Ауа райы
Астана +7 °С
Алматы +14 °С
валюта бағамы
USD 421.58
EUR 496.83
RUB 5.53
CNY 62.20

Аида Балаева: Отбасының беріктігі ондағы өзара сыйластық пен құрметке байланысты

2021 жылдың 15 мамыр 2021 11:38

НҰР-СҰЛТАН. ҚазАқпарат - ҚР Ақпарат және қоғамдық даму министрі Аида Балаева қазақстандықтарды халықаралық отбасы күнімен құттықтады, деп хабарлайды ҚазАқпарат.

«Бүгін - халықаралық отбасы күні. Отбасы – баршамыз үшін қастерлі де қадірлі ұғым. Расында әрбір отбасы – тұтас қоғамның айнасы. Бірақ, отбасының іргесін бекітіп, қабырғасын қатайту – өмірге ұрпақ әкелу, мол табыс табу қағидаларымен ғана шектеле ме?! Менің ойымша, отбасының беріктігі – ең алдымен ондағы өзара сыйластық пен құрметке, биік рухани деңгей мен тәрбиеге байланысты. Біздің қай-қайсымыз өмірлік дағдыны, мінезімізді, басқалармен байланыс мәдениетін отбасындағы тәрбиеден қалыптастырамыз. Әке-шешенің бір-біріне деген құрметі, айналаға деген қарым-қатынасы – бала үшін ең бірінші өмірлік үлгі. Соның ішінде, ананың ықпалы мен рөлі әсіресе ерекше деп санаймын. Әйелдің ата-анаға деген ізеті, жұбайына құрметі, баласына деген мейірімі, өзіне деген сенімі – барлығы да бала тәрбиесіндегі негізгі алғышарт. Баланың тыңдап ой түзейтін де, қарап бой түзейтін де үлгісі осында жатыр» деп жазды Аида Балаева Facebook парақшасында.

Ақпарат және қоғамдық даму министрі «Ұяда не көрсең – ұшқанда соны ілесің» деген халық даналығын еске салды. Яғни, отбасылық тәрбие - күнделікті жауапкершілік.

Бұның барлығы да - біздің халықтың өзіне тән отбасылық тәрбие институтында бар дүние. Ол ғасырдан ғасырға созылып, ұрпақтан ұрпаққа сабақтасып келеді.

Себебі бұл ұлттық кодымызға жазылған рухани құндылықтар.

«Біз кеше ғана жылдағы дәстүрмен кезекті «Мерейлі отбасы» ұлттық конкурсын бастадық. Бұл шын мәнінде нағыз халықтық қолдауға ие ұлттық жобаға айналды. Бүгінде кейбір БАҚ елімізде отбасылық құндылықтардың өзгергенін жазып жатады. Дегенмен шын мәнінде біздің қоғамда үлгі болатын отбасылар өте көп. Ел Тәуелсіздігінің 30 жылы ішінде ұйымдастырылатын осындай әртүрлі жобалар мен байқаулар бізге осыны көрсетіп келеді. Мұраты биік мемлекет те, бірлігі берік қоғам да – ең алдымен бірлігі зор, берекесі мол отбасыдан құралады. Осындай отбасылар – ертеңгі ел басқаратын зиялы азаматты да тәрбиелейді, бәсекеге қабілетті қоғамды да қалыптастырады. Сондықтан Отбасы мерекесі баршаңызға құтты болсын! Дендеріңізге саулық, баянды бақыт пен берекелі татулық тілеймін! Отбасыларыңыз аман болсын!» деп түйіндеді сөзін министр.

Айта кетейік, бүгін әлем елдері халықаралық отбасы күнін атап өтіп жатыр.


Жоғары қарай