايەۆا

Басты сөздер: بيلئك جانة ساياسات,
Жоғары қарай