Ауа райы
Астана -11 °С
Алматы -3 °С
валюта бағамы
USD 421.58
EUR 496.83
RUB 5.53
CNY 62.20

ÁMEN анимациялық фильмдер фестиваліне түркі елдері қатысады

2020 жылдың 26 қазан 2020 20:36

НҰР-СҰЛТАН. ҚазАқпарат – 30-31 қазан күндері ÁMEN анимациялық фильмдер кинофестивалі онлайн форматта өтеді, деп хабарлайды ҚазАқпарат тілшісі.

Өткен жылы фестиваль қоржынына 80-нен астам өтінім түсіп, байқауға 51 жұмыс іріктеп алынған еді. Нәтижесінде 7 жеңімпаз анықталып, 5 жоба арнайы жүлдемен марапатталды.

«Биылғы екінші фестиваль онлайн форматта өтеді. Бұл байқаудың ерекшелігі – өнер додасының халықаралық деңгейге көтерілуі, шараға түркі елдерінің, атап айтқанда, Түркия, Әзербайжан, Түрікменстан, Өзбекстан, Қырғызстан, Татарстан және Башқұртстан өкілдері де қатысады. Бұл жолы фестивальге 40-тан аса жұмыс ұсынылды», - дейді ұйымдастырушылар.


Байқауда 2019-2020 жылдары түсірілген анимациялық фильмдер, студенттік анимациялық жұмыстар және комикстер сынға түседі. Оған өтінім білдірген барлық суретші-мультипликаторлар қатыса алады.

Шара аясында «Рухани жаңғыру» қазақстандық қоғамдық даму институтының қатысуымен «Қазақ анимациясының көкейкесті мәселелері» және «Түркітілдес елдердің анимациялық киноөнерінің бүгіні мен ертеңі» тақырыбында дөңгелек үстелдер және «Қазақстан: табиғат және адам» атты комикстер көрмесі ұйымдастырылады. Сондай-ақ, Ұлттық киноны қолдау мемлекеттік орталығының атсалысуымен отандық және шетелдік озық мультипликаторлардың мастер-кластары мен тренингтері өтеді.

Айта кетерлігі, Ұлттық киноны қолдау орталығы – Қазақстанда заманауи кинонарық қалыптастырып, оның бәсекеге қабілеттілігін арттырумен, кино саласына инвестиция тартумен және ұлттық фильмдердің кинопрокаты қызметін жүзеге асырумен айналысатын бірден-бір ұйым.

Бұдан бөлек, «Қазақфильм» киностудиясының қолдауымен қазақ анимациялық фильмдері ретроспективасы, яғни 1960-2020 жылдар аралығында жарық көрген «Қарлығаштың құйрығы неге айыр?», «Қаңбақ шал», «Жошы хан», «Толағай», «Мұзбалақ» сынды 30-дан аса мультфильм көрсетіледі.

Шара барысында Қазақстан және Түркия мемлекеттерінің толықметрлі фильмдері де көрсетіледі. Айрықша атап өтерлігі, режиссер Қасиет Сақиолланың «Махамбет» мультфильмі тұңғыш рет халықаралық деңгейде көпшілік назарына ұсынылмақ.

Кинофестиваль Youtube және Facebook желісіндегі ресми парақшаларда көрсетіледі.

Кинофестиваль ұйымдастырушылары – «OzgeEpic» заманауи өнер кеңістігі мен Қазақстан анимациялық киностудиялар қауымдастығы.





Жоғары қарай